سەمەيدەگى جاڭارتىلعان بەيبىتشىلىك ارالىندا بالالار تەمىرجولى پايدالانۋعا بەرىلدى. بۇل وبلىسىمىزداعى ءتۋريزمدى دامىتۋعا ىقپال ەتەتىنى ايقىن. سونىمەن قاتار ارالدا جاڭا قوعامدىق كەڭىستىك جانە قالا تۇرعىندارى مەن قوناقتارىنان ارنالعان ورىندار سالتاناتتى تۇردە اشىلدى. قوعامدىق كەڭىستىكتە بالالار ويىن الاڭدارى, فۋتبول, ۆولەيبول, ستريتبول الاڭدارى مەن ۆوركاۋت ايماعى بار. بارلىق الاڭداردا جاڭا كاسىبي ترەناجەرلەر ورناتىلعان.
سەمەيدەگى بالالار تەمىرجولى 1979 جىلى تەمىرجولشىلار كۇنىنە وراي اشىلعان بولاتىن. الايدا 90 جىلداردىڭ ورتاسىنا قاراي جابىلعان ەدى. مىنە, 20 جىلدان استام ۋاقىتتان كەيىن بالالار تەمىرجولى قايتا قالپىنا كەلتىرىلدى. 2023 جىلدىڭ 5 ماۋسىمىندا وبلىس اكىمى نۇرلان ۇرانحاەۆ ورتالىق كوممۋنيكاتسيالار قىزمەتىنىڭ وڭىردەگى كوشپەلى ءباسپاسوز كونفەرەنتسياسىندا بالالار تەمىرجولىن جانداندىرۋدى جوسپارلاپ وتىرعانىن ايتقان ەدى. اتالعان نىسان تەمىرجول ارالدىڭ اسەم جەرلەرىن ارالاپ, جولاۋشىلارعا ەرتىس وزەنىنىڭ ەرەكشە تابيعي لاندشافى مەن ادەمى كورىنىستەرىن تاماشالاۋعا مۇمكىندىك بەرەدى.
ءبىرىنشى كەزەڭدە تەمىرجول ۇزىندىعى 2 شاقىرىم بولادى. ارالداعى كوپىردەن بيولوگيالىق ورتالىققا دەيىنگى ارالىقتا جۇرەدى. تەپلوۆوز بەن ۆاگوندار تەمىرجول تەحنيكاسىنا ماماندانعان قامبار ماشينا جاساۋ زاۋىتىندا دايىندالدى. ۇزىندىعى 12 مەتر بولاتىن ءار ۆاگوندا 32 ورىن بار. ەگەر مارشرۋت سۇرانىسقا يە بولسا قوسىمشا ۆاگوندارعا تاپسىرىس بەرىلەدى. اتالعان جوبا اياسىندا KاZ Minerals توبى 620 ملن قارجى ءبولىپ, تەپلوۆوز بەن ۆاگونداردى ساتىپ الۋعا دەمەۋشىلىك جاسادى. ال, «باقىرشىق تاۋ-كەن كاسىپورنى» ينفراقۇرىلىمدى سالۋدى ءوز موينىنا الدى.
بالالار تەمىرجولى تەك ويىن-ساۋىق ورنى عانا ەمەس, جاستاردىڭ تەمىرجول ماماندىعىنا قىزىعۋشىلىعىن ارتتىرۋعا ىقپال ەتەتىن ماڭىزدى ءبىلىم بەرۋ جوباسى بولماق. ۇيىمداستىرۋشىلار الداعى ۋاقىتتا قازاقستان تەمىرجولى باسشىلىعى تاراپىنان قاجەتتى قىزمەتكەرلەردى وقىتۋ, تەمىرجول ماماندىعىنا باۋليتىن بالالار ۇيىرمەسىن قۇرۋ ماقساتى كوزدەلگەنىن جەتكىزدى.
سەمەي