دزيۋدودان بيىلعى ماۋسىمنىڭ ەڭ سوڭعى جارىسى 7-8 جەلتوقسان ارالىعىندا توكيودا وتەدى. «ۇلكەن دۋلىعا» ساناتىنداعى جارىستان ەلىمىزدىڭ بەتكەۇستار بالۋاندارىنىڭ بارلىعى دا بوساتىلدى. ولاردىڭ ورنىن قوسالقى قۇرامداعى سپورتشىلار باستى.
ەلىمىزدىڭ ەرلەر قۇراماسىنىڭ باس باپكەرى نۇربول سۇلەيمەنوۆ جاپونيا استاناسىنداعى جارىستا داۋرەن سۇيەكەنوۆ پەن شەرزاد داۆلاتوۆ (60 كگ), باقىتجان ءابدىراحمانوۆ (66 كگ), جالعاس قايروللا (73 كگ), ماكسيم مەيىرلان (81 كگ), ادىلەت ساپارعاليەۆ (+100 كگ) سىندى سايىپقىراندارعا سەنىم ارتىپ وتىر. ولاردىڭ بارلىعى دا بۇعان دەيىن بيىك بەلەستەردى باعىندىرماعان دارىندى جاستار. سوندىقتان دا توكيو تاتاميىندە بۇل بالۋانداردىڭ ەڭ بولماعاندا بىرەۋى جەڭىس تۇعىرىنا كوتەرىلسە, سونىڭ ءوزى ۇلكەن جەتىستىككە بالاناتىنى حاق.
ايەلدەر اراسىندا دا تەك ەلىشىلىك جارىستاردا جۇلدە الىپ جۇرگەن دزيۋدوشىلار بەلدەسۋگە شىعادى. بۇل رەتتە باس باپكەر ەرلان الپىسباەۆتىڭ تاڭداۋى تولعاناي ابەۋوۆا (52 كگ), دانا ءابدىروۆا (57 كگ), سامالاي ەرعاليەۆا (63 كگ) , نازگۇل ماراتوۆا مەن كارينا تاكيەۆاعا (+78 كگ) ءتۇستى. نەگىزى وسى دودادا مىقتى بالۋاندارىمىزدىڭ ءبىرى, ازيا ويىندارى مەن قۇرلىق چەمپيوناتىنىڭ قولا جۇلدەگەرى, ەلىمىزدىڭ بىرنەشە دۇركىن چەمپيونى, پاريج وليمپياداسىنا قاتىسۋشى ەسميگۇل كۋيۋلوۆا (63 كگ) كۇش سىناسۋعا ءتيىس ەدى. بىراق سوڭعى ساتتە ونىڭ كۇنشىعىس ەلىنە بارمايتىنى بەلگىلى بولدى.