بيىل قازاقستان حالقى اسسامبلەياسى جانىنداعى «انالار كەڭەسى» ورتالىعىنىڭ قۇرىلعانىنا 10 جىل تولدى. پاۆلوداردا كەڭەستىڭ ۇيىمداستىرۋىمەن «ادامزاتتىڭ اسىلى – انا» اتتى رەسپۋبليكالىق فورۋم ءوتتى.
اۋقىمدى ءىس-شارا اياسىندا انالار كەڭەسىنىڭ بۇگىنگە دەيىن اتقارىلعان جۇمىستارى قورىتىندىلانىپ, بالا تاربيەسى, اكە مەن انانىڭ وتباسىنداعى ءرولى جونىندە وي-پىكىرلەر ورتاعا سالىندى. فورۋمعا وبلىس اكىمىنىڭ ورىنباسارى ايگۇل مالىكوۆا قاتىسىپ, انالار كەڭەسىنىڭ قوعامداعى ماسەلەلەردى شەشۋگە جۇمىلا اتسالىسىپ جۇرگەنىنە توقتالدى.
– انالار كەڭەسى قوعامداعى ۇلتتىق تاربيەنى جانداندىرۋ مەن ۇلتتىق رۋحتى نىعايتۋ ماقساتىندا وتباسى قۇندىلىقتارىن, جاس ۇرپاقتى تاربيەلەۋ, قۇقىق بۇزۋشىلىقتىڭ الدىن الۋ, ايەلدەردىڭ قۇقىقتىق ساۋاتتىلىعىن ارتتىرۋ, باسقا دا الەۋمەتتىك ماڭىزى بار ماسەلەلەردى باستى نازاردا ۇستايدى. بۇل باعىتتا بىرنەشە مەكەمەمەن تىعىز قارىم-قاتىناس ورناتقان. ۇيىم مۇشەلەرى قوعامداعى وزەكتى ماسەلەلەرگە ءۇن قوسىپ, ونى شەشۋگە بەلسەندى قاتىسادى. ونىڭ ىشىندە قۇقىقتىق تاربيە بەرۋ ماسەلەسى دە بار. كەيىنگى كەزدەرى جاستار اراسىندا قۇقىق بۇزۋشىلىق كوبەيدى, ۆانداليزم, زورلىق-زومبىلىق, بالالارعا قاتىستى قىلمىستاردىڭ ارتۋى الاڭداتادى. وسى ماسەلەلەردىڭ الدىن الىپ, ادال ۇرپاق تاربيەلەۋ جولىندا بىرلەسىپ ەڭبەك ەتۋىمىز كەرەك, – دەدى ايگۇل قايىرتاسقىزى.
انالار كەڭەسىنىڭ توراعاسى ءنازيپا شاناي كەڭەستىڭ بۇگىنگە دەيىن اتقارىلعان جۇمىستارىن بايانداپ, قازىرگى ۋاقىتتا جۇزەگە اسىپ جاتقان اۋقىمدى جوبالاردىڭ ءبىرى – «مادەنيەتتى انا – مادەنيەتتى ۇلت» جوباسىنىڭ ماڭىزدىلىعىن اتاپ ءوتتى.
– «انالار كەڭەسى» ورتالىعىنىڭ قۇرىلعانىنا – 10 جىل. بۇگىندە 14 مىڭنان استام انانىڭ باسىن بىرىكتىرىپ وتىرعان كونسۋلتاتيۆتىك كەڭەسشى ورگان اۋىلداردا دا بار. 2021 جىلدان بەرى مەملەكەت باسشىسى قاسىم-جومارت توقاەۆتىڭ تاپسىرماسىمەن «مادەنيەتتى انا – مادەنيەتتى ۇلت» جوباسىن جۇزەگە اسىرىپ كەلەمىز. جوبانىڭ ماقساتى – وتباسىلىق قۇندىلىقتاردى, ۇلتتىق داستۇرلەردى ساقتاپ, وسكەلەڭ ۇرپاقتى سول رۋحتا تاربيەلەۋ, – دەدى ن.شاناي.
جيىن بارىسىندا «انا ءۇيى» قوعامدىق قورىمەن مەموراندۋمعا قول قويۋ ءراسىمى ءوتىپ, انالار كەڭەسىنىڭ بىرنەشە مۇشەسى مەن سەرىكتەستەرى العىس حاتپەن ماراپاتتالدى.
پاۆلودار