«ەگەمەن» ەلگە جەتكەنشە...

اتتانۋ

ءيا, ءسىزدىڭ قولىڭىزعا دايىن ءونىم بارادى. جالپاق تىلمەن ايتقاندا, قانت­تاي قاتتامانى بۋىن بۇرقىراتىپ قويىپ, پاراقتاي جونەلەسىز. كوز توقتاتىپ, وقىپ قويىپ وي جىبەرەسىز كەي تۇسىنا. ءيسىن ايتساڭىزشى گازەتتىڭ. ال مىنا جاقتا ­(رەداكتسيادا) سول ءونىم سىزگە جەتكەنگە دەيىنگى «الاتوپاننان» بەيحابارسىز, مۇم­كىن ەستىگەن دە شىعارسىز.

جۋرناليست دەگەن جاۋىنگەر حالىقتىڭ ءبىر قاسيەتى – جىلدامدىعىندا. ۋاقىتپەن جارىسادى, كەيدە كورەگەن ماقالالارى ارقىلى الدىنا ءتۇسىپ كەتۋى مۇمكىن ۋاقىت­تىڭ. ونىڭ ۇستىنە جارىقتىڭ جىل­دامدىعىنداي ۇشىرتىپ اقپارات تاراتاتىن سايتتار شىققالى جاۋاپكەرشىلىك ەكى ەسە ارتتى. سويتسە دە بولعان وقيعانى «قانى» تامىپ تۇرعاندا سۋىتپاي جازىپ, گازەت بەتىنە بۋىن بۇرقىراتىپ باسا قويعانعا نە جەتسىن؟ جالاڭ اقپارات قانا ەمەس, ءماتىن اراسىندا مامان پىكىرى مەن ۋاقىتتىڭ ءۇنى قوسا جۇرسە ولجا ەمەي نە؟ الايدا مۇنىڭ ءبارى ايتقانعا عانا وڭاي.

