سەمەيدە جاڭادان اشىلعان, انگيوگراف اپپاراتى ورناتىلعان رەنتگەنەندوۆاسكۋليارلىق وپەراتسيا بولمەسى – مەديتسينا مۇمكىندىكتەرىن كەڭىنەن پايدالاناتىن ورىنداردىڭ ءبىرى. بۇل اپپاراتتى قولدانۋ ارقىلى كارديولوگيالىق, اريتمولوگيالىق, انگيوحيرۋرگيالىق, كارديوحيرۋرگيالىق, جۇيكە جۇيەسى, جالپى قان اينالىمى جۇيەسى اۋرۋلارىن ەمدەۋگە, گيبريدتى تەحنولوگيالاردى دامىتۋعا جاعداي جاسالعان.
مۇندا رەنتگەنەندوۆاسكۋليارلىق وپەراتسيالاردى ورىنداۋ ينفاركت, ينسۋلت, باسقا دا قاۋىپتى اۋرۋلاردى ەمدەۋدە مەديتسينالىق كومەك كورسەتۋ ساپاسىن جاقسارتۋعا جول اشادى. انگيوگراف – بۇكىل دەنەنىڭ, سونىڭ ىشىندە جۇرەك تامىرلارى, مي, مويىن, كەۋدە جانە ءىش قۋىسى, اياق-قولداعى تامىر پاتولوگياسىن انىقتايتىن زاماناۋي قۇرال-جابدىق.
كۇردەلى وپەراتسيالار جۇرگىزىلەتىن بىرەگەي بولمەدە رەنتگەنحيرۋرگيالىق وپەراتسيالار ەڭ الدىمەن از ءينۆازيۆتى ءادىس ارقىلى جۇزەگە اسادى. بۇعان قوسا بارلىق مانيپۋلياتسيا تومەن تراۆماتيكالىق تاسىلدەر (شاعىن كەسۋ نەمەسە تامىر پۋنكتسيالارى) ارقىلى اتقارىلادى. مۇندا ارنايى ەم-دوم قابىلداعان, ياعني كۇردەلى وپەراتسيا جاسالعان ناۋقاس تەز ارادا قالپىنا كەلىپ, قىسقا مەرزىم ىشىندە ساۋىقتىرىلاتىنى عىلىمي تۇرعىدا دالەلدەنگەن.
رەنتگەنحيرۋرگيا ءبولىمىنىڭ مەڭگەرۋشىسى باۋىرجان ازيزوۆ سەمەي مەديتسينا ۋنيۆەرسيتەتىنىڭ گوسپيتالىندە اشىلعان جاڭا ورتالىقتىڭ كەلەشەكتە كەڭ كولەمدە قىزمەت كورسەتەتىنىن ايتادى.
«بۇل ءبولىم ۋنيۆەرسيتەت رەكتورى, پروفەسسور التاي احمەتقالي ۇلىنىڭ ارنايى باستاماسى نەگىزىندە اشىلىپ وتىر. سەمەي وڭىرىڭدە جوعارى تەحنولوگيالىق رەنتگەنحيرۋرگيالىق كومەكتىڭ كەڭسپەكترلى وپەراتسيالارى 2013 جىلدان بەرى تاجىريبەلى ماماندارمەن بىرگە اتقارىلىپ كەلەدى. جىلىنا 4000-عا جۋىق ناۋقاسقا كومەك كورسەتۋگە, ونىڭ ىشىندە 2500 دياگنوستيكالىق, 1500 ەمدىك ماقساتتاعى وپەراتسيا جاساۋعا بولادى. ءبولىمىمىز جاڭا قوندىرعىمەن تولىققان سوڭ, ناۋقاستارعا كومەك كورسەتۋ ارتا تۇسەدى. جابدىقتا ساۋلەلەنۋ دوزاسىن شەكتەۋ مەحانيزمدەرى بار, بۇل ناۋقاستىڭ دەنەسىنە ساۋلەلەنۋدىڭ تومەن اسەرىن تيگىزەدى. سوندىقتان انگيوگرافيالىق زەرتتەۋ ءىس جۇزىندە قاۋىپسىز. زەرتتەۋ الدىندا ناۋقاس پەن پەرسونالعا ساۋلەلەنۋدىڭ اسەرىن ازايتۋ ماقساتىندا قوسىمشا شارالار قابىلدانىپ, دوزالارى ەسەپتەلەدى», دەيدى باۋىرجان ءسلام ۇلى.
جاڭا انگيوگراف بولمەسى اتالعان ۋنيۆەرسيتەتتىڭ گوسپيتالىندە ۇسىنىلاتىن مەديتسينالىق قىزمەتتەردىڭ اۋقىمىن كەڭەيتىپ, جۇرەك, قان تامىرى جۇيەسى اۋرۋلارىنا شالدىققان ناۋقاستارعا كومەك قولىن سوزىپ, ولاردىڭ اۋرۋدى جەڭۋىنە بارىنشا جاعداي جاسايدى. سونىمەن قاتار بارلىق ساناتتاعى پەريفەريالىق تامىرلاردىڭ پاتولوگياسىمەن اۋىراتىن ناۋقاستارعا ەندوۆاسكۋليارلىق ارالاسۋ مەن رەكونسترۋكتسيالىق-گيبريدتى وپەراتسيالار جۇرگىزەدى. جاڭا زاماناۋي تەحنولوگيالاردى ەنگىزۋ مەديتسينا ۋنيۆەرسيتەتىنىڭ ستۋدەنتتەرى مەن رەزيدەنتتەرىنە ءبىلىمىن بايىتىپ, بىلىكتىلىگىن كوتەرۋگە ىقپال ەتەدى.
وڭىردەگى مەديتسينا سالاسىن قالىپتى دامىتۋ, ناۋقاستارعا قىزمەت كورسەتۋ ساپاسىن ارتتىرۋ جۇمىستارى الداعى ۋاقىتتا دا جالعاسىن تابادى. زامان تالابىنا ساي جابدىقتالعان مەديتسينالىق تەحنولوگيالاردى پايدالانۋ ارقىلى دارىگەرلەردىڭ جۇمىسى ءبىرشاما جەڭىلدەتىلەدى. دەرەكتەرگە سۇيەنسەك, كەيىنگى 10 جىل ىشىندە اتالعان ورتالىق دارىگەرلەرى 16 مىڭنان استام ادامعا انگيوگرافيالىق وپەراتسيا جاساعان. اق حالاتتى ابزال جانداردىڭ ارالاسۋىمەن شامامەن 6 مىڭ ادامنىڭ جۇرەگىنە ستەنت قويىلىپ, ءومىرىن ۇزارتۋ مۇمكىندىگى ويداعىداي جۇزەگە اسقان.
بۇگىندە ەلىمىزدىڭ تۇكپىر-تۇكپىرىندە عانا ەمەس, الەمنىڭ ءار تارابىندا مەديتسينا سالاسىندا ساپالى قىزمەت اتقارىپ جۇرگەن تالاي-تالاي بىلىكتى مامانداردى دايارلاعان سەمەي مەديتسينا ۋنيۆەرسيتەتىندە 6 مىڭنان استام ستۋدەنت ءبىلىم الادى. سونىڭ ىشىندە مىڭنان استامى – 11 مەملەكەتتەن كەلگەن شەتەلدىك ىزدەنۋشىلەر.
سەمەي