استانا. 1 اقپان. «استانا» باسكەتبول كومانداسى ۆتب بىرىڭعاي ليگاسىنىڭ 18-تۋرىندا چەحيالىق «نيمبۋركتەن» 82:84 ەسەبىمەن جەڭىلدى. بۇل تۋرالى egemen.kz حابارلادى.
استاناداعى «سارىارقا» رەسپۋبليكالىق ۆەلوترەگىندە وتكەن ويىندا العاشقى كەزەڭ تەڭ جاعدايدا ءوربىدى. ناتيجەسىندە, قارسىلاستار ۇزىلىسكە 19:19 ەسەبىمەن تارقاستى.
اتالمىش تۋرنير اياسىندا «استانا» سوڭعى ءۇش ويىندا قارسىلاستارىنا ەسە جىبەرسە, «نيمبۋركتىڭ» مۇنداي ساتسىزدىك سەرياسى جەتەۋگە جەتكەن. سوندىقتان قوس تاراپ تا بۇل ويىنعا ەرەكشە كوڭىل ءبولدى. اسىرەسە, «استاناعا» جەڭىس اۋاداي قاجەت ەدى. العاشقى اينالىمدا چەحيادا وتكەن ويىندا «نيمبۋرك» باسىم بولدى. سول سەبەپتى, ءبىزدىڭ كوماندا ءوز جانكۇيەرلەرى الدىندا ەسە قايتارۋعا تىرىستى.
ەكىنشى كەزەڭدى الاڭ يەلەرى وتە شيراق باستادى. كوماندا ساپىنداعى قوس امەريكالىق دجەرري دجونسون مەن دجەكوۆان براۋن بىرنەشە مارتە قوناقتاردىڭ قورعانىسىن بۇزىپ ءوتىپ, قورجىنعا ماڭىزدى ۇپايلار سالدى. قارسىلاستىڭ ۇزىلىستەن كەيىنگى قارقىنىن كورگەن «نيمبۋركتىڭ» باس باپكەرى كياستۋتيسا كەمزۋرا ءۇزىلىس الىپ, شاكىرتتەرىنىڭ جىگەرىن جانىپ كوردى. دەگەنمەن, بۇل كەزەڭدە قوناق كوماندانىڭ وسالدىعى انىق بايقالدى. باپكەر كەڭەسىنەن قورىتىندى شىعارعانداي بولعان چەحيالىقتار ءوز ۇپايلارىن مولايتقانىمەن, «استانانى» باسىپ وزۋعا شامالارى جەتپەدى. سوعان سايكەس, ۇلكەن ۇزىلىسكە ءبىزدىڭ كوماندا باسىمدىقپەن اتتاندى. العاشقى 20 مينۋتتىڭ قورىتىندىسى بويىنشا ەسەپ «استانانىڭ» پايداسىنا 46:38 بولاتىن.
ءۇشىنشى كەزەڭدە قوناقتار بارىن سالدى. اسىرەسە, چەستەر سيمونس, داريۋس ۆاشينگتون جانە گەررەت شتۋتس سىندى ويىنشىلارى بەلسەندىلىك تانىتىپ, بىرنەشە مارتە ۇشۇپايلىق ايماقتان نىسانانى ءدال كوزدەدى. دەسەك تە, «نيمبۋركتىڭ» ءار ناتيجەلى ۇپايىنا الەكساندر تريفۋنوۆيچ شاكىرتتەرى لايىقتى جاۋاپ بەرىپ وتىردى. سوعان وراي, سپورت كەشەنىنە جينالعان جانكۇيەرلەر بۇل كەزەڭ دە «استانانىڭ» باسىمدىعىمەن اياقتالاتىنىنا سەنىمدى بولعان. سەبەبى, كەلەسى ۇزىلىسكە نەبارى 2 مينۋت قالعان كەزدە الاڭ قوجايىندارى 62:55 ەسەبىمەن الدا تۇردى. وكىنىشكە قاراي, سول ەكى مينۋتتىڭ ىشىندە قوناقتار 7 ۇپاي يەمدەنىپ, ۇزىلىسكە دەيىن تارازى باسىن تەڭەستىرىپ كەتتى.