ەسىگىڭىزدەن «ەگەمەن» كىرسە, ونىمەن بىرگە ۇشان-تەڭىز ەڭبەك قوسا ەندى دەي بەرىڭىز. تاڭ اتىسىمەن جانتالاس باستالادى تىلشىلەر ءۇشىن. تاڭەرتەڭگى ساعات توعىز-ونداردا رەداكتسياداعى باسشىلىق قۇرام بۇگىن باسىلىپ, ەرتەڭ شىقپاق ءنومىردى جوسپارلاۋعا باس قوسادى. بۇل ۋاقىتتا كەي ءتىلشى كەشە بەرىلگەن تاپسىرما بويىنشا, قالانىڭ ءبىر تۇكپىرىندە نەمەسە ايماقتاعى مەنشىكتى ءتىلشى سوناۋ شالعايداعى ءبىر اۋدانداعى ءىس-شارانىڭ ورتاسىندا ءجۇرۋى مۇمكىن. تۇسكە دەيىن ماتەريال ازىرلەپ جىبەرۋى ءۇشىن. «قازاق گازەتتەرى» جشس باس ديرەكتورى ديحان قامزابەك ۇلى­نىڭ ورىنباسارى قامبار احمەتتىڭ كابينە­تىن­دەگى جوسپارلاۋدا باس رەداكتور عابيت مۇسىرەپ پەن ورىنباسارلارى, جاۋاپتى حاتشى كەشەگى مەن بۇگىنگىنى باعدارلاپ, نومىرگە باراتىن وزەكتى تاقىرىپتاردى سارالايدى, ولاردىڭ نازارىنان قوعام ءومىرى تىس قالمايدى. وندايدا باس رەداكتوردىڭ شىعارماشىلىق ۇجىمنىڭ كۇش-قۋاتىن باعىتتاۋداعى تالعام-تارازىسى العا وزادى. كۇللى عۇمىرىن قازاق باسپاسوزى­نە ارناعان عابيت اعانىڭ بىلىكتىلىگى مەن تاجىريبەسى قامشى سالدىرماسىن ايتىپ جاتپايمىز. «ەگەمەندى» ەكپىندەتىپ كەلە جاتقان ناعىز ءداستۇرلى جۋرناليستيكانىڭ مايتالمانى ۇتىمدى تۇسىن تاۋىپ, قيۋى كەتىپ تۇرعاندى قيىستىرا بىلەدى.قورجىندا قانداي ماقالا جاتىر, كەشەدەن نە قالىپ قويدى, بۇگىن قانداي دۇنيە وتپەكشى, ەرتەڭگى ءىس-شاراعا كىمدى بەكىتكەن ءجون دەگەن سياقتى ساۋالدار باعدارلانادى. ازاندا بەكىگەن باعدار كەي جاعدايدا تۇپكىلىكتى بولا بەرمەيدى بىراق. ەندى كىرىسە بەرگەندە, اقوردا ياكي مينيسترلىكتە اياق استىنان بەيرەسمي جيىن ءوتىپ قالۋى مۇمكىن نەمەسە ۇلت ىسىنە قاتىستى وتىرىس دەلىك. مۇندايدا ساياسات ءبولىمىنىڭ ءبىر ءتىلشىسى بەس قارۋىن سايلاپ, تۇرا شابۋى كادىك. بولماسا بۇلاردان بولەك قوعامدىق سيپاتتاعى قاربالاس قىلاڭ ۇرسا, تاڭعالماڭىز. وقيعا تۇسكە دەيىن بەلگىلى بولسا جاقسى عوي. تۇستەن كەيىن تابان استىندا سوپاڭ ەتىپ شىعا كەلسە, كۇنى بويعى جوسپارلانعان ماكەتتىڭ كۇل-تالقانى شىعادى. جاسالا باستاعان, الدە جاسالىپ قويعان بەت بۇزىلادى. كەزەك كۇتتىرمەس ماڭىزدى ۋاقيعانىڭ بايانى ءتۇسۋى كەرەك گازەت بەتىنە. وعان قاتىسىپ كەلگەن ءتىلشى قازىر شايىمدى ءىشىپ الايىن دەپ سوراپتاپ وتىرمايدى. بارىپ كوردى مە, تەز ارادا نومىرگە ازىرلەۋ كەرەك ماتەريالدى. ماقالا بۇگىن سالىنا ما, جوق ەرتەڭگە قالا ما, وندا جۇمىسى شامالى. دەر كە­زىندە ازىرلەنۋگە ءتيىس. سەبەبى الدا باسقا دۇنيە كۇتىپ تۇرۋى بەك مۇمكىن. تاعى دا شاپقىلاپ كەتۋى كادىك نەمەسە بۇرىننان دايىنداپ جۇرگەن سۇحبات كەيىپكەرىنە الدە جازىپ جاتقان ساراپتاماسىنا مامان پىكىرىن الۋ كەرەك دەگەندەي. ءتىپتى ولاي بولماعان جاعدايدا ازىرلەمەك تاقىرىبىن كوزبەن كورىپ, قولمەن ۇستاۋ ءۇشىن بەلگىلى ءبىر جەرگە بارۋى كەرەك قوي. كەز كەلگەن ۋاقىتتا بارىپ سۇحبات الا سالۋ, ايتپەسە ماماننان ساۋالعا جاۋاپ بەرۋىن تالاپ ەتۋ جوق. الدىن الا كەلىسىلەدى. ول كىسى كە­لىسكەن سوڭ وي قورىتىپ بارىپ, ۋاقى­تىن بەلگىلەيدى. جۇرتتىڭ ءبارى قاربالاس ۋاقىتتا ءومىر ءسۇرىپ جاتقاندىقتان, جۇ­مىس كەستەسى سايكەسە بەرمەۋى – قالىپتى جايت. سوندىقتان ءجۋرناليستىڭ كورىپ-بىلگەنىن قاعازعا ءتۇسىرۋى ءىستىڭ ءبىر جاعى عانا, قانشا ءبىلىپ تۇرسا دا, كاسىبي مامان پىكىرىنە سۇيەنىپ, سپيكەر تاپپايىنشا ءارى تاعى ءبىر تاراپ كوزقاراسىن المايىنشا ماقالا پىسپەيدى.

