ۇلت پەن ۇلتتى, ەل مەن ەلدى بىرىكتىرەتىن شەكاراسىز الەم – ونەر. كيەلى قالام ۇشىمەن حالىق قاسيەتىن بەينەلەگەن وزىق ويلى قالامگەرلەردىڭ ءبىرى, قىتايداعى قازاق جازۋشىسى – اكبار ءماجيتتىڭ 70 جاسى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە اتالىپ ءوتتى.
قىتاي حالىق رەسپۋبليكاسى حالىقتىق ساياسي كونسۋلتاتيۆتىك كەڭەسىنىڭ دەپۋتاتى, قىتاي جازۋشىلار وداعى باسپا كورپوراتسياسىنىڭ ۆيتسە-پرەزيدەنتى, «قىتاي جازۋشىلارى» جۋرنالىنىڭ باس رەداكتورى, جازۋشى, اۋدارماشى اكبار ءماجيتتىڭ مەرەيتويىنا ارنالعان «قازاقستان-قىتاي: مادەني-رۋحاني بايلانىستار كوكجيەگى» تاقىرىبىنداعى دارىسكە اكادەميك سەرىك نەگيموۆ, پروفەسسور راقىمجان تۇرىسبەك, جازۋشى تۇرسىنحان زاكەن ۇلى سىندى زيالى قاۋىم وكىلدەرى, ۋنيۆەرسيتەت وقىتۋشىلارى مەن ستۋدەنتتەر قاتىستى. ەۋرازيا ۇلتتىق ۋنيۆەرسيتەتىنىڭ رەكتورى ەرلان ءباتتاش ۇلىنىڭ قۇتتىقتاۋ حاتىن پرورەكتور ارداق بەيسەنباي وقىپ بەردى.
– مادەنيەت پەن ادەبيەتتە ورنىڭىزدى ايشىقتاعان ءىرى تۇلعا ەكەنىڭىز كوپكە ءمالىم. ءسىزدىڭ اۋدارمالارىڭىز ارقىلى قىتاي ەلى ۇلى ابايمەن تانىستى. تەك ادەبيەتشى, عالىم عانا ەمەس, كوركەم تىلمەن وقىرمان جۇرەگىنە جول تاپقان شەبەر قالامگەرسىز. شىعارمالارىڭىز وقىرماننىڭ ىستىق ىقىلاسىنا بولەنىپ, جوعارى باعاسىن الىپ جاتىر. بۇگىنگى مەرەيلى جاسىڭىزبەن قۇتتىقتاي وتىرىپ, مىقتى دەنساۋلىق, شىعارماشىلىق تابىس تىلەيمىن, – دەگەن رەكتور قۇتتىقتاۋ حاتىندا.
باسقوسۋدا جازۋشى اكبار ماجيت اتقارعان ەڭبەكتەرىنە توقتالىپ, ۇلى ابايدى اۋدارۋ بارىسىن ءسوز ەتتى.
– اۋەلى ماعان اباي اۋدارماسىنا رەداكتورلىق جاساپ بەرۋدى ءوتىندى. بىراق اۋدارماعا قاراسام, وڭدەۋگە كەلمەيدى ەكەن. ءبىر ايدان سوڭ ۇلى اقىندى تۇنىمەن اۋدارىپ اكەلىپ بەرگەنىمدە, «مىنە, ناق ابايدىڭ ءوزى ەكەن» دەپ باس رەداكتورىم ماقتاي جونەلدى. سودان, مىنە, اقىننىڭ قارا سوزدەرىن قازاق ءتىلى مەن قىتاي تىلىندە قاتار باسىپ جيناق ەتىپ شىعاردىق. سونىمەن بىرگە ابايدىڭ 175 جىلدىق مەرەيتويى قارساڭىندا اقىننىڭ ولەڭدەرىن دە اۋدارىپ, قىتاي تىلىندە باسىپ شىعارۋعا ۇسىنىس ءتۇستى. مەن بۇل ۇسىنىسقا كەلىسىپ, ءۇش-ءتورت ايدىڭ كولەمىندە ابايدىڭ بۇكىل جىرلارىن اۋدارىپ شىقتىم. سولايشا حاكىمنىڭ جەكە كىتابى قىتايدىڭ «ادەبيەت» باسپاسىنان باسىلىپ شىقتى, – دەدى اكبار ماجيت.
جازۋشى سونىمەن بىرگە قىتايدا شىعاتىن «ۇلتتار ادەبيەتى» جۋرنالىنا قازاق ادەبيەتىنىڭ شىعارمالارى جاريالانۋىنا ۇيىتقى بولعانىن, ونداعى از حالىقتار مەن قىتايدىڭ قازىرگى ادەبي ۇدەرىسى حاقىندا ايتىپ ءوتتى.
جازۋشى مەرەيتويىنا الاشتانۋشى عالىم تۇرسىن جۇرتبايدىڭ جولداعان ءۇشبۋ حاتىن جازۋشى تۇرسىنحان زاكەن ۇلى جەتكىزدى.
اكبار ماجيت ۇلى جازۋشىلىق بيىكتىڭ نامىستى, جانكەشتى جانە ەڭ ابىرويلى ساربازى, جاۋىنگەرى. ول, مىنە, ەلۋ جىلداي ۋاقىتتان بەرى نامىس قالامىن رۋح قارۋى رەتىندە ءيسى ادامزاتتىڭ يگىلىگىنە جۇمساپ كەلەدى. ونىڭ قالامى نازىك تە وجەت ويلى شىعارمالار ارقىلى قازاقتىڭ كۇيىنىشى مەن ءسۇيىنىشىن ادامزاتتىڭ ۇشتەن ءبىرىن قۇرايتىن ۇلكەن حالىقتىڭ قاپەرىنە جەتكىزدى. جەتكىزىپ قانا قويعان جوق, ءبىر جارىم ميلليارد ادام ونىڭ تالانتىن مويىندادى. سونىمەن قاتار اكبار ماجيت ۇلى ازاماتتىق, قايراتكەرلىكتىڭ دە نىسانالى تۇلعاسى, – دەگەن جازۋشى, عالىم تۇرسىن جۇرتباي.
مۇنان سوڭ اكادەميك سەرىك نەگيموۆ ءسوز الىپ, قالامگەردىڭ تۇلعالىق بولمىسىنا توقتالدى.
– حاكىمنىڭ تەرەڭىنە سۇڭگۋ, سول زاماننىڭ كەلبەتىن تانىتۋ – قاھارماندىق دەر ەدىم. سوندىقتان قايراتكەرلىكتى, رۋح قازىعىن بەرىك ۇستاعان كوسەم تۇلعاسىز. ءسىزدى مەرەيلى جاسىڭىزبەن قۇتتىقتاي وتىرىپ, بار جاقسىلىقتى تىلەيمىن! – دەدى ول.
كەشكە جينالعان زيالى قاۋىم وكىلدەرى مەن ستۋدەنتتەر جازۋشىنىڭ شىعارمالارى حاقىندا ويلارىن ءوربىتتى. اكبار ماجيت ۋنيۆەرسيتەت رەكتورىنىڭ شەشىمىمەن «كۇلتەگىن» مەدالىنىڭ يەگەرى اتاندى.