ۇلتتىق بانكتىڭ اقشا-كرەديت ساياساتى كوميتەتى بازالىق مولشەرلەمەنى +/- 1 پ.ت. دالىزىمەن جىلدىق 15,25% دەڭگەيىندە بەلگىلەۋ تۋرالى شەشىم قابىلدادى. شەشىم جاڭارتىلعان بولجامدار مەن ينفلياتسيا تاۋەكەلدەرى بالانسىنىڭ باعالاۋىن ەسكەرە وتىرىپ قابىلداندى, دەپ حابارلايدى Egemen.kz.
سونىمەن قاتار ەلىمىزدە جىلدىق ينفلياتسيا قازان ايىندا 8,5%-عا دەيىن ءوستى. بۇل ء«تاريفتى ينۆەستيتسياعا ايىرباستاۋ» باعدارلاماسىن ىسكە اسىرۋ اياسىندا رەتتەلەتىن قىزمەتتەردىڭ ايتارلىقتاي قىمباتتاۋىنا جانە تەڭگەنىڭ السىرەۋىنە بايلانىستى ەكەنى ايتىلدى.
ال جاھاندىق ينفلياتسيا باياۋلاپ بارادى. بۇل دامىعان ەكونوميكالارداعى ەڭبەك نارىعىنداعى جاعدايدىڭ تۇراقتانۋى جانە نەعۇرلىم باياۋ ىسكەرلىك بەلسەندىلىكتى قوسا العاندا, سىرتقى مونەتارلىق تالاپتاردىڭ بىرتىندەپ جەڭىلدەۋىنە اكەلىپ جاتىر. الايدا سىرتقى ينفلياتسيالىق قىسىم سوڭعى ايلاردا ارتىپ كەلە جاتىر. وعان ازىق-ت ۇلىكتىڭ الەمدىك باعاسىنىڭ ءوسۋى, رەسەيدەگى جوعارى ينفلياتسيا مەن ايتارلىقتاي باعامدىق اۋىتقۋلار سەبەپ بولعان.
«2024 جىلعا بولجانعان ينفلياتسيا 8-9%-عا دەيىن ناقتىلاندى. 2025 جىلعا ارنالعان بولجام – 6,5-8,5%-عا دەيىن, 2026 جىلعا ارنالعان بولجام 5,5-7,5%-عا دەيىن ءوسۋ جاعىنا قاراي قايتا قارالدى. ينفلياتسيانىڭ ورنىقتى بولىگى 2026 جىلى 5%-عا جاقىن قالىپتاسادى. جالپى ينفلياتسيا 2027 جىلى نىساناعا جاقىن قالىپتاسادى دەپ كۇتىلەدى. الداعى جىلدارعا ينفلياتسيا بويىنشا نەعۇرلىم جوعارى بولجام فيسكالدىق ىنتالاندىرۋدىڭ كەڭەيۋىنە, تۇرعىن-ءۇي كوممۋنالدىق قىزمەتتەر (تكق) رەفورمالارىنىڭ جالعاسۋىنا, ايىرباستاۋ باعامىنىڭ السىرەۋىنە جانە سىرتقى ينفلياتسيالىق قىسىمنىڭ كۇشەيۋىنە بايلانىستى. ينفلياتسيا بولجامىنىڭ تاۋەكەلدەرى ىشكى سۇرانىس تاراپىنان قىسىمنىڭ وسۋىنە, سىرتقى ينفلياتسيانىڭ جەدەلدەۋىنە جانە ينفلياتسيالىق كۇتۋلەردىڭ ارتۋىنا بايلانىستى. سونىمەن قاتار مەملەكەتتىك قارجىنى تۇراقتاندىرۋ قۇرالدارىنا قاتىستى بەلگىسىزدىك ساقتالىپ وتىر. رەتتەلەتىن باعالار مەن تاريفتەردىڭ ودان ءارى ءوسۋى, ونىڭ قارقىنى مەن مەرزىمى دە بولجامنىڭ ماڭىزدى تاۋەكەلى بولىپ قالىپ وتىر», دەلىنگەن حابارلامادا.
سونداي-اق 2024 جىلعا بولجانعان قازاقستان ەكونوميكاسىنىڭ ءوسۋى 4-4,5% دەڭگەيىندە ناقتىلاندى. 2025 جانە 2026 جىلدارعا ارنالعان بولجام تيىسىنشە 4,5-5,5% جانە 4,6-5,6%-عا دەيىن قايتا قارالدى. نەعۇرلىم تومەن بولجامدار مۇنايدىڭ ستسەناريلىك باعاسىنىڭ تومەندەۋىنە جانە بىرقالىپتى سىرتقى سۇرانىسقا بايلانىستى.
ۇلتتىق بانكتىڭ باعالاۋى بويىنشا بولجامدى كەزەڭ ىشىندە ەكونوميكا ىشكى ۇسىنىس مۇمكىندىكتەرىنەن اسىپ تۇسەتىن سۇرانىستىڭ كەڭەيۋى جاعدايىندا وسەدى. بۇل ورنىقتى تۇردە پروينفلياتسيالىق قىسىم كورسەتەتىن بولادى.
قارجى جانە ەنەرگەتيكا نارىقتارىنداعى قۇبىلمالىلىقتى ەسكەرە وتىرىپ, كوميتەت ينفلياتسيانى ورنىقتى باياۋلاۋ تراەكتورياسىنا تەزىرەك قايتارۋ جانە 5%-دىق تارگەتكە جەتۋ ءۇشىن جاقىن ارادا شەشىم قابىلداۋ كەزىندە اقشا-كرەديت ساياساتىن قوسىمشا قاتاڭداتۋ قاجەتتىلىگىن مۇقيات باقىلايتىن بولادى.