وت جاعۋ

تاڭەرتەڭ ساعات وندا باستالعان كەڭەس نە جيىن ون ءبىر جارىمدا اياقتالىسىمەن ءبىر ساعاتتا كابينەتىنە كەلىپ, ەندى وسىنداي ۋاقىتتا جازىپ بىتىرگەنىمەن, ول ماتەريال گازەت بەتىنە بىردەن تۇسە سالمايدى. اۋەلى ءبولىم مەڭگەرۋشىنىڭ سۇزگىسىنەن وتەدى. ول ءبىر وقىپ, قابىلەتىنشە قاتەسىنەن ارىلتىپ, باس رەداكتوردىڭ ورىنباسارىنا اپارادى. «قىلشىقتادى, شايقادى, تۇزىن تاتىپ بايقادى» دەۋشى ەدى مالتا ەزىپ, ماي شايقاعان قازاق. تاپ سولاي ءبىر شايقاۋى كەم بولسا, باس رەداكتور ورىنباسارى كەم-كەتىگىن تۇزەپ, جەتىلدىرەدى. قاتەسىن شىعارىپ, قانارىن قامپيتا­دى. ءتىلشى جىبەرگەن ولقىلىقتى, ءبولىم باسشىسى بايقاماعان اتەگەن-ايلاردى تولىقتىرۋعا ءتيىس وسى ورىنباسارلار. «جامان رەداكتور كۇزەيدى, جاقسى رەداكتور تۇزەيدى» دەگەن قاناتتى ءسوز بار. ماقالا مەيمىلدەپ ارناسىنا تولىپ تۇر­عانىمەن, تاقىرىبى كەلىسپەي قالسا, وقىرمان نازار اۋدارا بەرمەيدى. ءبىر قاراپ ءوتىپ كەتەدى. كۇنى بويعى نەمەسە اپتا بويى ىزدەنگەن ەڭبەك دالاعا كەتتى دەگەن ءسوز. رەداكتوردىڭ ورىنباسارى «قىلشىقتايدى, شايقايدى, تۇزىن تاتىپ بايقايدى» دەگەنىم سول. بۇل جاعى­نان كەلگەندە, باس رەداكتوردىڭ مادەنيەت جانە ادەبيەت, ءبىلىم جانە عىلىم بولىمدەرى بويىنشا ورىنباسارى, بەلگىلى جۋرناليست تالعات باتىرحاننىڭ بىلىگى مەن تاجىريبەسىن ايتپاي كەتۋگە بولمايدى. ءبولىم باسشىسىنىڭ ەلەگىنەن وتكەن ماتەريالدىڭ تۇزەتۋىن ەنگىزىپ اپارساڭ, «جارايدى, تاستاي سال» دەپ الىپ قالادى دا, دوعال تۇسىن ۇشتاپ, قوپال تۇسىن ادىپتەپ, تىستاپ جىبەرەدى. تۇتىعىپ تۇرعان تاقىرىبىڭ دا سايراپ شىعا كەلەدى.

