ۇلتتىق عىلىم اكادەمياسى جاڭادان سايلانعان اكادەميكتەردى تانىستىردى

رەسمي شارا بارىسىندا عىلىم جانە جوعارى ءبىلىم ءمينيسترى ساياسات نۇربەكتىڭ عالىمداردى قۇتتىقتاۋىن ۆيتسە-مينيستر دارحان احمەت-زاكي جەتكىزىپ, عىلىم الدىندا تۇرعان كەلەلى مىندەتتەرگە توقتالسا, الماتى قالاسى اكىمىنىڭ ورىنباسارى ازامات قالدىبەكوۆ قۇتتىقتاۋ ءسوزىن ارنادى.

القالى جيىندا ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ  ۇلتتىق اكادەميانىڭ جاڭا  مۇشەلەرى ەڭ وزەكتى سۇراقتارعا جاۋاپ تاۋىپ, عىلىمدى قوعامنىڭ الەۋمەتتىك-ەكونوميكالىق دامۋىنىڭ قوزعاۋشى كۇشىنە اينالدىرادى دەگەن سەنىم ءبىلدىردى.

«مەملەكەت باسشىسى اكادەميا مۇشەلەرىن سايلاۋ بارىنشا اشىق جانە ءادىل ءوتۋى كەرەكتىگىن, ونىڭ پروتسەدۋرالارى تۋرالى قوعام حاباردار بولۋى ءتيىس ەكەنىن ەرەكشە اتاپ ءوتتى. وسى تالاپتى ورىنداۋ ماقساتىندا اكادەميا مۇشەلەرىن سايلاۋدىڭ جاڭا ەرەجەلەرى ازىرلەندى, وعان سايكەس ىرىكتەۋ پروتسەدۋراسى 3 كەزەڭنەن تۇرادى. بۇل بەلگىلەنگەن كريتەريلەرگە سايكەس كەلۋ, ۇلتتىق اكادەميا پرەزيديۋمىندا ءوز باعدارلاماسىن قورعاۋ جانە اكادەميا مۇشەلەرىنىڭ جالپى جينالىسىندا داۋىس بەرۋ ارقىلى سايلانۋ كەزەڭدەرىنەن تۇرادى. سونىمەن قاتار, اكادەميا مۇشەلەرى مەملەكەتتىك قىزمەتكەرلەر, كاسىپكەرلەر ياعني عىلىمي-زەرتتەۋ قىزمەتىمەن اينالىسپايتىن تۇلعالار بولا المايدى.

بۇگىنگى تاڭدا ۇلتتىق اكادەميا مۇشەلەرىن سايلاۋدىڭ نەگىزگى ەرەجەلەرى وسىنداي, جانە ءبىز ولاردى قاتاڭ ساقتايمىز. بۇگىن ءبىز سىزدەرگە جاڭادان سايلانعان اكادەميكتەردى تانىستىرامىز. ولار – قازاقستاندىق عىلىمنىڭ دامۋىنا ەلەۋلى ۇلەس قوسقان قوعامعا تانىمال عالىمدار. قازىرگى كەزدە اكادەميا عىلىمي-زەرتتەۋ جۇمىستارىمەن بەلسەنە اينالىساتىن جەتەكشى عالىمداردىڭ ارقاسىندا, قۇرامى ۇنەمى جاڭارىپ وتىراتىن جوعارى عىلىمي ۇيىمعا اينالدى. عىلىمي قىزمەتتى ۇيىمداستىرۋداعى بار ولقىلىقتاردى انىقتاۋ جانە تولتىرۋ, جۇيەلى جانە بولجامدى تالداۋ نەگىزىندە عىلىمي زەرتتەۋلەردىڭ باسىمدىقتارىن انىقتاۋ, سونداي-اق فورسايتتىق زەرتتەۋلەر, ستراتەگيالىق ماڭىزدى ينتەگراتسيالانعان پانارالىق عىلىمي-تەحنيكالىق باعدارلامالاردى ازىرلەۋ, مەملەكەتتىك ساياساتتى عىلىمي-ساراپتامالىق قولداۋ ماقساتىندا قازاقستاننىڭ جەتەكشى عالىمدارىن بىرىكتىرەتىن نەگىزگى ميسسيانى ورىنداۋعا باعىتتالعان ۇلتتىق اكادەميانىڭ جاڭا قۇرىلىمى قۇرىلدى.

بيىل اكادەميا جانىنان قۇرىلعان تالداۋ ورتالىعى وتاندىق عىلىمنىڭ جاي-كۇيىن تالداپ, ەلدىڭ عىلىمي الەۋەتىنىڭ دەرەكقورىن جاسادى. حالىقارالىق ىنتىماقتاستىقتى دامىتۋ شەڭبەرىندە الەمنىڭ جەتەكشى عىلىمي ۇيىمدارىمەن 27 مەموراندۋمعا قول قويىلدى. ولاردىڭ نەگىزىندە نەمىس, كورەي جانە قىتاي عىلىمي قۇرىلىمدارىمەن بىرلەسكەن 3 حالىقارالىق عىلىمي ورتالىق اشىلدى, سونداي-اق اقش جانە قىتاي عىلىم اكادەميالارىمەن 3 حالىقارالىق عىلىمي جوبانى ىسكە اسىرۋ باستالدى», دەپ اتاپ ءوتتى دەدى ۇعا پرەزيدەنتى.

