بۇگىن سەنات وتىرىسىندا دەپۋتات رۋسلان رۇستەموۆ قازاق كينوسى مەن تەلەباعدارلامالاردا انا ءتىلىن شۇبارلاۋ, سلەنگ, جارگون ءسوز قولدانۋعا قارسى بىرنەشە ۇسىنىسىن ورتاعا سالدى, دەپ جازادى Egemen.kz.
رۇستەموۆتىڭ ايتۋىنشا قازاق كينوسى كوبەيگەنمەن, ساپاسى سىن كوتەرمەي تۇر. اسىرەسە, كينودا ارالاس تىلدە ءسوز قولدانۋ ءۇردىسى بەلەڭ الىپ بارادى. مۇنى كورەرمەندەردىڭ ءبىر توبى رەاليستىك وقيعا دەپ قابىلداسا, ەكىنشى توپ انا ءتىلىنىڭ قولدانۋ اياسىن تارىلتۋ دەپ ۇعىپ ءجۇر. وسىلاي دەگەن سەناتور ارالاس ءتىل قولدانىستارى قازاق ءتىلىنىڭ تازالىعىن ساقتاۋعا زيان تيگىزىپ جاتقانىن ايتتى. دەپۋتات وسى ماسەلەلەردى شەشۋ ءۇشىن وتاندىق فيلمدەردىڭ يدەولوگيالىق جانە ادەبي ساپاسىنا ەرەكشە نازار اۋدارۋ قاجەت ەكەنىنە توقتالدى.
«قازاق كينوسى تىلىندە قالىپتاسقان الەۋمەتتىك-لينگۆيستيكالىق ماسەلەلەردى شەشۋ ماقساتىندا بىرقاتار ۇسىنىستاردى قولداۋىڭىزدى سۇرايمىز. وتاندىق كينو ونىمدەرىنە ادەبي, يدەولوگيالىق تۇرعىدا ناقتى باقىلاۋ ورناتۋ ماقساتىندا كينو ءتۇسىرۋ سالاسىنا مەملەكەتتىك ليتسەنزيالاۋدى ەنگىزۋ قاجەت. كينو مەن تەلەيندۋسترياداعى تىلدىك مادەنيەت ماسەلەلەرىن رەتتەۋ ماقساتىندا كينو جانە ساحنا ءتىلىن قاداعالاۋ فۋنكتسياسى ەنگىزىلگەنى ءجون. قازاق كينوسىنىڭ ءتىلىن كوركەم ادەبي ستيلگە نەگىزدەپ, مەملەكەتتiك تiلدiڭ تولىققاندى قولدانىلۋىن زاڭنامالىق قامتاماسىز ەتۋ, قازاق تىلىندە كينو تۇسىرۋشىلەرگە ارنايى تىلدىك كۋرستار وتكىزۋ, كەنجەلەپ قالعان كينو سىنى سالاسىن جەتىلدىرىپ, ءار جاڭا فيلمگە قاتىستى كاسىبي مامانداردىڭ سىني پىكىرلەرىن جاريالايتىن ارنايى جۋرنالدار شىعارۋ قاجەت. شەتەل كينوسىنىڭ پروكاتىنان وندىرىلگەن سالىقتىڭ بەلگىلى ءبىر بولىگىن ۇلتتىق كينونى دامىتۋعا جۇمساۋدى, مەملەكەتتىك تاپسىرىس اياسىنداعى كينونىڭ بارلىعىن تەك مەملەكەتتىك تىلدە ءتۇسىرۋدى زاڭنامالىق قامتاماسىز ەتۋدى جانە ۇلتتىق كينونى قولداۋ مەملەكەتتىك ورتالىعى جانىنداعى ساراپتامالىق كەڭەستىڭ قىزمەتىن زاڭنامالىق تۇرعىدا قايتا وزەكتەندىرۋدى سۇرايمىن», دەدى رۋسلان رۇستەموۆ.
سەناتور مۇنداي جاعىمسىز ءۇردىس تەلەباعدارلامالاردا دا كوبەيگەنىن العا تارتتى. تەلەحابارلاردا ارالاس تىركەستىڭ ءجيى قولدانىلۋى قازاق ءتىلى ءۇشىن پروبلەما ەكەنىن اتاپ ءوتتى.