كەشە استانا قالاسى اباي قوناق ءۇيىنىڭ ءماجىلىس زالىندا « ۇلى دالا قىراندارى» الەۋمەتتىك-مادەني قوزعالىسىنىڭ ۇيىمداستىرۋىمەن ءباسپاسوز ءماسليحاتى ءوتتى. وندا اتالمىش قوزعالىستىڭ باستاماسىمەن ۇستىمىزدەگى جىلدىڭ 3-7 مامىرى ارالىعىندا «الماتى – تالدىقورعان – اياگوز – اقجار» باعىتى بويىنشا وتكەلى وتىرعان «بىرلىگى مىقتى ەل وزادى» اتتى شەرۋدىڭ جاي-جاپسارى ءسوز بولدى.
تاريحشىلار, شەرۋدى ۇيىمداستىرۋشىلار جانە باق وكىلدەرى قاتىسقان جيىندا قازاق حاندىعىنىڭ 550 جىلدىعى اياسىندا قولعا الىنعان شارانىڭ ءمان-ماڭىزى, ماقسات-مۇددەسى كەڭىنەن تالقىلاندى. سونداي-اق, « ۇلى دالا قىراندارى» قوزعالىسىنىڭ تەڭ توراعاسى سادىبەك تۇگەل شەرۋ بارىسىندا جۇرتشىلىققا ۇسىنىلاتىن مادەني ءىس-شارالار جونىندە حاباردار ەتتى. ونىڭ ايتۋىنشا, شىعىس قازاقستان وبلىسى تارباعاتاي اۋدانى اقجار اۋىلىندا قابانباي باتىردىڭ تۋىن ۇستاعان, ەل قورعاعان ەر داۋلەتباي باتىرعا ارناپ ەسكەرتكىش تۇرعىزىلماق. بۇدان بولەك, عىلىمي-پراكتيكالىق كونفەرەنتسيا, اقىندار ايتىسى, الامان بايگە ەل نازارىنا ۇسىنىلادى دەپ كۇتىلۋدە.
تاعى ءبىر ايتا كەتەر جايت, ءباسپاسوز ءماسليحاتى سوڭىندا قوعامدىق ءتۇرلى ماسەلەلەر مەن ۇلتتىق سپورت سالاسىنا قاتىستى جازىلعان بىرقاتار جاڭا كىتاپتار تانىستىرىلدى.
جولدىباي بازار,
«ەگەمەن قازاقستان».