بۇگىنگى كۇنى  ۇعا قۇرامىندا 17 اكادەميك بار. پرەزيدەنت جانىنداعى ۇلتتىق عىلىم اكادەمياسىنىڭ اكادەميكتەرىن سايلاۋ قاعيدالارىنا سايكەس, قاتاڭ ىرىكتەۋدەن ءوتىپ, سايلانعان اكادەميكتەرگە ارنايى ديپلوم تابىس ەتىلدى. 

ء«ومىر جانە دەنساۋلىق تۋرالى» عىلىمدار بولىمشەسى بويىنشا:

يۋري پيا, مەديتسينا عىلىمدارىنىڭ دوكتورى, قاۋىمداستىرىلعان پروفەسسور,  «University Medical Center» كق باسقارما توراعاسى

ديليارا قايداروۆا, مەديتسينا عىلىمدارىنىڭ دوكتورى, پروفەسسور, «قازاق ونكولوگياسى مەن راديولوگياسى عىلىمي زەرتتەۋ ينستيتۋتى» اق باسقارما توراعاسى

«جەر, عارىش جانە كوممۋنيكاتسيالار تۋرالى» عىلىمدار بولىمشەسى بويىنشا:

ەرلان باتىربەكوۆ, فيزيكا-ماتەماتيكا عىلىمدارىنىڭ دوكتورى, پروفەسسور, ۇلتتىق يادرولىق ورتالىقتىڭ باس ديرەكتورى

باعدات تەلتاەۆ, تەحنيكا عىلىمدارىنىڭ دوكتورى, پروفەسسور, ءو.جولداسبەكوۆ اتىنداعى مەحانيكا جانە ماشيناتانۋ ينستيتۋتىنىڭ باس عىلىمي قىزمەتكەرى

جۇماباي باكەنوۆ, تەحنيكا عىلىمدارىنىڭ دوكتورى (TokyoTeسh), PhD, پروفەسسور, «National Laboratory Astana» ەنەرگەتيكا جانە جاڭا ماتەريالدار عىلىمى ورتالىعىنىڭ باسشىسى

ايدارحان قالتاەۆ, فيزيكا-ماتەماتيكا عىلىمدارىنىڭ دوكتورى, پروفەسسور, ق. ساتباەۆ اتىنداعى قازۇتزۋ ينجەنەرلىك مەحانيكا جانە مودەلدەۋ عىلىمي زەرتتەۋ زەرتحاناسىنىڭ مەڭگەرۋشىسى

«اگروبيورەسۋرستار جانە ەكولوگيا تۋرالى» عىلىمدار بولىمشەسى بويىنشا:

مۇحيت ورىنباەۆ, ۆەتەريناريا عىلىمدارىنىڭ كانديداتى, پروفەسسور, «بيولوگيالىق قاۋىپسىزدىك پروبلەمالارى بو­يىنشا عىلىمي-زەرتتەۋ ينستيتۋتى» جشس «جۇقپالى اۋرۋلاردى باقىلاۋ» زەرتحاناسىنىڭ باس عىلىمي قىزمەتكەرى

ء«بىلىم مەن قوعامدى دامىتۋ تۋرالى» عىلىمدار بولىمشەسى بويىنشا:

جاكەن تايماعامبەتوۆ, تاريح عىلىمدارىنىڭ دوكتورى, ۇلتتىق مۋزەيدىڭ باس عىلىمي قىزمەتكەرى

القالى جيىن بارىسىندا ق.ساتباەۆ اتىنداعى مەرەيتويلىق توسبەلگىسىمەن عىلىمدى ناسيحاتتاۋعا بەلسەندى ۇلەس قوسىپ جۇرگەن بۇقارالىق كوممۋنيكاتسيا وكىلدەرى ماراپاتتالدى. ولاردىڭ قاتارىندا «قازاق گازەتتەرى» سەرىكتەستىگىنە قاراستى «ەگەمەن قازاقستان» گازەتىنىڭ ءتىلشىسى ەلۆيرا بوكەنباەۆا, «كازاحستانسكايا پراۆدا» گازەتىنىڭ تىلشىلەرى نيكولاي جوروۆ, ايگۇل تۇرىسبەكوۆا, «اقيقات» قوعامدىق-ساياسي جۋرنالى باس رەداكتورىنىڭ ورىنباسارى دينا يمامباي بار.

جيىنعا قاتىسۋشىلار ۇلتتىق عىلىمنىڭ باستاۋىندا تۇرعان عالىمدار شىعارماشىلىعىنان سىر شەرتەتىن بۇيىمدار جانە ورتالىق عىلىمي كىتاپحانا قورىنان ۇسىنىلعان سيرەك قورداعى جادىگەرلەر كورمەسىمەن تانىستى.

الماتى