ۇكىمەت وتىرىسىندا ونەركاسىپ جانە قۇرىلىس ءمينيسترى قانات شارلاپاەۆ قۇرىلىس سالاسىنداعى نەگىزگى جەتىستىكتەر تۋرالى باياندادى. بۇگىنگى تاڭدا ونىڭ ۇلەسى ەلىمىزدىڭ جالپى ءجىو-ءنىڭ 5,6%-ىن قۇرايدى. سالادا 670 مىڭنان استام ادام جۇمىس ىستەيدى, 53 مىڭعا جۋىق كاسىپورىن قىزمەت ەتەدى, ونىڭ 2 903-ءى قۇرىلىس ماتەريالدارىن وندىرەدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
سونىمەن قاتار, بيىل مەملەكەتتىك قولداۋ ەسەبىنەن 22 مىڭنان استام جالعا بەرىلەتىن پاتەر ساتىپ الۋعا 330 ملرد تەڭگە قاراستىرىلىپ, اكىمدىكتەرگە 305 ملرد تەڭگە اۋدارىلعان. جىل سوڭىنا دەيىن مەملەكەتتىك باعالى قاعازدار شىعارۋ ەسەبىنەن 165 ملرد تەڭگە سوماسىندا 10 مىڭنان استام پاتەردى پايدالانۋعا بەرۋ جوسپارلانعان. 2% جانە 5% بويىنشا جەڭىلدەتىلگەن يپوتەكالىق قارىزدار ەسەبىنەن بۇگىنگى كۇنى 94,5 ملرد تەڭگە سوماسىنا 7 861 قارىز بەرىلگەن. تۇرعىن ءۇي قۇرىلىسى اۋداندارىنا ينجەنەرلىك جەلىلەردى تارتۋعا 83 ملرد تەڭگە بولىنگەن.
ايتا كەتەيىك, وسى جىلدىڭ مامىر ايىنان باستاپ «ناۋرىز» جاڭا تۇرعىن ءۇي باعدارلاماسى ىسكە قوسىلدى. 2024 جىلعا 300 ملرد تەڭگە سوماسىنا 12 مىڭ قارىز بەرۋ جوسپارلانعان. بۇگىنگى تاڭدا 172 ملرد تەڭگەگە 6 مىڭنان اسا قارىز بەرىلگەنى حابارلاندى.