وقۋ-اعارتۋ مينيسترلىگى «حابار» اگەنتتىگىمەن بىرلەسىپ, وقۋشىلار اراسىندا ء«ححى عاسىر كوشباسشىسى» زياتكەرلىك ويىنىن قايتا جاڭعىرتتى.
ەلىمىزدىڭ ينتەللەكتۋالدىق ويىندارى تاريحىنداعى تانىمال جوبالاردىڭ ءبىرى – ء«ححى عاسىر كوشباسشىسى» زياتكەرلىك ويىنى كوپشىلىكپەن قايتا قاۋىشتى. بۇل باستامانى «حابار» اگەنتتىگى وقۋ-اعارتۋ مينيسترلىگىنىڭ قولداۋىمەن جۇزەگە اسىرادى.
بيىل قاراشا ايىندا باستالعان ىرىكتەۋ كەزەڭى ەلىمىزدىڭ بارلىق وڭىرىندە وتكىزىلىپ جاتىر. ىرىكتەۋ كەزەڭى 2025 جىلدىڭ ءساۋىر ايىنا دەيىن جالعاسادى. وڭىرلىك كەزەڭنىڭ ناتيجەسى بويىنشا ءاربىر وبلىستان 5 ۇزدىك وقۋشى رەسپۋبليكالىق كەزەڭگە جولداما الادى. رەسپۋبليكالىق كەزەڭ 2025 جىلدىڭ ناۋرىز-ءساۋىر ايلارىندا الماتى قالاسىندا ۇيىمداستىرىلادى دەپ جوسپارلانىپ وتىر. مۇندا وڭىرلەردەن ىرىكتەلگەن زياتكەر وقۋشىلار ەل بويىنشا ۇزدىكتەر قاتارىنان كورىنۋى ءۇشىن سىنعا تۇسەدى.
ء«ححى عاسىر كوشباسشىسى» زياتكەرلىك ويىنى – جاستاردىڭ بىلىمگە دەگەن قىزىعۋشىلىعىن ارتتىرىپ, ولاردىڭ ويلاۋ قابىلەتى مەن كوشباسشىلىق قاسيەتىن شىڭداۋعا باعىتتالعان بىرەگەي جوبا. ۇيىمداستىرۋشىلاردىڭ ايتۋىنشا, جوبا – ءبىلىم جارىسى عانا ەمەس, جاس تالانتتارعا جاڭا مۇمكىندىك بەرەتىن الاڭ.
بۇل سايىستىڭ ەرەكشەلىگى – تاپسىرمالاردىڭ كوپقىرلىلىعىندا. جالپى, ءبىلىم, لوگيكا, مۋزىكا, ونەر, سپورت سياقتى ءتۇرلى سالانى قامتىعان سۇراقتار قاتىسۋشىلاردىڭ جان-جاقتى ءبىلىم دەڭگەيىن باعالايدى. اۋداندىق كەزەڭدە قاتىسۋشىلارعا 45 مينۋت ۋاقىت بەرىلەدى. وسى ۋاقىتتا ولار 30 سۇراققا جاۋاپ بەرۋى كەرەك. ۋاقىت شەكتەۋلى بولعاندىقتان, تاپسىرمالاردى جىلدام ءارى ناقتى شەشۋ ماڭىزدى. ال وبلىستىق كەزەڭدە باسەكە جوعارى دەڭگەيگە كوتەرىلەدى. مۇندا 75 مينۋت ىشىندە 60 سۇراقتىڭ جاۋابىن تابۋ تالاپ ەتىلەدى. بۇل كەزەڭدە وقۋشىلاردىڭ سىني ويلاۋى مەن جىلدامدىعىن ودان ءارى شىڭداي تۇسەدى.
«بۇل تەلەويىننىڭ وقۋشىلاردىڭ زياتكەرلىك الەۋەتىن دامىتۋعا ايتارلىقتاي ۇلەس قوساتىنىنا جانە ولاردىڭ بىلىمگە, ءوز-ءوزىن جەتىلدىرۋگە ۇمتىلۋىنا سەرپىن بەرەتىنىنە سەنىمدىمىز. جوبا ەڭ تالانتتى, دارىندى كوشباسشىلاردى تانۋعا, تاڭداۋعا سەپتىگىن تيگىزەدى», دەيدى «دارىن» رعپو ديرەكتورى عاجدەمبەك تۇرسىنوۆ.
ايتا كەتەيىك, ء«ححى عاسىر كوشباسشىسى» تەلەويىنى «حابار» رەسپۋبليكالىق تەلەارناسىندا العاش رەت 1999 جىلى جارىققا شىقتى. 25 جىل ىشىندە ول بىرنەشە رەت جاڭارىپ, جوعارى جانە كىشى توپتار فورماتىندا دا ۇسىنىلدى. وقۋشىلاردىڭ ءبىلىمى مەن ينتەللەكتۋالدى دامۋىن ارتتىرۋعا, سونداي-اق ەلىمىزدىڭ بولاشاق زياتكەرلىك الەۋەتىن قالىپتاستىرۋعا باعىتتالعان تەلەجوبا ەندى وقۋ-اعارتۋ مينيسترلىگىنىڭ قولداۋىمەن قايتادان ءوز كورەرمەنىمەن قاۋىشادى.