مانەرلەپ سىرعاناۋدان فرانتسيانىڭ گرەنوبل قالاسىندا گران-پري دوداسىنىڭ فينالدىق سايىستارى ءوتتى. اتالعان جارىسقا ەلىمىزدىڭ وكىلدەرى بۇعان دەيىن بىردە-ءبىر رەت قاتىسپاعان ەدى. بيىل ميحايل شايدوروۆتىڭ باعى جانىپ, ول ۇزدىكتەرمەن بىرگە ونەر كورسەتۋ مۇمكىندىگىنە يە بولدى.
ەلىمىزدىڭ ەڭ ۇزدىك مانەرلەپ سىرعاناۋشىسى قىسقا باعدارلامادا 91,26 ۇپاي جيىپ, ءۇشىنشى ورىنعا تابان تىرەدى. ول تەك 2023 جىلعى الەم چەمپيوناتىنىڭ قولا جۇلدەگەرى, 2024 جىلعى الەم چەمپيونى, ISU رەيتينگىنىڭ كوشباسشىسى, امەريكالىق يليا مالينين (105,43 ۇپاي) مەن بەيجىڭ وليمپياداسىنىڭ كۇمىس (جەكەلەگەن ەسەپتە), قولا (كوماندالىق ەسەپتە) جۇلدەگەرى, دۇنيەجۇزىلىك دودانىڭ ءۇش دۇركىن ءفيناليسى, جاپونيالىق يۋما كاگيامادان (93,49 ۇپاي) قالىپ قويدى.
كەلەسى كۇنى ەركىن باعدارلاما بويىنشا سايىستار ءوتتى. وكىنىشكە قاراي, شەشۋشى سىندا ميحايل ءوز دەڭگەيىندە ونەر كورسەتە المادى. بۇل جولى ءبىراز قاتەلىكتەر جىبەردى. ناتيجەسىندە, 162,49 ۇپايدى (قورىتىندى ۇپايى – 253,75) قاناعات تۇتقان شايدوروۆ بەسىنشى ورىندا قالىپ قويدى. دەسەك تە جەرلەستەرىمىزدىڭ وسى ءباسى بولەك باسەكەگە تۇڭعىش رەت قاتىسىپ وتىرعانىن ەسكەرسەك, وسىنىڭ ءوزىن ءتاۋىر كورسەتكىش دەپ باعالاعان ءجون.
جارىستىڭ باس جۇلدەسىن يليا مالينين (282,12 ۇپاي) ولجالاسا, يۋما كاگياما (281,72 ۇپاي) كۇمىسپەن كۇپتەلدى. ال قولا مەدالدى جاپونيانىڭ تاعى ءبىر سىرعاناۋشىسى, الەم چەمپيوناتىنىڭ قولا جۇلدەگەرى سيۋن ساتو (270,82 ۇپاي) يەلەندى.