جاڭا جىل مەرەكەسى جاقىنداعان تۇستا جەر-جەرلەردە پيروتەحنيكالىق ونىمدەردىڭ زاڭسىز ساۋداسى بەلەڭ الاتىنى بەلگىلى. تۇرعىندار قاۋىپسىزدىگىن ويلايتىن پوليتسەيلەر زاڭسىز دەرەكتەردىڭ الدىن الۋ ماقساتىندا پروفيلاكتيكالىق ءىس-شارالاردى باستاپ كەتتى.
پوليتسەيلەر دۇكەندەر, ساۋدا ۇيلەرى مەن پيروتەحنيكالىق ونىمدەردى ساتۋعا بولاتىن ورىندار بويىنشا رەيدتەر جۇرگىزىپ, رۇقسات بەرۋ قۇجاتتارىن تەكسەرىپ جاتىر. كاسىپكەرلەر مەن ساتۋشىلارعا ءونىمدى كامەلەتكە تولماعاندارعا ساتۋعا تىيىم سالىناتىنىن, جارىلىس قاۋپى بار بۇيىمداردى زاڭسىز وتكىزگەنى ءۇشىن جاۋاپكەرشىلىك بارىن ەسكەرتىپ كەلەدى.
ء«تارتىپ ساقشىلارى الەۋمەتتىك جەلىلەرگە مونيتورينگ جۇرگىزەدى. وندا كەيبىر ازاماتتار پيروتەحنيكالىق ونىمدەردى ونلاين ساتاتىنى انىقتالدى. پاۆلوداردا بايجانوۆ كوشەسىندە رۇقسات قۇجاتتارىنسىز پيروتەحنيكالىق بۇيىمداردى ساتۋ دەرەگى انىقتالدى. ساتۋشىدان 45 جاعۋ زاتى بار 4 قوراپ تاركىلەندى. تاۋارلاردى زاڭسىز ساتقانى ءۇشىن ساتۋشى قىزمەتكەر جاۋاپقا تارتىلىپ, 25 ايلىق ەسەپتىك كورسەتكىش مولشەرىندە ايىپپۇل سالىندى», دەپ حابارلادى پاۆلودار وبلىسى پوليتسيا دەپارتامەنتىنىڭ ءباسپاسوز قىزمەتىنەن.
پوليتسەيلەر وتشاشۋلاردى ساتىپ الۋ كەزىندە ساتۋشىدان ءونىم سەرتيفيكاتىن تالاپ ەتۋ كەرەكتىگىن ەسكەرتەدى. پيروتەحنيكالىق ونىمدەردىڭ سىرتىندا نەمەسە قورابىندا پايدالانۋ نۇسقاۋلىعى مىندەتتى تۇردە بولۋى كەرەك. ەگەر ءونىمنىڭ جارامدىلىق مەرزىمى ءوتىپ كەتسە, ونى پايدالانباعان ابزال. بۇعان قوسا پيروتەحنيكالىق بۇيىمداردى قالتادا الىپ جۇرۋگە, بولشەكتەۋگە, ۇيكەلەۋگە جانە ىستىق جەردە كەپتىرۋگە بولمايدى. اتا-انالار وت-شاشۋدى بالالارىنىڭ باقىلاۋسىز پايدالانۋىنا تىيىم سالۋى قاجەت.
پيروتەحنيكانى دۇرىس قولدانباۋدىڭ سالدارىنان كوپتەگەن ادام زارداپ شەگىپ جاتادى. سوڭى ورتكە ۇلاسپاس ءۇشىن تۇرعىندار قانداي قاۋىپسىزدىك ەرەجەلەرىن ساقتاۋ كەرەك ەكەنىن دە ەسكەركەن ءجون.
«الدىمەن وتشاشۋ ورنىن تاڭداۋ قاجەت. تاڭدالعان ورىننان 50 مەتر قاشىقتىقتاعى راديۋستا عيماراتتار جانە باسقا دا قۇرىلىستار بولماۋى كەرەك. وتشاشۋ نۇسقاۋلىققا سايكەس مىقتى جەرگە ورناتىلۋعا ءتيىس. ادامدار مىندەتتى تۇردە وتشاشۋ الاڭىنان 15-20 مەتر قاشىقتىقتا, جەل جاعىندا تۇرۋ قاجەت. فەيەرۆەركتەردى عيمارات ىشىندە, اسىرەسە ادامدار بولعان كەزدە پايدالانۋعا تىيىم سالىنادى. وتشاشۋدى قاتتى جەل بولعان جاعدايدا تۇتاتپاعان ءجون. ول قاۋىپتى 3-4 ەسە ارتتىرادى. پيروتەحنيكالىق بۇيىمداردى اعاشتاردىڭ, ەلەكتر جەلىلەرىنىڭ استىندا جانە تەز تۇتاناتىن زاتتاردىڭ جانىندا اتۋعا بولمايدى. ەگەر وتشاشۋ جانباي قالسا, 10 مينۋت كولەمىندە وعان جاقىنداماڭىز», دەپ ەسكەرتەدى ماماندار.
ايتىپ ءوتۋ كەرەك, سەرتيفيكاتتالماعان پيروتەحنيكالىق بۇيىمداردىڭ, سونداي-اق رۇقسات قۇجاتتارى جوق زاڭسىز ساۋدا ءۇشىن اكىمشىلىك قۇقىق بۇزۋشىلىق تۋرالى كودەكستىڭ 196-بابى بويىنشا اكىمشىلىك جاۋاپكەرشىلىك كوزدەلگەن. ال ءورت قاۋىپسىزدىگىن ساقتاماعان ازاماتتار اتالعان كودەكستىڭ 410-بابى بويىنشا اكىمشىلىك جاۋاپكەرشىلىككە جانە قىلمىستىق كودەكستىڭ, 204, 292-باپتارى بويىنشا قىلمىستىق جاۋاپتىلىققا تارتىلاتىنىن ۇمىتپاعانى ءجون.
پاۆلودار وبلىسى