قاتتالۋ

سويتكەن دۇنيە جاۋاپتى حاتشى امانگەلدى قياس باستاعان سەكرەتاريات قازاندىعىنا تۇسەدى. مۇنى تاڭەرتەڭ جوس­پارلانعان بەتكە سالىپ, ادىپتەپ ورنالاستىرۋ – بەت قاتتاۋ ءبولىمىنىڭ جە­تەكشىسى قونىسباي شەجىمباي باستاعان قاتتاۋشىلاردىڭ تابانداعان ەڭبەگى. قوتاننان قۋالاپ ءجۇرىپ قويدى ۇستاپ, سۋ­عا توعىتىپ, قول-اياعىن بۋىپ, كۇيىپ-ءپىسىپ وتىرىپ قىرقىپ, قايىرا قوتانعا كىرگى­زىپ جىبەرگەندەي جۇمىس بۇل دا. سوندىقتان ول كىسىلەردىڭ ەڭبەگى دە ءجۋرناليستىڭ ىزدەنىپ ءجۇرىپ ساراپتامالىق ماقالا جازعانىنان كەم تۇسپەيدى. ماتەريالدى قالاي بولسىن سولاي تاستاي سالمايدى گازەت بەتىنە. ەلەكتروندى نۇسقا كەلىپ, جۇمىس كومپيۋتەردە ىستەلەدى دەگەنىمىزبەن, ماشاقاتى جەتىپ ارتىلادى. مازمۇنىنا وراي سۋرەتتەرمەن ارلەپ, كەلىستىرىپ كيىندىرەدى جالاڭاش ءماتىندى. كەيدە گازەتتىڭ وقىلۋىن ارتتىرۋ ءۇشىن پوەتيكالىق دۇنيەلەر جاريالانادى. ولاردىڭ مازمۇنىن اشاتىن فوتو تابىلا بەرمەيدى. مادەنيەت جانە ادەبيەت ءبولىمىنىڭ تىلشىلەرى جازعان شەڭبەرگە سىيا بەرمەيتىن تاقىرىپتارعا كوللاج جاساۋعا تۋرا كەلەدى. بەتتەۋشى-ديزاينەرلەر بولماسا, «قۇرعاق قاسىق اۋىز جىرتادى» دەگەندەي, جالاڭاش ءماتىن دە جار ۇرادى...

