قالا اكىمى ەربولات دوساەۆ الماتى ورتالىق ازياداعى جەتەكشى تۋريستىك باعىت رەتىندە پوزيتسياسىن نىعايتىپ جاتقانىن مالىمدەدى, دەپ حابارلايدى Egemen.kz.
ەربولات دوساەۆ 2024 جىلدىڭ 9 ايىندا الماتىعا 1,7 ميلليون تۋريست كەلگەنىن, ونىڭ ىشىندە 507 مىڭى شەتەلدىك قوناق بولعانىن ايتتى.
«الماتىنىڭ وڭىرلىك تۋريستىك ورتالىق رەتىندە تانىلۋى جوعارى حالىقارالىق باعالارمەن راستالادى. ءبىزدىڭ قالامىز ەڭ جاقسى 5 شاڭعى باعىتىنىڭ قاتارىنا ەندى جانە ساياحاتتاۋعا ەڭ جاقسى 10 جەردىڭ ءبىرى رەتىندە اتالدى. 2024 جىلدىڭ قاراشاسىندا وتكەن Qatar Travel Mart 2024 حالىقارالىق كورمەسىندە الماتى 60 ەلدىڭ قاتىسۋشىلارى قالالارىنىڭ اراسىندا ەڭ ۇزدىك تۋريستىك باعىت مارتەبەسىن الدى», دەدى قالا اكىمى.
سونىمەن قاتار اكىم مەملەكەت باسشىسىنىڭ تاپسىرماسى بويىنشا جاڭا ينۆەستيتسيالىق تسيكل باستالعانىن اتاپ ءوتتى. قابىلدانعان شارالاردىڭ ارقاسىندا بۇگىندە الماتى ەلىمىزدىڭ شيكىزاتتىق ەمەس سەكتورعا ينۆەستيتسيا سالاتىن نەگىزگى ورتالىعى سانالادى.
«وسى جىلدىڭ 11 ايىندا الماتىنىڭ نەگىزگى كاپيتالىنا 1,5 تريلليون تەڭگە ينۆەستيتسيا تارتىلدى. ينۆەستيتسيالاردىڭ ەڭ ۇلكەن ءوسىمى وڭدەۋ ونەركاسىبىندە, ءبىلىم بەرۋدە, كولىكتە, دەنساۋلىق ساقتاۋدا, سۋمەن جابدىقتاۋدا جانە كاناليزاتسيادا بايقالادى. بۇل ەكونوميكانىڭ باسىم سەكتورلارىن دامىتۋعا ارنالعان ينۆەستيتسيالار قۇرىلىمىنداعى ساپالىق وزگەرىستى راستايدى», دەدى ەربولات دوساەۆ.
ونىڭ ايتۋىنشا, جالپى قالا ەكونوميكاسىنا 2024 جىلى 2 تريلليون تەڭگە, 2025 جىلى 300 ميلليارد تەڭگەگە وسۋمەن 2,3 تريلليون تەڭگە تارتۋ جوسپارلانعان.
ەستەرىڭىزگە سالا كەتەيىك, بيىل الماتى The New York Times گازەتىنىڭ نۇسقاسى بويىنشا «بارۋعا تۇرارلىق 52 جەر» تىزىمىنە ەندى. Condé Nast Traveller Italia جۋرنالى قازاقستاندى الەمدەگى توپ 5 شاڭعى تەبۋگە ارنالعان باعىتتاردىڭ قاتارىنا قوستى.