وبلىس ورتالىعىندا ۇشەم دۇنيەگە كەلدى. وڭىردە ۇشەمدەردىڭ تۋى تۋرالى دەرەك سوڭعى ەكى جىلدا تىركەلمەپتى. اتا-اناسى سابيلەرىنە كارىم, ءامىر, تايىر دەگەن ەسىمدەر بەردى.
ۇشەمدەردىڭ اناسى زارينا مامبەتوۆا بۇعان دەيىن ءبىر قۇرساق كوتەرىپ, ەر بالاعا جارىق دۇنيە سىيلاعان. ەندى وتباسىن بىردەن ءۇش ۇل تولىقتىرىپ وتىر.
«العاشقى بولىپ تۋعان كارىمنىڭ سالماعى – 2020 گرامم, ودان سوڭ ءامىر (2200 گرامم), ەڭ سوڭىندا تايىر (1660 گرامم) دۇنيەگە كەلدى. اناسى ولاردى جۇكتىلىكتىڭ وتىز ءتورتىنشى اپتاسىندا بوسانعانىن ايتىپ وتكەن ابزال. قازىر اناسىنىڭ جاعدايى دا قالىپتى», دەپ مالىمدەدى وبلىستىق پەريناتالدىق ورتالىق وكىلى.
نارەستەلەردىڭ اناسى مەكتەپتە ۇستاز بولىپ قىزمەت اتقارسا, اكەسى مۇناي-حيميا زاۋىتىندا ەڭبەك ەتەدى.
– قازىر كارىم ەكەۋىمىز جاڭا تۋعان نارەستەلەردىڭ پاتولوگياسى بولىمشەسىندەمىز. كارىم قاجەتتى ەم قابىلداپ جاتىر, جاقىن ارادا اعالارىنىڭ قاتارىنا قوسىلادى. جۇبايىم ۇيدە سابيلەرىن اسىعا كۇتىپ وتىر. ءبىز نارەستەلەردى باعىپ-قاعۋ قيىندىعىنان قورىقپايمىز. بۇل ومىرىمىزدەگى ەڭ عاجايىپ كەزەڭنىڭ ءبىرى بولعالى تۇر. سوندىقتان بالالاردىڭ اكەسى جۇمىسىنان بالا كۇتىمى بويىنشا دەمالىس رەسىمدەۋدى جوسپارلاپ وتىر. وبلىستىق پەريناتالدىق ورتالىعىنىڭ ۇجىمىنا امان-ەسەن بوساندىرىپ العانى, ءۇش ۇلىمدى دا دۇنيەگە امان-ساۋ اكەلگەنى ءۇشىن شەكسىز ريزاشىلىعىمىزدى بىلدىرەمىز. مۇندا ءوز ءىسىنىڭ ماماندارى ەڭبەك ەتەدى, – دەيدى ۇشەمنىڭ اناسى.
پاۆلودار