باق تابۋ

قوعامدىق-ساياسي گازەت سانالعانى­مەن, «Egemen Qazaqstan» وقىرمان تالابىن قاناعاتتاندىرۋ ماقساتىندا ەپ­تەگەن ارقاسى بار ماقالالارعا ورىن بەرمەي قالمايدى. سىقيعان ساياسي رەپورتاجدار مەن ەدىرەيگەن ەكونوميكا­لىق, اۋپىرىمدەگەن الەۋمەتتىك بەتتەردىڭ اراسىنان ۇلت سانا-سەزىمى مەن ادامزات ىزگىلىگىن ارقاۋ ەتكەن رۋحاني دۇنيەلەردىڭ ءيسى شىقپاسا, باس باسىلىم اتىنا سىن ەمەس پە؟ گازەت باسشىلىعى مۇنى ءبىرىن­شى كەزەكتە ەسكەرەدى. «اتان ولسە سويىلار, اتاڭ ولسە قويىلار, قازاقتىعىڭ ولمەسىن» دەگەندەي, رەسمي, اعىمدىق دۇنيە­لەرمەن قاتار, ۇلت پەن رۋحتىڭ ءسوزى سوي­لەنبەي قالماق ەمەس. تالعات باتىرحان جەتەكشىلىك ەتەتىن بولىمدەردە جۋرناليست-جازۋشى جولدىباي بازار, اقىن ءارى اۋدارماشى, قازاق تاريحىن امەريكا كىتاپحانالارىنان ىزدەستىرۋشى اعىل­شىن ءتىلىنىڭ بىلگىرى دۇيسەنالى الىماقىن, كۇندىز-ءتۇنى كىتاپ كەمىرۋدەن جالىقپايتىن اقىن باتىرحان سارسەنحان, ءتىپتى ساياسات ءبولىمىنىڭ وزىندە رەسپۋبليكاعا تانىمال جازۋشى قانات ابىلقايىر, ەكونوميكا جانە ءوندىرىس ءبولىمىن بەلگىلى جاس پرو­زايك, دەتەكتيۆ جازۋشى اباي ايماعانبەت­تىڭ تىزگىندەۋى, الەۋمەت جانە سپورت بولى­مىن­دە ەكى-ءۇش پروزالىق جيناقتىڭ اۆتورى, ­جازۋشى باقىتبەك قادىردىڭ ءتىلشى بو­­­لۋى تەگىن دەيسىز بە؟ بۇل – بۇگىن عانا قالىپ­­تاس­قان ءۇردىس ەمەس. ەل گازەتى «ەگەمەن» بول­­ماي تۇرىپ بوساعاسىنا بىتكەن قاسيەت دەۋ­­گە دە كەلەدى. سەبەبى و باستا «ۇشقىن», «ەڭبەك تۋى» كەزىندە گازەتتە بەيىمبەت ماي­لين, ساكەن سەيفۋلليندەر شىعارۋشى رەداك­تور بولعانىن بىلەمىز. الاش ارىسى سماعۇل سادۋاقاس ۇلىنىڭ باسشىلىق ەتكەنى بار, تاۋەلسىزدىك تۇسىندا مۇنداي جاقسى ۇردىسكە جان بەرگەن بىردەن-ءبىر رەداكتور شەرحان مۇرتازا ەكەنى قازىر تاريحقا اينالىپ ۇلگەردى. كەيىن وسى يگى باستامانى دارحان قىدىرالى جاڭعىرتتى. بەلگىلى اقىندار ەرلان ءجۇنىس, ميراس اسان سىندى, تاعى باسقا تالانتتاردى توپتاستىردى. قازىردە كەندە ەمەس ۇجىم. وسىنداعى اقىن-جازۋشىلاردى تۇگەندەپ جىبەرسە, جازۋشىلار وداعىنىڭ ءبىر ءبولىمى بولىپ شىعا كەلەدى. بەلگىلى ەتنوگراف بەكەن قايرات ۇلىنىڭ ءوزى نەگە تۇرادى؟

حات باعۋ

تۇستەن كەيىن ءبىر مارتە گازەت بەتتەرى­نىڭ اۋەلگى نۇسقاسى ءۇش-ءتورت تيراجبەن شىعادى. باس ديرەكتور مەن باس رەداكتور جانە ورىنباسارىنا, كەزەكشى رەداكتور­عا جانە كوررەكتورلارعا جونەلتىلەدى. ءبولىم مەڭگەرۋشىسى مەن باس رەداكتور ورىن­باسارى سۇزگىدەن وتكىزگەن ءىرىلى-ۋاقتى ماتە­ريالداردىڭ ۇستىنەن ەندى اتالعان باسشىلار قاراپ, كوررەكتورلار ارىپتىك قاتەسىن شىعارادى.

