تاريحى تەرەڭ قاسيەتتى قارقارا اۋىلىندا ەڭسەلى ەكىقاباتتى مادەنيەت ءۇيى پايدالانۋعا بەرىلىپ, ەل قۋانىشى ەسەلەندى.
اۋىلدىڭ ورتالىق كوشەسىنىڭ بويىنان ويىپ ورىن العان عيماراتتىڭ سىرت كەلبەتى كوز سۇيسىنتەدى. ال تابالدىرىعىن اتتاپ ىشكە كىرگەن ادامنىڭ رۋحى اسقاقتاپ, جان دۇنيەسىنە مادەنيەتتىڭ ساۋلەسى سەبەزگىلەيدى. بۇدان بىلاي قارقارالىق قارادومالاق بالالاردىڭ بويىنا رۋحاني ءنار بەرىپ, ونەردىڭ قۇدىرەتىن سەزىندىرەتىن مادەنيەت ۇيىنەن ناعىز تالانتتار تاربيەلەنىپ, توماعاسىن سىپىراتىنى تۋرالى سالتاناتتى شاراعا قاتىسقان ەل اعالارى مەن ونەر وكىلدەرى اتاپ ايتتى.
كيەلى ولكەدە قازاقستان رەسپۋبليكاسىنىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ يەگەرى, اكتەر نۇرقانات جاقىپباي, «قۇرمەت» وردەنىنىڭ يەگەرى, جۋرناليست, جازۋشى جاقىپجان نۇرعوجاەۆ, قازاقستاننىڭ ەڭبەك سىڭىرگەن قايراتكەرى, كينو جانە تەاتر اكتەرى ومار قىيقىم, قازاقستاننىڭ ەڭبەك سىڭىرگەن قايراتكەرى, كۇيشى, كومپوزيتور ەرمۇرات ۇسەنوۆ, فيلوسوفيا عىلىمدارىنىڭ دوكتورى, پروفەسسور سۆەتا بەردىباەۆا, قازاق جۋرناليستيكاسىنىڭ قايراتكەرى ساعاتبەك مەدەۋبەك ۇلى جانە باسقا دا ەسىمى ەلگە تانىمال اقىندار مەن قالامى قارىمدى جۋرناليستەردىڭ كىندىگى كەسىلگەنىن ەسكەرەر بولساق, بۇلاردىڭ قاتارى ءالى تالاي دارىندارمەن تولىعا تۇسەرى ايدان انىق.
اۋىل تۇرعىندارى كوپتەن كۇتكەن يگى ءىستىڭ اشىلۋىنا الماتى وبلىسىنىڭ مادەنيەت, ارحيۆتەر جانە قۇجاتتاما باسقارماسىنىڭ باسشىسى دانيار اليەۆ, وبلىستىق دەنە شىنىقتىرۋ جانە سپورت باسقارماسىنىڭ باسشىسى ەربولات سارابەك ۇلى, جازۋشى اقساۋلە ابدىحالىققىزى, ادەبيەت سىنشىسى باعاشار تۇرسىنباي ۇلى مەن قارقارالىق ونەر مايتالماندارى, قوعامدىق ۇيىم وكىلدەرى قاتىستى.
«شالعاي اۋىلداردىڭ ىشكى ءتۇيىندى ماسەلەلەرىن ورنىمەن شەشىپ وتىرۋ – مەملەكەتىمىزدىڭ باستى نازارىندا. وبلىس اكىمى مارات ەلەۋسىز ۇلىنىڭ قولداۋىنىڭ ارقاسىندا اۋداننىڭ مادەنيەت سالاسىنا تىڭ سەرپىن بەرىلدى. وڭىردەگى جالاعاش, بولەكساز, جىلىساي اۋىلدارىندا زاماناۋي مادەنيەت ۇيلەرى سالىنۋدا. قارابۇلاق مادەنيەت ءۇيى كۇردەلى جوندەۋدەن وتكىزىلۋدە. سونىمەن قاتار 157 ملن تەڭگەگە مادەنيەت وشاقتارى جىلجىمالى ساحنا, دىبىس كۇشەيتكىش قۇرالدارمەن, ساحنالىق كيىمدەرمەن تولىعۋدا. جارقىن جوبالاردىڭ جۇزەگە اسۋى – ەڭ الدىمەن, ەلىمىزدىڭ وركەندەپ وسۋىمەن قاتار, جاستارىمىزدىڭ دەنساۋلىعىن نىعايتۋعا, مادەنيەت پەن ونەردىڭ كەڭىنەن تارالۋىنا ىقپال ەتەرى ءسوزسىز», – دەدى اۋدان اكىمى نۇرباقىت تەڭىزباەۆ.
