ەل استاناسىندا مادەنيەت جانە اقپارات مينيسترلىگىنىڭ قولداۋىمەن قازاق ۇلتتىق ونەر ۋنيۆەرسيتەتى ۇيىمداستىرعان «Astana Piano Passion» II رەسپۋبليكالىق جاس پيانيستەر بايقاۋى ءوتىپ جاتىر.
شىعارماشىلىق دودا ۇلتتىق فورتەپيانو مەكتەبىن دامىتىپ, دارىندى جاس مۋزىكانتتاردى قولداۋعا, سونداي-اق كلاسسيكالىق جانە اكادەميالىق مۋزىكانى, وتاندىق كومپوزيتورلاردىڭ مۋزىكاسىن جانە فورتەپيانودا ورىنداۋ شەبەرلىگىن دارىپتەۋگە باعىتتالعان.
ۇيىمداستىرۋشىلار قاتىسۋشىلاردىڭ ورىنداۋ شەبەرلىگىن ارتتىرۋ, ولاردىڭ كاسىبي دامۋىنا ۇلەس قوسۋ جانە حالىقارالىق جوبالارعا دايىندىق جاساۋ سەكىلدى مىندەتتەردى العا قويادى. سونىمەن قاتار ءىس-شارا بارىسىندا تاربيەشىلەر مەن وقۋشىلار اراسىندا تاجىريبە الماسۋعا دا جاعداي جاسالعان.
بايقاۋعا ەلىمىزدىڭ مادەنيەت جانە ونەر سالاسى بويىنشا ءبىلىم ۇيىمدارىندا «فورتەپيانو» ماماندىعىندا وقيتىن 7 جاستان 18 جاسقا دەيىنگى جاس پيانيستەر قاتىسا الادى. بۇعان دەيىنگى «Astana Piano Passion» بايقاۋلارىنىڭ گران-پري جəنە ءبىرىنشى ورىن يەگەرلەرى بۇل دوداعا سول جاس ساناتىندا قاتىسا المايدى. بايقاۋ ءتورت جاس ساناتى بويىنشا وتەدى. اتاپ ايتساق, 7–9 جاس, 10–12 جاس, 13–15 جاس جانە 16–18 جاس ارالىعىنداعى ونەرپازدار.
بايقاۋدىڭ ءبىرىنشى كۇنى «س» ساناتىنداعى قاتىسۋشىلاردىڭ جەرەبەسى مەن تىڭدالىمى جانە قازاقستاننىڭ ەڭبەك سىڭىرگەن ءارتىسى ا.تەبەنيحيننىڭ شەبەرلىك سىنىبى ءوتتى. كونكۋرستىڭ ونلاين-ترانسلياتسياسىن قازۇوۋ-ءدىڭ YouTube-ارناسىنان تاماشالاۋعا بولادى.