سەمەيدە «بىرگە! ءبىر تولقىندا» ءداستۇرلى جاستار فورۋمى ءوتتى. بۇل فورۋم ايماقتاعى جاستار ۇيىمدارىنىڭ كوشباسشىلارى مەن ەرىكتىلەرىن, بەلسەندىلەر مەن وڭىردەگى ستۋدەنتتەر كلۋبتارىنىڭ مۇشەلەرىنىڭ باسىن بىرىكتىردى. ءىس-شاراعا قاتىسقان وبلىس اكىمى نۇرلان ۇرانحاەۆ جاستار بولاشاقتىڭ قوزعاۋشى كۇشى ەكەنىن جانە ولارعا قۇرمەت كورسەتۋ, شابىتتاندىرۋ قاجەت ەكەنىن ايتتى.
جاستار ەل بولاشاعى بولعاندىقتان ولاردىڭ وسى باستان قوعامنىڭ قوزعاۋشى كۇشى رەتىندە بىرەگەي باستامالاردىڭ باسى-قاسىنان تابىلۋى كوڭىل قۋانتادى. بۇگىندە وبلىس جاستارى جاڭا يدەيالاردى العا تارتىپ, جۇزەگە اسىرۋعا باتىلدىق تانىتىپ كەلەدى. ءوڭىردىڭ قوعامدىق ومىرىنە ءوڭ بەرىپ, ءبىلىم مەن عىلىم, ونەر مەن سپورت, ۆولونتەرلىك قىزمەت پەن كاسىپكەرلىك سالالاردا ەڭبەك ەتىپ, جەتىستىككە جەتكەن زامانداستار جەتەرلىك. فورۋم ۇيىمداستىرۋداعى باستى مىندەت – وبلىستىڭ دامۋىنا ۇلەس قوسقان جاستاردىڭ ءىسىن ۇلگى ەتىپ كورسەتۋ.
بيىل ءوز سالاسىن ورگە سۇيرەپ جاستاردىڭ اراسىندا ۇزدىكتەردى انىقتاۋ 7 اتالىم بويىنشا جۇزەگە استى. بايقاۋعا 80-گە جۋىق ۇمىتكەر ءوز قۇجاتتارىن تاپسىرىپ, باق سىناعان. جەڭىسكە جەتكەن جاستارعا وبلىس اكىمىنىڭ العىسحاتى مەن ەستەلىك سىيلىقتار جانە اقشالاي سەرتيفيكاتتار تابىس ەتىلدى.
قازىلار القاسىنىڭ شەشىمىمەن «جىل كوشباسشىسى» بولىپ ەراسىل ءومىرالىنوۆ تانىلدى. سونداي-اق «جىلدىڭ جاس دارىنى» ەرقانات سادۋحانوۆ پەن مۇحتار قايسار اتالدى. «ۇزدىك جاستار رەسۋرستىق ورتالىعى» اتالىمىن اياگوز اۋدانى مەن كۋرچاتوۆ قالاسىنداعى جاستاردى ءبىر ورتاعا توعىستىرىپ قىزمەت اتقارعان مەكەمەلەر يەلەندى.
«Soul Voice» جوباسىنىڭ اۆتورى ەراسىل تاەۆ «جىلدىڭ ۇزدىك جوباسى», ەلدوس سەيىتبەكوۆ «جىلدىڭ جاس ەڭبەك ادامى», نارگيز سۇلەيمەنوۆا مەن ايان ماۋلەتحانوۆ «جىلدىڭ جاس ۆولونتەرى», ساعىنباەۆتار وتباسى «جىلدىڭ جاس وتباسى» اتالىمىمەن ماراپاتتالدى.
سەمەي