جاڭادان اشىلعان مادەني نىسان اۋىل حالقىنىڭ بوس ۋاقىتىن ءتيىمدى پايدالانۋىنا جانە ءتۇرلى تاقىرىپتاردا مادەني ءىس-شارالار وتكىزۋگە ارنالعان. سپورت زالمەن بىرىكتىرىلگەن مادەنيەت ءۇيى زاماناۋي قۇرىلعىلارمەن تولىقتاي جابدىقتالعان. تىپتەن, ليفت تە ىسكە قوسىلعان. مۇندا مىڭعا تارتا كىتاپ قورى بار كىتاپحانا مەن ونەر ۇيىرمەلەرى جۇمىس ىستەيتىن بولادى.
«كيەلى كەگەن اۋدانىنىڭ كوز سۇيسىنتەر تابيعاتى مەن سىر تۇنعان تاريحىن تاسپالاپ, اۋداننىڭ فوتوشەجىرەسىن جاساۋدامىز. ونى الداعى ۋاقاتتا تابىستايتىن بولامىز. كەلەشەكتە وسى عيماراتتا فوتوگراف بولۋعا نيەتتى بالالار بولسا 2-3 كۇندىك ءدارىس وتكىزىپ, تاجىريبەممەن بولىسۋگە دايىنمىن. مۇنداي ونەر وشاعى بوس تۇرماي, اۋىل بالالارىنىڭ تالانتىن اشىپ, تالابىن ۇشتاۋعا قىزمەت ەتۋى كەرەك», – دەدى تۇرعىنداردى قۋانىشىمەن قۇتتىقتاعان رەسپۋبليكالىق «فوتوونەر» قوعامدىق بىرلەستىگىنىڭ توراعاسى, كاسىبي فوتوگراف اسىلحان ءابدىرايىم ۇلى.
سالتاناتتى شارا بارىسىندا تۋعان اۋىلىنىڭ اجارىن اشىپ, كوركىن كىرگىزگەن مادەنيەت ءۇيىنىڭ سالىنۋىنا اتسالىسقان ازاماتتارعا وسى اۋىلدان تۇلەپ ۇشقان ونەر قايراتكەرلەرى نۇرقانات جاقىپباي مەن ساعاتبەك مەدەۋبەك ۇلى جۇرەكجاردى العىستارىن جەتكىزدى.
بۇدان كەيىن كەڭ سارايداي مادەنيەت ءۇيىنىڭ القىزىل لەنتاسى قيىلىپ, كيمەشەك كيگەن اجەلەر شاشۋ شاشتى. اۋىل حالقى العاش رەت جايلى دا جۇمساق ورىندىققا جايعاسىپ, اۋداندىق كوركەمونەرپازدار ءانسامبىلىنىڭ كونتسەرتتىك باعدارلاماسىن تاماشالادى.
سونداي-اق بۇل كۇنى سپورت زالمەن بىرىكتىرىلىپ سالىنعان عيماراتتا اۋدان ۆولەيبولشىلارىنىڭ اقتىق ويىنى ءوتىپ, جارىس جەڭىمپازدارى قوماقتى قارجى, باعالى سىيلىقتارمەن ماراپاتتالدى. وسىلايشا ونەرپازدار مەن سپورتشىلار قاتار ونەر كورسەتكەن سۋ جاڭا مادەنيەت ءۇيى – جان جادىراتار جارقىن ىستەر مەن جەتىستىكتەردىڭ جىلى ۇياسىنا اينالماق.
الماتى وبلىسى