گازەتتىڭ قاتەسىز شىعۋى, ساۋاتتىلىعى كوررەكتورلاردىڭ كاسىبي شەبەرلىگىنە بايلانىستى عوي. ەلدەگى باسقا باسىلىمدار «ەگەمەننىڭ» ءسوز قولدانىسىمەن, ساۋاتتىلىعىنان ونەگە الىپ جاتسا, وندا ەگەمەندىك كوررەكتورلاردىڭ ەڭبەگى­نىڭ ارقاسى. بۇل ۋاقىتتا تىلشىلەر ماتەريالىن وتكىزىپ تاستاپ دەمالادى دەگەن ءسوز ەمەس. ەرتەڭگى شىعاتىن گازەت بەتىنە اقپا­راتتار جيناپ, الداعى جوسپارلى ساراپتامالارى مەن جىلىكتى ماقالالارىنىڭ قامىمەن جۇرەدى. الدەبىر ءىس-شاراعا, سۇحبات الۋعا, ءتىپتى كەشكى ساعات 18:00-دەن بىلاي تەاترداعى قويىلىمعا, تاعى باسقا ماڭىزدى شارالارعا كەتۋى مۇمكىن. تىلشىلىك قىزمەت تاڭعى ساعات 9.00-دەن كەشكى ساعات 18:00-ءدىڭ اراسىندا كابينەتتە وتىرىپ كەتەتىن بىركەلكى جۇمىس ەمەس. قۇرىعاندا رەداكتسياعا تۇسكەن اۆتور­لاردىڭ ماتەريالدارىن قورىتىپ, گازەتتىڭ ءتىل-ستيلىنە يكەمدەۋمەن, ادەبي نورماعا سايكەستەندىرۋمەن بولادى. حات قورىتۋ – رەداكتسيانىڭ تابانداپ ىستەي­تىن قارا جۇمىسى. ادەبي نورماعا مۇلدە سايكەسپەسە دە, گازەت بەتىنە سالىنۋعا ءتيىس سۇيەگى مىقتى جازبالاردىڭ كەيبىرىن تىل­شىلەر وڭدەپ, قىرناپ-جونىپ جازىپ شى­عاتىن كەزدەر دە از ەمەس. بۇل – ىزدەنىپ تاپ­قان, اياعىمەن بارىپ, زەرتتەپ جازعان ما­قالالارىنىڭ سىرتىنداعى ەسىل ەڭبەك. ونىڭ ۇستىنە «ەگەمەن» اپتاسىنا بەس مار­تە 16 نە 24 بەتتەن كۇن سايىن شىعاتىن ­جال­عىز باسىلىم ەكەنىن ەسكەرگەن ءجون.

ءيا, تىلشىلەر تۇستەن كەيىن حات قورىت­سىن, ءتىنتىنىپ شىعارماشىلىعىمەن كەت­سىن, ءدال وسى تۇستا گازەت باسشىلارى مەن قاتتاۋشى, ديزاينەرلەر تاپجىلماي وتى­­رىپ بەتتەردىڭ اۋەلگى نۇسقاسىن قايتا-قاي­تا قاراپ, كەمشىلىكتەرىن جەتىلدىرۋمەن كەمى كەشكى ساعات 8–9-عا دەيىن تىنىم تاپپايدى. دۇنيەدە وي ەڭبەگى ازابىنىڭ ءدامىن تاتقاندار عانا سەزىنەر بەينەت بۇلار. ال كەشكىسىن قۇزىرلى ورىنداردا شۇعىل ءىس-شارا تۋىنداپ جاتسا, شەتەلدە ءىسساپاردا جۇرگەن پرەزيدەنت حابارىن گازەتكە سالۋ كەرەك بولسا, ۇجىم كورەر تاڭدى جۇمىستا اتىرادى. سەبەبى بۇگىنشە قويا تۇرايىق, ەرتەڭ دە كۇن بار عوي دەيتىن ەمەس, گازەت تۇندە باسىلىپ, تاڭەرتەڭ ەلدىڭ قولىنا ءتيۋى كەرەك. وسى ورايدا ورىنبەك وتەمۇرات جەتەكشىلىك ەتىپ وتىرعان ساياسات ءبولىمىنىڭ تاباندى ەڭبەگىن اتاپ وتكەن ءجون. اراسىندا اقش-تا «بولاشاق» باعدارلاماسىمەن وقىپ كەلگەن گۇلنار جولجاننىڭ شەتەلدىك گازەتتەرگە شولۋى, ونداعى تالدامالىق ماتەريالداردى اۋدارىپ بەرەتىنى ءوز الدىنا بولەك اڭگىمە. باس رەداكتوردىڭ ءۇش ورىنباسارىنىڭ ارقايسى ەكى بولىمگە جاۋاپتانسا, جالعىز-اق بانۋ ءادىلجان ساياسات بولىمىنە جەتەكشىلىك ەتەتىنى – جۇمىس سالماعىن بەزبەندەيدى. 

