حالقىمىزدىڭ مادەنيەت كەڭىستىگىندە وزىندىك ورنى بار ونەر ورداسى قۇرمانعازى اتىنداعى قازاق ۇلتتىق كونسەرۆاتورياسىنىڭ قۇرىلعانىنا بيىل 80 جىل تولىپ وتىر. ونەر ورداسىنىڭ مەرەيتويلىق جىلى رەسپۋبليكا سارايىندا وتكەن گالا-كونتسەرتتە قورىتىندىلاندى.
مەرەيتويلىق گالا-كونتسەرت شىمىلدىعى سيمفونيالىق وركەستردىڭ سيقىرلى ۇنىمەن اشىلىپ, كورەرمەن قاۋىم جۇسىپبەك ەلەبەكوۆتىڭ التىن قوردا ساقتالعان جارقىن بەينەسىمەن قاۋىشتى. جيىندا مادەنيەت جانە اقپارات ءمينيسترى ايدا بالاەۆا ونەر ورداسىنىڭ ۇجىمىنا مەملەكەت باسشىسى قاسىم-جومارت توقاەۆتىڭ قۇتتىقتاۋىن جەتكىزدى.
«بۇل – ەلىمىزدىڭ رۋحاني ومىرىندەگى مەرەيلى بەلەس. ىرگەلى ءبىلىم ورداسى وسى كەزەڭدە ءتول مادەنيەتىمىزدىڭ التىن دىڭگەگىنە اينالدى. ۇلتتىق مۋزىكامىزدىڭ بىرەگەي ءداستۇرى بار ۇستاحاناسى رەتىندە تانىلدى. قازاقتىڭ ءان-كۇي ونەرىن جاڭا دەڭگەيگە كوتەرىپ, ونىڭ عىلىمي نەگىزىن قالىپتاستىردى. كونسەرۆاتوريا – دارىندى جاستارعا كلاسسيكالىق مۋزىكانىڭ قىر-سىرىن ۇيرەتىپ, كاسىبي مۋزىكانتتار دايارلايتىن العاشقى جوعارى وقۋ ورنى. وركەنيەتىمىزدىڭ ءورىسىن كەڭەيتىپ, ونى جەر جۇزىنە تانىتقان كوپتەگەن مايتالمان مامان وسى قارا شاڭىراقتان قانات قاقتى. اعا بۋىن سالعان سارا جولدى كەيىنگى ۇرپاق لايىقتى جالعاستىرىپ كەلەدى. ولار ەلىمىزدىڭ شىعارماشىلىق ۇيىمدارىندا تابىستى ەڭبەك ەتىپ ءجۇر. وسى ورايدا ۇلتتىق ونەرىمىزدى جان-جاقتى دارىپتەپ, رۋحانياتىمىزدى دامىتۋعا زور ۇلەس قوسقانى ءۇشىن كونسەرۆاتوريا ۇجىمىنا شىنايى ريزاشىلىعىمدى بىلدىرەمىن» دەلىنگەن پرەزيدەنتتىڭ قۇتتىقتاۋ حاتىندا.
ايدا عالىمقىزى ەلدەگى جەتەكشى مۋزىكالىق وقۋ ورنىندا قازاقستان ونەرىنىڭ ءبۇتىن ءبىر تاريحى جاسالعانىن, مۇندا ءبىلىم العان ەلىمىزگە تانىمال كومپوزيتورلار, ورىنداۋشىلار ۇلتىمىزدىڭ ماقتانىشىنا اينالىپ, ەلىمىزدى الەمدىك مۋزىكالىق ارەنادا داڭققا بولەگەنىن اتاپ, وقۋ ورنىنىڭ 13 قىزمەتكەرىنە «ۇزدىك پەداگوگ» توسبەلگىسىن تاقتى.
سالتاناتتى ءىس-شاراعا ەلىمىزدىڭ مادەني قازىناسىنا ولشەۋسىز ۇلەس قوسقان ونەر مايتالماندارى قاتىستى. ولاردىڭ قاتارىندا ءاسانالى ءاشىموۆ, الىبەك دىنىشەۆ, ءجاميليا باسپاقوۆا, روزا رىمباەۆا, ءۇمىتجان جۇماقوۆا, ماريام قوجامقۇلوۆا, الماس الماتوۆ, سەرىك ەركىمبەكوۆ, كاريما ساحارباەۆا, دۇيسەن قاسەيىنوۆ, التىنبەك قورازباەۆ, باسقا دا ونەر قايراتكەرلەرى بار.
كونسەرۆاتوريا ستۋدەنتتەرىنە ەلىمىزگە جانە الەمگە تانىمال ورىنداۋشىلار شەبەرلىك ساباقتارىن ءداستۇرلى تۇردە وتكىزىپ كەلەدى. ولاردىڭ ىشىندە اتاقتى سكريپكاشىلار ايمان مۇساحودجاەۆا, مارات بيسەنعاليەۆ, رەسەيلىك سكريپكاشى نازار كوجۋحار, ديريجەرلەر الان بورىباەۆ پەن ابزال مۇحيتدينوۆ, پيانيست نۇرلان يزمايلوۆ, ءانشى تالعات مۇساباەۆ, ايگۇل ۇلكەنباەۆا سەكىلدى تالانت يەلەرى بار.
«قازاق ۇلتتىق كونسەرۆاتورياسىنىڭ قۇرمانعازى اتاۋىن الىپ ءجۇرۋىنىڭ وزىندە ۇلكەن ءمان بار. كەز كەلگەن قازاققا قۇرمانعازى – كۇي ونەرىنىڭ ەتالونى, شەبەرلىكتىڭ شىڭى. جاھاندانۋ داۋىرىندە حالىق ءوزىنىڭ بولمىسىن تەك مادەنيەت ارقىلى, ونەر ارقىلى ساقتاپ قالادى. ويتكەنى ۇلتتىڭ دامۋىنا ۇلەس قوسىپ, جاستاردى تەكتىلىككە تاربيەلەپ وتىرعان وسىنداي ونەر وردالارى دەپ بىلەمىن», دەيدى ءداستۇرلى ءانشى ا.ۇلكەنباەۆا.
ۇلتتىق ءان-كۇي قورىمىزدىڭ ءىنجۋ-مارجان مۇرالارىمەن قاتار الەمدىك جاۋھارعا بالاناتىن داڭقتى تۋىندىلار اسقاقتاعان ايرىقشا دۋماندى كورەرمەن ءۇش ساعات بويى تاپجىلماي تاماشالادى. كونتسەرت جۇرگىزۋشىلەرى مەرەيلى كەشكە قاتىسقان ونەرپازدار قۇرمانعازى اتىنداعى كونسەرۆاتوريانى تۋعان ۇيىندەي كورەتىن, قايتا-قايتا ورالىپ, جاستىقتىڭ جانە شابىتتىڭ قۋاتىن سەزىنگىسى كەلەتىن ارتىستەردىڭ از عانا بولىگى ەكەنىن ايتىپ, كورەرمەنمەن قيماي قوشتاستى.
الماتى