شەشۋشى كەزەڭ الدىندا تابلودا 62:62 ەسەبى كورسەتىلىپ تۇردى. سوندىقتان سوڭعى 10 مينۋتتا ناعىز «جان بەرىپ, جان الىسار» تارتىس بولارى ءسوزسىز ەدى. ءتورتىنشى كەزەڭ باستالىسىمەن چەحتار ويىن تىزگىنىن ءوز قولدارىنا الىپ, بىردەن جويقىن شابۋىلعا كوشتى. اسىرەسە, پەتر بەندانىڭ قارقىنىنا ءبىزدىڭ قورعاۋشىلار توتەپ بەرە المادى. سونىڭ ناتيجەسىندە, بەندا جالعىز ءوزى كەزەڭنىڭ العاشقى ءۇش مينۋتىندا 8 ۇپاي جيناپ ۇلگەردى. ەندى تارازى باسىن تەڭەستىرۋ ماسەلەسى استانالىقتارعا اۋىستى. تارتىس تۇگەسىلەر تۇستا ويىنداعى باسىمدىققا يە بولعانىمەن, كوماندامىز جەڭىسكە جەتۋدىڭ جولىن تابا المادى. كەزەڭ باسىنداعى بەلسەندىلىكتىڭ ارقاسىندا ۇپاي سانىن كوبەيتىپ العان قوناقتار 84:82 ەسەبىمەن جەڭىسكە جەتت. ال «استانا» ليگا اياسىندا وسىمەن ءتورتىنشى ويىن قاتارىنان جەڭىلىس تاپتى. ويىن بارىسىندا «نيمبۋرك» ساپىنداعى د.ۆاشينگتون 24 ۇپاي جيىپ, كەزدەسۋدىڭ ەڭ مەرگەن ويىنشىسى اتاندى «استانا» ويىنشىلارى اراسىنان ەڭ كوپ ۇپاي جيعان نيك كەينەر-مەدلي. ول كومانداسى جيعان 82 ۇپايدىڭ 21-ءىن ءوز ەنشىسىنەن جازدى.
ازىرگە ا.تريفۋنوۆيچ باپكەر «استانانىڭ» ويىن ورنەگىنە وڭ وزگەرىس ەنگىزە الماي كەلەدى. ەۆروچەللەدج تۋرنيرىندەگى ويىنداردى قوسار بولساق, بۇل ەلوردالىقتاردىڭ قاتارىنان بەسىنشى جەڭىلىسى. بۇگىنگە دەيىن ۆتب ليگاسىندا 16 ويىن وتكىزگەن كوماندامىز سونىڭ 10-ىندا قارسىلاسىنا ەسە جىبەرگەن. سوعان سايكەس, تۋرنير كەستەسىندە 10-ساتىدا كەلەدى. بۇل كورسەتكىش پلەي-وفف كەزەڭىنەن تىس قالدىراتىنى بەلگىلى. اتالمىش كەزەڭدە ويناۋ ءۇشىن ۇزدىك 8 كوماندانىڭ قاتارىنا قوسىلۋ كەرەك.
استاناداعى جەڭىستەرىنە قاراماستان «نيمبۋركتىڭ» دە جاعدايى ءماز ەمەس. ولار بۇگىندە ليگادا وينايتىن 16 كوماندانىڭ ىشىندە 14-ورىندا تۇر.
«استانا» ليگا اياسىنداعى كەلەسى ويىندى 8 اقپان كۇنى رەسەيدىڭ ۆولگوگراد قالاسىندا جەرگىلىكتى «كراسنىي وكتيابر» كومانداسىنا قارسى وتكىزەدى.
ەلامان قوڭىر.
دەرەكە: egemen.kz.
سۋرەت: vtb-league.com.