اقتارۋ

گازەتتىڭ ەكونوميكا جانە ءوندىرىس, الەۋمەت جانە سپورت بولىمدەرىن ۇيلەس­تىرۋ­شى, باس رەداكتوردىڭ ورىنباسارى قۋات اۋەسباي – بۇعان دەيىن بىرنەشە رەسپۋبليكالىق گازەتتى باسقارىپ كەلگەن بىلىكتى مامان. ەلدەگى تولعاقتى تاقى­رىپتاردىڭ دەنى وسى بولىمدەرگە تيە­سىلى. الەۋمەتتىك سالا, تۇرمىستىق احۋال, دەنساۋلىق – حالىقتىڭ نەگىزگى تىرشىلىگى­نىڭ باستى قۋات كوزى. اتالعان ءبولىمدى مەڭگە­رىپ وتىرعان جومارت وسپان مەن سۇر­مەر­گەن تىلشىلەرىنىڭ ماتەريالدارى ال­دىڭ­عى ­بەتتەن تۇسپەيتىنىن ايتسا دا جەتكىلىكتى شىعار.

انىعىندا, گازەت ولۋگە اينالدى دەگەندەر وڭباي قاتەلەسەدى. تىرشىلىكتىڭ تامىرى سوعۋىن توقتاتقاندا, مۇمكىن گازەت تە توقتاۋى مۇمكىن. گازەت تۇرماق, ءبىزدىڭ داۋىرىمىزگە دەيىن پايدا بولعان تاسقا قاشاپ جازۋ مادەنيەتى ءالى كۇنگە ادامزاتپەن بىرگە جاساپ, ولگەندەرگە قىزمەت ەتىپ تۇر عوي. ولگەندەردىڭ باسىنا بارعان تىرىلەرگە دە. ال باسىلىم سول العاشقى جازۋلاردىڭ وركەنيەت تۋدىرعان نۇسقاسى, قاي ۇلت ادامدارى ءباسپاسوزدى كوپ وقىسا, سول ۇلت ينتەللەكتۋال, اناعۇرلىم زيالى ەكەنىن دالەلدەۋ ارتىعىراق شىعار. بۇعان بۇگىنگى سايتتارداعى ماتەريالدار مەن ەڭ قۇندى فوتولاردىڭ كوبى گازەتتەر مەن جۋرنالداردان كوشىرىلگەنىن نەگە ايتپايمىز؟

زاماناۋي تالاپتارعا سايكەس, قازىر گازەتتەر دە فورماتىن وزگەرتىپ, اقپارات كوزدەرىنىڭ قاي-قايسىنا بولسىن بەرىسپەي, تالاسىپ كەلەدى. وسى ورايدا – باس ديرەكتور ديحان قامزابەك ۇلىنىڭ مۇنداعى ءبىر قولتاڭباسى – جاڭادان ءبىلىم جانە عىلىم ءبولىمىن اشۋى. بەلگىلى جۋرناليست ازامات ەسەنجول جەتەكشىلىك ەتەتىن ءبولىم تىلشىلەرى ۇيىمداستىراتىن «Digital», «جاساندى ينتەللەكت» بەتتەرىنە لۋپامەن ۇڭىلگەندەي, ابدەن توقتالىپ وقيتىن ماتەريالدار شىعاتىنىن ورەلى وقىرمان بىلسە كەرەك. نازارباەۆ ۋنيۆەرسيتەتىنىڭ جاس عالىمدارى اشقان, تەك قانا ميكروسكوپپەن كورە الاتىن جاڭالىقتاردىڭ نەشە اتاسىن وسى ءبولىمنىڭ تىلشىلەرى ماتەريالدارىندا.

