قازاقستان ونەرپازى ماسكەۋدە وتكەن XXVIII حالىقارالىق «رومانسيادا-2024» ورىس رومانسى بايقاۋىندا ءبىرىنشى ورىن يەگەرى اتاندى, دەپ جازادى Egemen.kz. قر مادەنيەت جانە اقپارات مينيسترلىگى مالىمەتىنە سىلتەمە جاساپ.
توپ جارعان ونەرپاز – قازاق ۇلتتىق ونەر ۋنيۆەرسيتەتىنىڭ «ۆوكالدىق ونەر» كافەدراسىنىڭ 4-كۋرس ستۋدەنتى نۇرسۇلتان انۋاربەك.
«رومانسيادا» – رەسەي فەدەراتسياسىنىڭ مادەنيەت مينيسترلىگىنىڭ قولداۋىمەن وتكىزىلەتىن بايقاۋ. اتالعان بايقاۋ بيىل 28-رەت ءوتىپ, تمد ەلدەرىندە جانە ەۋروپادا ايماقتىق كەزەڭدەرى ۇيىمداستىرىلعان, جەڭىمپازدار ماسكەۋدە وتەتىن فينالعا جولداما العان.
قازاقستاندا بۇنداي بايقاۋ «قازاق رومانسياداسى» اتاۋىمەن تۇركىستان قالاسىندا وتەدى. وندا دا نۇرسۇلتان انۋاربەك جەڭىسكە جەتكەن.
يتاليادا وتكەن «Caruso - De Curtis» حالىقارالىق بايقاۋىندا ءبىرىنشى ورىن, سونداي-اق «قازاق رومانسياداسى» بايقاۋىندا گران-پري يەگەرى نۇرسۇلتان انۋاربەك باسقا دا كوپتەگەن بەدەلدى بايقاۋلاردىڭ لاۋرەاتى جانە رەسپۋبليكالىق بايقاۋلاردىڭ جۇلدەگەرى.