اتالعان 600 مەكتەپتە 200 مىڭنان استام وقۋشى ءبىلىم الادى, دەپ حابارلايدى Egemen.kz.
«مەملەكەت جىل سايىن مەكتەپتەردى مودەرنيزاتسيالاۋعا قاراجات ءبولىپ كەلەدى. مەملەكەت باسشىسىنىڭ تاپسىرماسىمەن جىل سوڭىنا دەيىن شاعىن قالالاردا, اۋدان ورتالىقتارىندا جانە اۋىلداردا ورنالاسقان 1000 مەكتەپتى نەگىزگى جەتى باعىت بويىنشا مودەرنيزاتسيالاۋ جۇرگىزىلىپ جاتىر. ونىڭ ىشىندە مەكتەپتەرگە اعىمداعى جانە كۇردەلى جوندەۋ جۇمىستارى جۇرگىزىلىپ, پاندىك كابينەتتەر ساتىپ الىنىپ, جيھازدارى, كىتاپحانالارى جاڭارتىلىپ, قاۋىپسىزدىك جاعدايلارى جاقسارتىلىپ جاتىر», دەپ اتاپ ءوتتى ينفراقۇرىلىمدى دامىتۋ دەپارتامەنتى ديرەكتورىنىڭ ورىنباسارى روزا سەمباەۆا.
وقۋ-اعارتۋ مينيسترلىگىنىڭ ءباسپاسوز قىزمەتى مالىمدەگەندەي, بيىل قىركۇيەكتەن باستاپ 1,7 ملن مەكتەپ وقۋشىسى ءۇشىن تەگىن تاماقتاندىرۋ ۇيىمداستىرىلعان. ساپالى تاماقتاندىرۋدى ۇيىمداستىرۋ ماقساتىندا مينيسترلىك 7 ءنورماتيۆتى-قۇقىقتىق اكتىنى قايتا قارادى. ونىڭ ىشىندە اس ءمازىرىن وڭىردە شىعارىلاتىن وتاندىق ءونىمدى قوسىپ ازىرلەۋ جونىندەگى نورما ەنگىزىلدى. براكەراجدى كوميسسيالار قۇرىلىپ, ونىڭ قۇرامىنا اتا-انالار, قوعام بەلسەندىلەرى, مەكتەپ اكىمشىلىگى, مەديتسينالىق قىزمەتكەرلەر كىردى. براكەراجدى كوميسسيالار ءۇشىن مونيتورينگتىك توپتاردىڭ قىزمەت ءتارتىبى تۋرالى نورمالار زاڭ جۇزىندە بەكىتىلدى.
ايتا كەتسەك, دەنساۋلىق ساقتاۋ مينيسترلىگىمەن بىرلەسە وتىرىپ, ءبىلىم بەرۋ ۇيىمدارىندا بالالاردى تاماقتاندىرۋ نورمالارى قايتا قارالىپ, جاڭا تاماقتاندىرۋ ستاندارتى ازىرلەندى. ول 2025 جىلى جۇزەگە اسىرىلادى.