«ەگەمەننىڭ» ءفوتوتىلشىسى ەرلان ومار تۇسىرگەن ءساتتى سۋرەتتەر ەلىمىزدىڭ باق كوزدەرىن ارالاپ كوشىپ جۇرگەنىن تالاي كوردىك. شاپقان اتتان ەڭكەيىپ تەڭگە ىلۋگە شاق قالعان قازاق جىگىتىنىڭ فوتوسىن كورنەكىلىككە قولدانباعان سايت, گا­زەت قالماعان شىعار. گازەتىمىزدىڭ سوڭ­عى بەتىندەگى «كوزايىم» سىندى جالت قارا­تاتىن جىپ-جىلى فوتولارى بۇگىننىڭ عانا ەمەس, ەرتەڭنىڭ دە مۇراسى. گازەت وسىنداي ساربازدارى مەن ساردارلارىنىڭ ارقاسىندا ۋاقىتتى «توقتاتىپ» قويادى. ونى وقىعاننىڭ اۋەلى تانىمى كەڭىپ, كوزقاراسى وسەدى. وسى كۇنگە دەيىن سايتتان وقىپ, جادىڭىزدا وشپەستەي توقىلىپ قالعان قۇندىلىق بولسا, ەسىڭىزگە ءتۇسىرىپ كورىڭىز.   

«ەگەمەن» ەلگە جەتكەنشە الاس-كۇلەستىڭ كوكەسى شتاتتا عانا ەمەس, ايماقتىڭ ءار تۇكپىرىن قامتيدى. ءار مەنشىكتى ءتىلشى – سول وڭىردەگى «ەگەمەننىڭ» ەلشىلەرى دەرلىك قۇرمەتتى وكىلدەر. «وتقا سالسا جانبايتىن, سۋعا سالسا باتپايتىن» ءبىر-ءبىر ساردار, اكىم-قارامەن رەداكتسيانىڭ اتىنان سويلەسىپ, كەلىسسوزگە كەلە بەرەتىن وڭىردەگى فيليال ەسەبىندە. ال الماتى قوسىنى اۋىر ارتيللەرياعا پارا-پار اسكەر. نەبىر جايساڭ تۇلعا, جازۋشى مەن تىسقاققان قالامگەر, جۋرناليستەر «ەگەمەن» ارقىلى ەلدىڭ ءسوزىن ول جەردە دە ۇستاپ وتىر.   

*  *  *

جىلقى مەن قويدىڭ سوڭىنان ىعىپ, اقىرى اداسىپ قارا تۇندە دالادا قال­عاندا, قۇلاعىن قايشىلاپ تاستاپ, جەلە جورتىپ وتىرىپ جول تاباتىن اردا كۇرەڭ اتتاي سەرگەك ويلى گازەت قايدان شى­عادى؟ ىمىرالاسىپ ءىس قىلاتىن ىنتالى ءھام تالانتتى جاستار توپتاسقان كۇنى. «ەگەمەن» جىلناماسىنا كوز تىككەن جان الاش ارىستارىنىڭ ءىزى قالعان باسى­لىمدا بۇگىنگە دەيىن ءبىرتۋار تۇلعالار قىز­مەت ەتكەنىن كورەمىز. بوساعاسىنا بىتكەن قۇتىنان شىعار, و باستا الاش دەپ اتقا قونعان ازاماتتاردىڭ قاي-قايسىسى بولسىن, «ۇشقىننان», «ەگەمەن قازاقستان­عا» دەيىن اقىل-وي مەن ۇلت پاراساتى­نىڭ مىنبەرى مەن الاڭىنا اينالدىرىپ­تى. احمەت بايتۇرسىن ۇلى كوتەرگەن ۇلت, جەر ماسەلەسى گازەت تىگىندىسىندە كوكتەۋلى. سوندىقتان مۇندا اداسىپ جۇرگەن قا­زاق بولا بەرمەيدى, قالايدا قىزمەت ەتەم دەپ اسىعىپ جۇرگەندەر دەسەك, اڭگىمە باسقا.