قوستانايدا قوقىس شىعارۋ ءتاريفى وزگەرەدى

قوستاناي قالالىق ءماسليحاتىنىڭ تۇراقتى كوميسسيالارىنىڭ وتىرىسىندا شەشىم قابىلداندى. ايتا كەتەرلىگى, ماسەلە بىرنەشە رەت تالقىلاۋعا شىعارىلدى.

«قوستانايدا تۇرمىستىق قاتتى قالدىقتاردى جيناۋ, تاسىمالداۋ, سۇرىپتاۋ جانە كومۋ ءتاريفىن كوتەرۋدى تالقىلاۋ باستى ماسەلەلەردىڭ ءبىرى بولدى. تاۋەلسىز ساراپتاما ۇيىمى حالىق ءۇشىن ءتاريفتى ەسەپتەۋ ادىستەمەسىن (ەكولوگيا, گەولوگيا جانە تابيعي رەسۋرستار ءمينيسترىنىڭ 14.09.2021 جىلعى بۇيرىعى) ۇستانا وتىرىپ, 2019 جىلى ەسەپتەلگەن جانە 2022 جىلى بەكىتىلگەن قولدانىستاعى ءتاريفتىڭ اعىمداعى ەكونوميكالىق جاعدايلارعا سايكەس كەلمەيتىندىگىن ارتتىرۋ قاجەتتىگىن نەگىزدەدى», دەپ حابارلادى قوستاناي اكىمدىگى رەسمي حابارلامادا.

مامانداردىڭ ايتۋىنشا, مامانداندىرىلعان تەحنيكانىڭ قوسالقى بولشەكتەرىنىڭ قىمباتتاۋىنا, بىلىكتى كادرلاردىڭ جەتىسپەۋشىلىگىنە, سالىق شەگەرىمدەرى مەن ەميسسيالىق تولەمدەردىڭ وسۋىنە بايلانىستى ءتاريفتى قايتا قاراۋعا تۋرا كەلدى. جوعارىلاتىلعان تاريفتەن تۇسەتىن قاراجاتتىڭ باسىم بولىگى جۇمىسشىلاردىڭ جالاقىسىن كوتەرۋگە جانە وسى سالانىڭ ماتەريالدىق-تەحنيكالىق بازاسىن جاقسارتۋعا باعىتتالاتىنى اتاپ ءوتىلدى. ءتاريفتىڭ كوتەرىلۋى 53,28 پايىزدى قۇراپ, دەپۋتاتتاردىڭ كوپشىلىگىنىڭ قولداۋىمەن بەكىتىلدى.

اكىمدىك كەلەسى جىلى كونتەينەرلىك الاڭشالاردى, ونىڭ ىشىندە كىرەبەرىس جولداردى اسفالتتاۋ, ەكولوگيالىق زاڭناماعا سايكەستەندىرۋ ماقساتىندا كەزەڭ-كەزەڭىمەن اباتتاندىرۋ جۇمىستارى جوسپارلانىپ وتىرعانىنا سەندىردى. بۇل رەتتە كونتەينەرلىك الاڭشالار ءۇشىن جەر تەلىمدەرىن رەسىمدەۋ جۇمىستارى جۇرگىزىلەتىن بولادى.