قىزىلوردادا دارىگەرلەر اناليز الۋ كەزىندە جاڭا تۋعان نارەستەنىڭ تابانىن كۇيدىرىپ العان, دەپ حابارلايدى Egemen.kz.
وقيعا قىزىلوردا وبلىستىق پەريناتالدىق ورتالىعىندا بولعان. جابىرلەنۋشى ايەلدىڭ تۋىسى ايگەرىم ابىلتاەۆانىڭ ايتۋىنشا, بىرنەشە كۇن بۇرىن جوعارى قان قىسىمى بايقالعان جۇكتى كەلىنىن اۋدان دارىگەرلەرى شۇعىل تۇردە وبلىستىق پەريناتالدىق ورتالىققا جىبەرگەن. قالادا وعان دەرەۋ «كەسار تىلىگى» ارقىلى وپەراتسيا جاسالعان.
ء«بىز ونى قالاعا جىبەرگەندەرىنە قاتتى قۋانىپ ەدىك, ويتكەنى مۇندا دارىگەرلەردىڭ دەڭگەيى جوعارى دەپ ويلادىق. بىراق كەلگەندە, نە ونىمەن, نە دارىگەرلەرمەن كەزدەسۋىمىزگە رۇقسات بەرمەدى. تەك نارەستەنىڭ كۋۆەزدە ەكەنىن جانە ونىڭ جاعدايى اۋىر ەكەنىن بىلدىك. بىرنەشە كۇننەن كەيىن كەلىنىم جىلاپ حابارلاسىپ, نارەستەنىڭ اياعىن كۇيدىرىپ العاندارىن ايتتى», دەپ جازدى ايەل ءوز Facebook پاراقشاسىندا.
(فوتو: facebook.com/ايگەرىم ابىلتاەۆا)
مەديتسينالىق قىزمەتكەرلەر بالادان اناليز الۋ كەزىندە سپيرتپەن تابانىن كۇيدىرىپ العانى انىقتالعان. سونىمەن قاتار, تۋىسىنىڭ ايتۋىنشا, دارىگەرلەر وسى ۋاقىتقا دەيىن اناسىنا جورگەكتى اۋىستىرۋعا نەمەسە نارەستەنى ۇستاۋعا رۇقسات بەرمەگەن.
«كۇندەلىكتى تەكسەرىس جاسايتىن پەدياتر قايدا قارادى, رەانيماتسيا ءبولىمىنىڭ جاۋاپتى قىزمەتكەرلەرى نە ىستەپ وتىر؟ جاراعا ينفەكتسيا تۇسكەنىن كۇتتى مە, ەگەر ودان ءارى تاراسا نە بولادى؟ نەگە بۇنى ەشكىم ويلامايدى؟ بەيشارا نارەستە جاساندى تىنىس الۋ اپپاراتىنا قوسىلعان, ال ەندى مىنا جاعداي بولدى! ءبىز كىنالىلەردى جاۋاپقا تارتۋدى تالاپ ەتەمىز!», دەپ جازدى ول.
وبلىستىق پەريناتالدىق ورتالىق بۇل وقيعا بويىنشا ىشكى تەكسەرۋ جۇرگىزىلىپ جاتقانىن ايتتى.
«بارلىق جاۋاپتى قىزمەتكەردەن كورسەتىلگەن قىزمەتتەر بويىنشا اقپارات جينالدى. نارەستەگە كۇتىم جاساۋ كەزىندە قىزمەتكەرلەر تاراپىنان جىبەرىلگەن قاتەلىكتەرگە بايلانىستى ءتيىستى شارالار قولدانىلاتىنىن حابارلايمىز», دەپ جازدى پەريناتالدىق ورتالىق قىزمەتكەرلەرى جازباعا پىكىر رەتىندە.