سەمەي قالاسىنىڭ اۆتوپاركتەرى جاڭا اۆتوبۋستارمەن تولىقتى. جىلدار بويى قوعامدىق كولىك وبلىس ورتالىعىنىڭ باستى پروبلەمالارىنىڭ ءبىرى بولىپ كەلدى. اۆتوبۋس پەن جۇرگىزۋشى جەتىسپەۋىنە, تاسىمالداۋ ماسەلەسىنىڭ شەشىلمەۋىنە قاتىستى جۇرتشىلىق ءجيى شاعىمداناتىن ەدى.
سەمەي قالاسى اكىمدىگىنىڭ دەرەگىنە سۇيەنسەك, جاقىندا 18 جاڭا اۆتوبۋس ساتىپ الىندى, ونىڭ 10-ى ۇلكەن, 8-ءى كىشى كلاستى. ولار جاقىن ارادا جەلىگە شىعىپ, قالا حالقىنا قىزمەت ەتە باستايدى. وتكەن جىلى تاسىمالداۋشى مەكەمە 70 اۆتوبۋس ساتىپ السا, بيىل اۆتوپاركتەر 90 اۆتوبۋسقا جاڭارىپ وتىر.
«جالپى, ءبىز 160 اۆتوبۋس اۋىستىردىق, بۇل – كولىك پاركىنىڭ شامامەن 50%-ىن قۇرايدى. جاڭا شاعىن اۋداندار, ايتالىق, كومسومول كەنتى, قاراعايلى قوعامدىق كولىكپەن قامتىلىپ وتىر, وتكەن جىلى №45 مارشرۋتتى ىسكە قوستىق, بيىل №10 مارشرۋتتى ىسكە قوسىپ جاتىرمىز. سونىمەن قاتار قوعامدىق كولىكتى دامىتۋ جونىندەگى جاڭا, كەشەندى جوسپار دايىندالادى, سونىڭ اياسىندا جاڭا مارشرۋتتار اشىلادى. بيىل تاسىمالداۋشىلار سۋبسيديا الىپ, كولىك پاركىن جاڭارتۋ جۇمىستارىن جۇرگىزىپ جاتىر. ەكى جىل بۇرىن اۆتوبۋس مارشرۋتتارىنىڭ تەحنيكامەن قامتىلۋى 50% بولاتىن, قازىردە بۇل كورسەتكىش 75%-دان جوعارى», دەيدى قالا اكىمى نۇربول نۇرساعاتوۆ.
«اۆتو ترانس سەمەي» جشس اۆتوپاركى ءتۇرلى دەڭگەيدەگى 300-گە جۋىق اۆتوبۋسپەن قامتىلعان, شامامەن 300 جۇرگىزۋشى جۇمىس ىستەيدى. دەگەنمەن D ساناتتى جۇرگىزۋشىلەر تاپشى. بۇگىندە كۇنى جۇرگىزۋشىلەردىڭ اۋىسىمدىق جۇمىس كەستەسى قاراستىرىلىپ جاتىر. ماماندار جۇمىسشىلار سانى جەتكىلىكتى بولعان جاعدايدا قىزمەت كورسەتۋ ەكى اۋىسىممەن جۇرەتىنىن ايتادى. سونىمەن قاتار كەلەسى جىلى ورتا كلاستى 40-50 اۆتوبۋس ساتىپ الۋ جوسپارلانىپ وتىر. بۇعان سەبەپ قازىرگى ۋاقىتتا قولدانىستاعى اۆتوبۋستاردىڭ رەسۋرسى تاۋسىلۋعا جاقىن.
سەمەي قالاسىندا كەلەر جىلدىڭ 1 قاڭتارىنان باستاپ قوعامدىق كولىكتى سۋبسيديالاۋدىڭ جاڭا مودەلى ەنگىزىلەدى. بۇل تۋرالى اباي وبلىستىق كوممۋنيكاتسيالار قىزمەتىندە وتكەن ءباسپاسوز جيىنىندا ءمالىم ەتىلدى. سەمەي قالاسى اكىمىنىڭ ورىنباسارى ادىلەت تۇرىسبەك سۋبسيديالاۋ جۇيەسىمەن تاسىمالداۋشىلاردىڭ اۆتوپاركتەرىن جاڭارتۋعا مۇمكىندىك بار ەكەنىن اتاپ ءوتتى.
«قالادا ەلەكتروندىق بيلەت جۇيەسى بارلىق مارشرۋتتا جۇمىس ىستەپ جاتىر. بىرىڭعاي ديسپەتچەرلىك, باقىلاۋ قىزمەتىنە كەلەر بولساق, اۆتوموبيل جولدارى جانە جۇك كولىگى ءبولىمىنىڭ جولاۋشىلار تاسىمالداۋدى باقىلاۋ ورتالىعىمەن كەلىسىمشارتى بار, ول ديسپەتچەرلىك, باقىلاۋ قىزمەتىن اتقارادى. بارلىق مالىمەت سول جەردەن تاپسىرىس بەرۋشىگە بەرىلەدى, ول ءوز كەزەگىندە وسى مالىمەتتەرگە سايكەس قارجى قاراجاتىن رەتتەيدى», دەيدى ءا.تۇرىسبەك.
2025 جىلى قالاداعى مارشرۋتتىق جەلىلەردى وڭتايلاندىرۋ جوسپارلانىپ وتىر. وسى ماقساتتا ماسەلە تۋدىراتىن مارشرۋتتار مەن ۋچاسكەلەر زەرتتەلىپ, ءتيىستى شارالار قابىلدانادى. اكىمدىك مالىمەتىنشە, وسى ۋاقىتقا دەيىن تاسىمالداۋشىلار ءبىر جولاۋشىعا تاريف ەسەپتەۋ نەگىزىندە سۋبسيديا الىپ كەلسە, جاڭا سۋبسيديالاۋ مودەلىنە كوشۋ ارقىلى تاسىمالداۋشىلار وزدەرىنىڭ جۇرگەن كيلومەترىن كوبەيتۋگە, ال سول ارقىلى سۋبسيديا كولەمىن ارتتىرۋعا مۇددەلى بولادى.
سەمەي