ەلىمىزدىڭ عالىمدارى مەن ينجەنەرلەرىنەن قۇرالعان توپ كادر دايارلاۋداعى ينتەگراتسيالىق ۇدەرىستى زەردەلەۋ ءۇشىن وڭتۇستىك كورەيادا بولدى. ماماندار العاشقى ساپارىندا كورەيلەردىڭ ماشينا, اۆتوموبيل جاساۋ بويىنشا كاسىپتىك وقىتۋدى قالاي ۇيىمداستىراتىنىن كورىپ قايتتى. ال ەكىنشى ساپار قۇرامىندا تەمىرتاۋ, رۋدنىي قالالارىنىڭ يندۋستريالىق ۋنيۆەرسيتەتتەرى مەن وسكەمەن قالاسىنداعى د.سەرىكباەۆ اتىنداعى شقتۋ وكىلدەرى, سونداي-اق «ERG» جانە «Qarmet» قىزمەتكەرلەرى بار دەلەگاتسيا مەتاللۋرگيا سالاسىنداعى وزىق تاجىريبەمەن تانىستى, دەپ جازادى Egemen.kz.
وڭتۇستىك كورەيامەن تاجىريبە الماسۋداعى ىقپالداستىق
ءىسساپاردى كورنەكتى عالىم قانىش ساتباەۆتىڭ تۋعانىنا 125 جىل تولۋىنا وراي ءارى ەلىمىزدىڭ جاھاندىق باسەكەگە قابىلەتتىلىگىن قامتاماسىز ەتۋ جانە حالىقارالىق سەرىكتەستىكتى دامىتۋ ماقساتىندا «Allur» جوعارى ينجەنەرلىك مەكتەبى (جيم) ۇيىمداستىردى. وتاندىق ينجەنەر-عالىمدار وڭتۇستىك كورەيانىڭ جەتەكشى عىلىمي مەكەمەلەرى مەن وندىرىستىك كاسىپورىندارىندا, اتاپ ايتقاندا, Dong-Eui University, Kyunsung University, Pukyong National University, SUDo High school, Hyundai Steel, Korron, Doosan مەن Kia Hwasung-تە بولدى.
«Allur» وسىنداي ءىسساپارلار شەتەلدەردەگى وزىق تاجىريبەنى زەردەلەۋگە, ولاردى ەلىمىزگە اكەلىپ, بەيىمدەۋگە مۇمكىندىك بەرەتىنىنە سەنىمدى. مىسالى, ءا.ساعىنوۆ اتىنداعى قاراعاندى پوليتەحنيكالىق, د.سەرىكباەۆ اتىنداعى شىعىس قازاقستان تەحنيكالىق, قاراعاندى يندۋستريالىق ۋنيۆەرسيتەتتەرىمەن, رۋدنىي يندۋستريالىق ۋنيۆەرسيتەتى جانە ا.بايتۇرسىنوۆ اتىنداعى قوستاناي وڭىرلىك ۋنيۆەرسيتەتىمەن ىنتىماقتاسا وتىرىپ, مەملەكەت باسشىسىنىڭ ستراتەگياسىنا, جاھاندىق سىن-قاتەرگە سايكەس ءبىلىم باعدارلامالارىن جاڭعىرتۋدى قولعا الدى جانە دە عىلىم جانە جوعارى ءبىلىم ءمينيسترى س.نۋربەك مىرزانىڭ تاپسىرماسىنا ساي, دۇنيە جۇزىندە وزىقتى جوعارى وقۋ ورىندارىنىڭ تاجىريبەسىنە سۇيەنە وتىرىپ, قازاقستانداعى شەتەل ۋنيۆەرسيتەتتەرىمەن بىرلەسە وتىرىپ, جاڭا باعىتتار بويىنشا يننوۆاتسيالىق ءبىلىم بەرۋ جولدارىن قاراستىرادى. سونىمەن قاتار قازاقستاندا فينليانديانىڭ XAMK قولدانبالى عىلىمدار ۋنيۆەرسيتەتى مىسالىندا ءوندىرىس قاجەتتىلىگىن ەسكەرە وتىرىپ عىلىمدى دامىتۋ جانە «ينجەنەر-عالىم», «ينجەنەر-كاسىپكەر» جاڭا ماماندىقتاردى قالىپتاستىرۋ مودەلى ازىرلەندى.
