قوستانايدا انەل بايمۇرزينا ەسىمدى جەدەل جاردەم فەلدشەرى شاقىرتۋ كەزىندە كەلەڭسىز وقيعاعا تاپ بولىپ, اۋرۋحانادان بىراق شىققان, دەپ حابارلايدى Egemen.kz.
فەلدشەردىڭ ايتۋىنشا, وقيعا تۇنگى اۋىسىمدا بولعان. جەدەل جاردەم قىزمەتكەرلەرىنە ەنتىگۋ مەن جۇرەككە بايلانىستى شاعىم ايتقان تۇرعىننان شاقىرتۋ تۇسكەن.
«ايتىلعان مەكەنجايعا كەلدىك. شاقىرتقان ادامدار ءبىزدى اگرەسسيۆتى تۇردە قارسى الدى. ءوز جۇمىسىمىزدى باستاپ, ناۋقاسقا العاشقى مەديتسينالىق كومەك كورسەتە باستادىق. بىراق ونىڭ قىزدارى بىزگە كەدەرگى جاساپ, ەگەر بىردەڭە ىستەسەك, ءبىزدى قارعايتىنىن, تۇرمەگە وتىرعىزاتىنىن ايتىپ, قوقان-لوقى كورسەتتى. كەيىن ناۋقاستىڭ تىنىس الۋى مەن جۇرەك سوعىسى توقتاپ قالدى, ءبىز رەانيماتسيالىق شارالار جۇرگىزە باستادىق. 30 مينۋت بويى تىرىستىق, الايدا رەانيماتسيالىق شارادان ناتيجە بولماعان. سول كەزدە ناۋقاستىڭ قايتىس بولعانىن ايتىپ, كوڭىل ايتتىق. ءدال سول ساتتە ولار ماعان شابۋىلداپ, تەپكىلەپ, شاشىمنان تارتىپ, ۇرا باستادى», دەدى زارداپ شەككەن فەلدشەر اlau.kz-كە.
جەدەل جاردەم جۇرگىزۋشىسى كورشى پاتەرگە جۇگىرىپ, پوليتسيا شاقىرۋدى وتىنگەن.
انەل بايمۇرزينانىڭ ايتۋىنشا, ونىڭ ميى شايقالىپ, سامايىندا گەماتوما پايدا بولعان. فەلدشەر اۋرۋحاناعا جاتقىزىلىپ, ارتىنشا پوليتسياعا شاعىم تۇسىرگەن.
«العاشقى مەديتسينالىق كومەك كورسەتۋ كەزىندە ءۇي يەلەرى مەن مەديتسينا قىزمەتكەرلەرى اراسىندا جانجال بولعانى انىقتالدى. جانجال بارىسىندا 41 جانە 51 جاستاعى ايەلدەر فەلدشەرگە دەنە جاراقاتىن سالعان», دەپ ءتۇسىندىردى وبلىستىق پد قىزمەتكەرلەرى.
قازىرگى ۋاقىتتا ءىس بويىنشا تەرگەۋ امالدارى جۇرگىزىلىپ جاتىر, سوت-مەديتسينالىق ساراپتاما تاعايىندالدى.