«ۆولونتەرلەر كۇنى» وزگەگە قول ۇشىن بەرەتىن ىزگى جانداردىڭ مەرەكەسى - مينيستر

1985 جىلى بىرىككەن ۇلتتار ۇيىمى تاراپىنان بەكىتىلگەن «ۆولونتەرلەر كۇنى» 5 جەلتوقساندا الەم بويىنشا اتاپ وتىلەدى.

«بۇل كۇن – مەيىرىمدىلىك پەن سۇيىسپەنشىلىكتىڭ, تىلەكتەستىك پەن جاۋاپكەرشىلىكتىڭ وزىق ۇلگىسىن كورسەتىپ, وزگەگە قول ۇشىن بەرەتىن ىزگى جانداردىڭ مەرەكەسى. كەيىنگى ون بەس جىلدا ەلىمىزدە ۆولونتەرلىك قوزعالىس قارقىن الىپ, جالپىحالىقتىق سيپات الدى. پرەزيدەنتتىڭ مەملەكەتتىك قولداۋ شارالارىن كۇشەيتۋ مەن ۆولونتەرلىكتى ىنتالاندىرۋعا باعىتتالعان باستامالارى بۇل سالانى دامىتۋعا ۇلكەن سەرپىن بەردى»,  دەپ جازدى مينيستر.

ەسكە سالايىق, 2020 جىل قازاقستاندا «ۆولونتەرلەر جىلى» دەپ جاريالاندى. 2024-2026 جىلدارعا ارنالعان ۆولونتەرلىكتى دامىتۋ جانە قولداۋ جونىندەگى جاڭا جول كارتاسى بەكىتىلدى.

مينيستر جازباسىندا مەملەكەت باسشىسىنىڭ باستاماسىمەن بۇۇ باس اسسامبلەياسى 2026 جىلدى «ورنىقتى دامۋ ماقساتىندا حالىقارالىق ەرىكتىلەر جىلى» دەپ جاريالاعان قاراردى قابىلداعانىن, مەملەكەتتىك ورگاندار جىل سايىن ۆولونتەرلىك قاۋىمداستىقپەن بىرلەسىپ, ەكولوگيا, الەۋمەتتىك جانە مادەني سالالار, دەنساۋلىق ساقتاۋ, توتەنشە جاعدايلار, سپورت جانە باسقا دا باعىتتار بويىنشا 50-دەن استام جوبانى ىسكە اسىرعانىنا توقتالعان.

«قازاقستاندا ۆولونتەرلىك ۇيىمداردىڭ سانى تۇراقتى تۇردە ءوسىپ كەلەدى. 2020 جىلدان بەرى ولاردىڭ سانى ءۇش ەسە ارتىپ, 740-قا جەتتى. بەلسەندى ۆولونتەرلەر سانى 5 ەسە ءوسىپ, 132 مىڭ ادامعا جەتتى. سونداي-اق, 1 800-دەن استام باستاماشىل ۆولونتەرلىك توپ جۇمىس ىستەيدى. 2024 جىلدىڭ العاشقى جارتىجىلدىعىندا 65 مىڭعا جۋىق ءىس-شارا مەن اكتسيا وتكىزىلىپ, 132 مىڭنان استام وتانداستارىمىزدى قامتىدى. 680 مىڭ ادامعا كومەك كورسەتىلدى. جىل سوڭىنا دەيىن بۇل كورسەتكىش ءالى دە كوپتەگەن يگىلىكتى ىستەرمەن تولىعارى انىق», دەپ جازعان ايدا بالاەۆا.

ءمينيستردىڭ سوزىنشە قازاقستان حالىقارالىق قايىرىمدىلىق رەيتينگىندە 119 ەلدىڭ ىشىندە 40-شى ورىنعا كوتەرىلدى. بۇل – ءپاتريوتيزمنىڭ, قايىرىمدىلىق پەن قامقورلىقتىڭ جارقىن كورىنىسى بولعان ۆولونتەرلەردىڭ ەل ءۇشىن اتقارعان ەرەن ەڭبەگىنىڭ لايىقتى ناتيجەسى.