«ەلگە ورالعاننان كەيىن ينجەنەر-تەحنيك كادرلاردى دايارلاۋعا باعىتتالعان وڭتۇستىك كورەيالىق تاجىريبەنى وتاندىق وندىرىسكە ەنگىزۋ باعىتىندا كەشەندى ءىس-شارالار جوسپارىن ازىرلەمەكشىمىز. ءبىرىنشى كەزەڭدە الدىڭعى قاتارلى شەتەلدىڭ تاجىريبەلەرىن بەيىمدەيتىن جۇمىس توبى قۇرىلادى. كەلەسى كەزەكتە ءبىلىم باعدارلامالارىن, ونىڭ ىشىندە وزەكتى تاقىرىپتار بويىنشا كۋرستار ازىرلەۋدى جوسپارلاپ وتىرمىز. مىسالى, ونەركاسىپتى اۆتوماتتاندىرۋ, تسيفرلاندىرۋ جانە مەتاللۋرگياداعى «جاسىل» تەحنولوگيالار. سونداي-اق دۋالدى وقىتۋ بارىسىندا وندىرىستىك كاسىپورىنداردا پراكتيكادان ءوتۋدى مىندەتتەۋ, مامانداردى قايتا دايارلاۋ باعدارلامالارىن دا قامتيتىن بولامىز. تەحنولوگيالار كۇننەن كۇنگە وزگەرىپ, جاڭارىپ جاتىر. سوعان سايكەس كادرلارىمىز دا جاڭاشىلدىقتى تەز قابىلداپ, جىلدام مەڭگەرۋى كەرەك», دەپ اتاپ ءوتتى جيم باسشىسى ءسانيا يمەنتاەۆا.
ينجەنەرلىك ماماندىقتاردى دارىپتەۋ, ءبىلىم ينفراقۇرىلىمىن دامىتۋ, مەملەكەتتىك جانە كورپوراتيۆتىك قولداۋ, سونداي-اق پروتسەستەردى مونيتورينگتەۋ جانە ۇزدىكسىز جەتىلدىرۋ دە جوسپارلانىپ وتىر.
ماشينا جاساۋ ماماندارىن دايارلاۋ
قانىش ساتباەۆتىڭ ەسىمى ەلىمىزدىڭ مەتاللۋرگيا, ماشينا جاساۋ مەن عىلىمىنىڭ قالىپتاسۋ كەزەڭىمەن تىعىز بايلانىستى. عۇمىرىن عىلىمعا ارناعان عالىمنىڭ ەلىمىزگە سىڭىرگەن ەڭبەگى بۇگىندە ادام كاپيتالىن قالىپتاستىرۋدا, ونەركاسىپكە يننوۆاتسيالاردى ەنگىزۋدە اسەرى مول. ق.ساتباەۆ مامان دايارلاۋدىڭ نەگىزىن قالاعان عىلىمي مەكتەپتەر قۇردى. ونىڭ باستامالارىنىڭ ارقاسىندا ەلىمىزدە ينجەنەر, مەحانيك, مەتاللۋرگتەردى دايارلاۋعا باعىتتالعان ۋنيۆەرسيتەتتەر, ينستيتۋتتار مەن زەرتحانالار پايدا بولدى.
«Allur» جوعارى ينجەنەرلىك مەكتەبى 2022 جىلى قوستانايداعى اۆتوموبيل زاۋىتىنىڭ بازاسىندا قۇرىلدى. باستى ماقساتى – زاماناۋي بىلىكتىلىككە يە ينجەنەرلەردىڭ جاڭا بۋىنىن دايارلاۋ. مەكتەپ لوكاليزاتسيا, يمپورتتى الماستىرۋ جانە يننوۆاتسيالىق تەحنولوگيالىق شەشىمدەردى ەنگىزۋ ماسەلەلەرىن شەشۋگە عىلىمي قوعامداستىقتى تارتادى.
