سەنبى, 30 قاراشا كۇنى استانادا قر مادەنيەت جانە اقپارات ءمينيسترى ايدا بالاەۆانىڭ توراعالىعىمەن يۋنەسكو قورعاۋىنداعى قازاقستاننىڭ تاريحي جانە مادەني مۇراسىن قورعاۋ بويىنشا كەشەندى شارالاردى ازىرلەۋ جونىندەگى جۇمىس توبىنىڭ ەكىنشى وتىرىسى ءوتتى, دەپ حابارلايدى Egemen.kz.
كەشەندى شارالار قازاقستاننىڭ مادەني مۇراسىن قورعاۋ جانە ساقتاۋ باعىتىنداعى ورتالىق جانە جەرگىلىكتى اتقارۋشى ورگانداردىڭ, يۋنەسكو جانە يسەسكو (يسلام الەمىنىڭ ءبىلىم, عىلىم جانە مادەنيەت ۇيىمى) ىستەرى جونىندەگى قر ۇلتتىق كوميسسياسى مۇشەلەرىنىڭ, سونداي-اق تاريحشى عالىمداردىڭ, ارحەولوگتاردىڭ, ەتنوگرافتاردىڭ جانە قوعامدىق ۇيىم وكىلدەرىنىڭ كۇش-جىگەرىن ۇيلەستىرۋگە باعىتتالعان.
بۇل ستراتەگيالىق باستاما قازاقستاننىڭ يۋنەسكو-نىڭ الەمدىك مۇرالار تىزىمىنە ەنگىزىلگەن جانە ەنگىزىلۋى مۇمكىن ماڭىزدى تاريحي جانە ساۋلەت ەسكەرتكىشتەرىن ساقتاۋ مەن ماتەريالدىق ەمەس مادەني مۇرا ەلەمەنتتەرىن قورعاۋعا ارنالعان. ولارعا داستۇرلەر, سالت-جورالار, ءتىل, مۋزىكا, قولونەر جانە باسقا دا قۇندىلىقتار جاتادى.
مينيستر ايدا بالاەۆا وتىرىس بارىسىندا الەمدىك مادەني جانە تابيعي مۇرانى قورعاۋ جونىندەگى كونۆەنتسيانىڭ ەرەجەلەرىن ورىنداۋ ءۇشىن بارلىق مۇددەلى تاراپتاردىڭ جۇيەلى جانە ۇيلەسىمدى جۇمىس ىستەۋ قاجەتتىگىنە ەرەكشە توقتالدى.
جۇمىس توبىنىڭ وتىرىسىندا قازاقستاننىڭ مادەني مۇراسىن قورعاۋ جانە ناسيحاتتاۋ بويىنشا ءۇش كىشى جۇمىس توبىنىڭ جوسپارلارى تانىستىرىلدى:
ماتەريالدىق ەمەس مادەني مۇرا بويىنشا كىشى جۇمىس توبىنىڭ باستى مىندەتى – مۋزەيلەر, قورىقتار, كىتاپحانالار قىزمەتكەرلەرىنىڭ بىلىكتىلىگىن ارتتىرۋ, سونداي-اق جوعارى وقۋ ورىندارىنا پانارالىق ءبىلىم بەرۋ باعدارلامالارىن ەنگىزۋ. بۇل قازاقستاندا ءداستۇرلى قولونەر, نۋميزماتيكا, بونيستيكا, ۇلتتىق ويىندار, ساندىك-قولدانبالى بۇيىمداردى قالپىنا كەلتىرۋ بويىنشا ديپلومدى مامانداردى دايىنداۋعا مۇمكىندىك بەرەدى.
سونىمەن قاتار, مەكتەپتەگى «دەنە شىنىقتىرۋ» پانىنە قازاقتىڭ ءداستۇرلى ويىندارىن ەنگىزۋ ماسەلەسى قاراستىرىلۋدا.
كىشى توپتىڭ جوسپارىندا ماتەريالدىق ەمەس مادەني مۇرانى ينۆەنتاريزاتسيالاۋ, قازاقتىڭ كيىز ءۇيىن, كىلەم توقۋ تەحنولوگياسىن قۇجاتتاندىرۋ بويىنشا زەرتتەۋ جۇمىستارىن ۇيىمداستىرۋ بار.
يۋنەسكو قورعاۋىنداعى نىساندار بويىنشا كىشى جۇمىس توبى الەمدىك مادەني جانە تابيعي مۇرانى قورعاۋ جونىندەگى كونۆەنتسيا شەڭبەرىندە قازاقستانداعى يۋنەسكو قورعاۋىنداعى نىساندارمەن جۇمىس ىستەيدى. باستى مىندەتتەرى – باسقارۋ, قاۋىپسىزدىك جانە ينفراقۇرىلىم ماسەلەلەرىن شەشۋ.
سونىمەن قاتار, ساراپشىلار « ۇلى جىبەك جولى: فەرعانا-سىرداريا ءدالىزى», « ۇلى جىبەك جولى: كاسپي-ەدىل ءدالىزى» سياقتى ترانسۇلتتىق سەريالىق نوميناتسيالار بويىنشا جۇمىستار جۇرگىزۋدە. بۇل باعىتتا اتىراۋ, باتىس قازاقستان, قىزىلوردا جانە ماڭعىستاۋ وبلىستارىنىڭ جەرگىلىكتى اتقارۋشى ورگاندارىمەن بىرلەسكەن جۇمىس اتقارىلۋدا.
قۇجاتتىق مۇرا بويىنشا كىشى جۇمىس توبى يۋنەسكو-نىڭ «الەم جادى» باعدارلاماسى اياسىندا قازاقستاننىڭ قۇجاتتىق مۇراسىن ساقتاۋ جانە ىلگەرىلەتۋ باعىتىندا جۇمىس ىستەيدى. قازىرگى ۋاقىتتا ابايدىڭ «قارا سوزدەرى» مەن ءماشھۇر ءجۇسىپ كوپەي ۇلىنىڭ قولجازبالارىن يۋنەسكو-نىڭ «الەم جادى» تىزىمىنە ەنگىزۋگە دايىندىق جۇمىستارى جۇرگىزىلۋدە.
2003 جىلى بۇل تىزىمگە قوجا احمەت ءياساۋيدىڭ قولجازبالارى, 2005 جىلى «نەۆادا-سەمەي» انتيادرولىق قوزعالىسىنىڭ قۇجاتتارى ەنگىزىلگەن. سونىمەن قاتار, قازاقستاننىڭ جازباشا مۇراسىنىڭ مەملەكەتتىك ءتىزىلىمىن جاساۋ ماسەلەسى قاراستىرىلۋدا.
ءۇش جۇمىس كىشى توبى ۇسىنعان جوسپارلار قازاقستاننىڭ مادەني مۇراسىن قورعاۋ جانە دامىتۋ بويىنشا شارالاردى قامتيدى. بۇل جوسپارلاردى مادەنيەت جانە اقپارات مينيسترلىگى جۇزەگە اسىرادى. اتالعان شارالار قازاقستاننىڭ مادەني مۇراسىن قورعاۋ جانە دامىتۋ ءىسىن جاڭا دەڭگەيگە كوتەرۋگە مۇمكىندىك بەرەدى.