قازاقستان رەسپۋبليكاسى مەملەكەتتىك كۇزەت قىزمەتى پرەزيدەنتتىك وركەسترى حالىقتىق مۋزىكا ءانسامبلىنىڭ كونتسەرتى وسىلاي اتالدى
استانا قالاسىندا «شابىت» قازاق ۇلتتىق ونەر ۋنيۆەرسيتەتىنىڭ جامبىل جاباەۆ اتىنداعى كونتسەرتتىك زالىندا قازاقستان رەسپۋبليكاسى مەملەكەتتىك كۇزەت قىزمەتىنىڭ پرەزيدەنتتىك وركەسترى جاڭا ماۋسىمىن جاريالادى, ونى حالىقتىق مۋزىكا ءانسامبلىنىڭ كونتسەرتى اشتى.
حالىقتىق مۋزىكا ءانسامبلى 1997 جىلى قۇرىلدى. بۇل ۇجىم دومبىرا مۋزىكاسىنىڭ بارلىق ستيلدەرى مەن باعىتتارىن (شەرتپە, توكپە), باتىس, ورتالىق, وڭتۇستىك وڭىرلەرىنىڭ ءداستۇرلى مەكتەپتەرىندەگى حالىق اندەرىن ورىنداۋ ۇلگىلەرىن ناسيحاتتايدى, سازسىرناي, سىبىزعى, جەتىگەن, قىلقوبىز, شەرتەر, دومبىرا سەكىلدى فولكلورلىق-ەتنوگرافيالىق اسپاپتاردا ويناۋدىڭ وزىق ۇلگىلەرىن كورسەتەدى. حالىقتىق مۋزىكا ءانسامبلىنىڭ قۇرامىنا حالىقارالىق جانە رەسپۋبليكالىق كونكۋرستاردىڭ لاۋرەاتى ا.احماديەۆ, ج.مۇحتاروۆ, م.حايرۋشەۆ, ە.مۇحامەديەۆ, ا.ابىلبەكوۆا جانە «جەتىگەن» دۋەتى, دومبىراشىلار تريوسى كىرەدى.
حالىقتىق مۋزىكا ءانسامبلى پرەزيدەنتتىك وركەستردىڭ قۇرامىندا رەسپۋبليكانىڭ مادەني جانە مۋزىكالىق ومىرىنە بەلسەنە ارالاسادى. حالىقارالىق مۋزىكالىق ارەنادا قازاقستان اتىنان لايىقتى ونەر كورسەتەدى. وركەستردىڭ تمد مەملەكەتتەرى, ۇلىبريتانيا, اقش, يتاليا, مالايزيا, تۇركيا, بەلگيا, اۆستريا, ءۇندىستان, باحرەين جانە باسقا ەلدەردىڭ ساحنالارىنداعى كونتسەرتتەرى تابىستى ءوتتى.
بارلىق سالتاناتتاردا ۇجىم مۇشەلەرى جوعارى كاسىبي شەبەرلىك بايقاتادى, بارلىق مۋزىكالىق اسپاپتاردا شەبەر وينايدى. مۋزىكانتتار بيىك رۋحانيلىعىمەن, مۋزاعا جانە تۋعان حالقىنا ادال قىزمەت ەتۋمەن ەرەكشەلەنەدى.
2014 جىلدان بەرى حالىقتىق مۋزىكا انسامبلىنە قۇرمانعازى اتىنداعى الماتى مەملەكەتتىك كونسەرۆاتورياسىنىڭ تۇلەگى, بۇكىلوداقتىق بايقاۋلاردىڭ لاۋرەاتى, «دارىن» مەملەكەتتىك جاستار سىيلىعىنىڭ لاۋرەاتى لەيتەنانت ابىلعازى احماديەۆ جەتەكشىلىك ەتەدى.
جىل بويى اي سايىن شىعارماشىلىق ۇجىم استانا تۇرعىندارى مەن قوناقتارىنا ءوز شىعارماشىلىعىنىڭ جاڭا تۋىندىلارىن پاش ەتەدى. پرەزيدەنتتىك وركەستردىڭ قۇرامىنا ۇرلەمەلى اسپاپتار وركەسترى, حالىقتىق مۋزىكا, كامەرالىق مۋزىكا, ءان جانە ەسترادا جانە بي انسامبلدەرى كىرەدى.
بۇل شىعارماشىلىق ۇجىم – الەمدىك مۋزىكا جانرلارىنىڭ فولكلورلىق, كلاسسيكالىق, اكادەميالىق تۇرلەرىن, قازىرگى زامان كومپوزيتورلارىنىڭ شىعارمالارىن ورىندايدى.
1992 جىلى «رەسپۋبليكالىق ۇلان تۋرالى» زاڭ كۇشى بار قازاقستان رەسپۋبليكاسى پرەزيدەنتىنىڭ جارلىعىنا سايكەس قازاقستان رەسپۋبليكاسىنىڭ حاتتامالىق, ديپلوماتيالىق, مەملەكەتتىك جانە باسقا دا سالتاناتتى شارالارىن قامتاماسىز ەتۋ ءۇشىن پرەزيدەنتتىك وركەستر قۇرىلعان. 1992-1994 جىلدارى ۇلگىلى-كورنەكى وركەستر اتاعىنا يە بولدى.
2006 جىلدان باستاپ وركەسترگە پ.ي. چايكوۆسكي اتىنداعى ماسكەۋ مەملەكەتتىك كونسەرۆاتورياسىنىڭ تۇلەگى, بۇكىلوداقتىق كونكۋرستاردىڭ لاۋرەاتى, «ەلىم مەنىڭ» اتتى العاشقى رەسپۋبليكالىق پاتريوتتىق اندەر كونكۋرسىنىڭ لاۋرەاتى, ۇرلەمەلى اسپاپتار وركەسترىنە ارنالعان پارتيتۋرانىڭ اۆتورى, مەملەكەتتىك ءانۇران ورانجيروۆكاسىنىڭ اۆتورى, پولكوۆنيك تالعات بەردىعۇلوۆ باسشىلىق ەتەدى.
«ەگەمەن-اقپارات».
سۋرەتتەردى تۇسىرگەن ەرلان وماروۆ.