«ەل پرەزيدەنتى وزىق تەحنولوگيالارمەن جۇمىس ىستەي الاتىن جانە يننوۆاتسيالىق شەشىمدەردى ەنگىزۋگە قابىلەتتى جوعارى بىلىكتى كادرلاردى قالىپتاستىرۋ ماڭىزدىلىعىن بىرنەشە رەت اتاپ وتكەن بولاتىن. جوعارى ينجەنەرلىك مەكتەپتىڭ ستراتەگياسى مەملەكەتتىك ساياساتتىڭ بارلىق نەگىزگى تەزيستەرىن قامتيدى. بۇل, اتاپ ايتقاندا, ءدۋالدى وقىتۋ ارقىلى تەوريا مەن پراكتيكانى بىرىكتىرۋ, ديپلومدىق جوبالاردى ناقتى وندىرىستىك مىندەتتەرمەن بايلانىستىرۋ, حالىقارالىق ارىپتەستىك ورناتۋ جانە جاس ماماندارعا قولداۋ كورسەتۋ. 2022 جىلى ينجەنەرلەردى دايارلاۋدىڭ ۇلتتىق مودەلى ىسكە قوسىلعاننان بەرى 300-دەن استام ستۋدەنت وسى باعدارلامامەن وقۋىن اياقتادى. بۇگىنگى تاڭدا تۇلەكتەر بىلىكتىلىگىن جوعارى دەڭگەيدە كورسەتىپ كەلەدى», دەدى جيم باسشىسى ءسانيا يمەنتاەۆا.
ادام كاپيتالىن دامىتۋداعى ءورشىل جوسپارلار
جيم ەلىمىزدە العاش رەت يندۋستريا 4.0 قاجەتتىلىگىنە سايكەس ادام كاپيتالىن قالىپتاستىرۋعا باعىتتالعان ستراتەگيانى جۇزەگە اسىرادى. باستى مىندەتتەردىڭ ءبىرى – دارىندى جاستاردى تارتاتىن ايماقتىق جوعارى وقۋ ورىندارى بازاسىندا ينجەنەرلىك كەڭىستىك قۇرۋ. سونىمەن قاتار «Allur» اۆتوكولىك كومپانياسىنىڭ جيم يندۋستريا سالاسىنا ينجەنەرلىك-تەحنيكالىق كادرلاردى دايارلاۋدىڭ ۇلتتىق ۇلگىسىن كورسەتەتىن باعدارلامالىق قۇجاتتىڭ تۇجىرىمداماسىن ازىرلەدى. ايگۇل احمەتوۆانىڭ ايتۋىنشا, وسى باستاما اياسىندا تسيفرلىق ەكونوميكانىڭ سىن-قاتەرىنە باعدارلانعان باعدارلامالاردى ازىرلەۋ جانە ىسكە اسىرۋ, تاجىريبە الماسۋ ءۇشىن يننوۆاتسيالىق الاڭدار ۇيىمداستىرۋ, زەرتتەۋ جانە ازىرلەمەلەرگە ينفراقۇرىلىم قۇرۋ, ونىڭ ىشىندە تسيفرلىق زەرتحانالار, روبوتتەحنيكا ورتالىعى مەن جاساندى ينتەللەكتىنى زەردەلەۋ پلاتفورمالارىن قۇرۋ جوسپارلانىپ وتىر.
ينجەنەرلىك كەڭىستىكتى قالىپتاستىرۋ بىرنەشە ماقساتقا قول جەتكىزەدى. بىرىنشىدەن, ونەركاسىپتىك كاسىپورىنداردى تسيفرلاندىرۋ مەن جاڭعىرتۋدى جەدەلدەتەدى. بۇل يننوۆاتسيالىق تەحنولوگيالاردى ەنگىزۋ ارقىلى ەكونوميكانىڭ باسەكەگە قابىلەتتىلىگىن ارتتىرۋعا ىقپال ەتەدى. ال, سايىپ كەلگەندە, جوعارى بىلىكتى مامانداردى دايارلاۋ ەلىمىزدىڭ تۇراقتى تەحنولوگيالىق دامۋىنا جاعداي جاسايدى.