پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ سەناتتا ەلىمىزدىڭ 2024-2028 جىلدارعا ارنالعان الەۋمەتتىك-ەكونوميكالىق دامۋ بولجامى شەڭبەرىندە 2024 جىلعا ارنالعان رەسپۋبليكالىق بيۋدجەت پەن ۇلتتىق قور پارامەترلەرىنىڭ ناقتىلانعان بولجامىن تانىستىردى, دەپ حابارلايدى Egemen.kz.
نۇرلان بايبازاروۆتىڭ ايتۋىنشا, جىل باسىنان بەرى 2024 جىلعا ارنالعان ماكرو كورسەتكىشتەر بولجامىن قالىپتاستىرۋدىڭ باستاپقى پارامەترلەرى ەل ەكونوميكاسىنىڭ اعىمداعى دامۋىنا سايكەس كەلەدى.
«بيىلعى جىلدىڭ 11 ايىنىڭ قورىتىندىسى بويىنشا مۇنايدىڭ ورتاشا باعاسى باررەلىنە 79,9 اقش دوللارى دەڭگەيىندە قالىپتاستى. 2024 جىلعا ارنالعان باستاپقى پارامەترلەر بۇرىنعى دەڭگەيدە ياعني, مۇناي باعاسى – باررەلىنە 80 اقش دوللارى, ينفلياتسيا 6-8 پايىز دەڭگەيىندە ساقتالدى», دەدى ۆيتسە-پرەمەر.
رەسپۋبليكالىق بيۋدجەتتىڭ كىرىستەرى 14,1 ترلن تەڭگە كولەمىندە باعالانادى, بۇل بەكىتىلگەن جوسپاردان 2 ترلن تەڭگەگە تومەن ەكەنى حابارلاندى. بيۋدجەتتىڭ تەڭگەرىمدىلىگىن قامتاماسىز ەتۋ جانە وڭىرلىك ءوسۋ دەڭگەيىن قولداۋ ءۇشىن 2 ترلن تەڭگە كولەمىندە نىسانالى ترانسفەرتتى قوسىمشا تارتۋ ەسكەرىلگەن.
وسىنى ەسكەرە وتىرىپ, ۇلتتىق قوردىڭ تازا ۆاليۋتالىق اكتيۆتەرى 2024 جىلى $58,2 ملرد-تى قۇرايدى دەپ بولجانعان.