سەمەي قالاسىندا ءماسليحاتتاردىڭ قۇرىلعانىنا 30 جىل تولۋىنا ارنالعان وبلىستىق فورۋم وتكىزىلدى. ءىس-شاراعا 450-دەن اسا قاتىسۋشى جينالدى. ولاردىڭ قاتارىندا پارلامەنت سەناتىنىڭ دەپۋتاتتارى قايرات تاستەكەەۆ پەن اينۇر ارعىنبەكوۆا, «قازاقستان ءماسليحاتتارى دەپۋتاتتارىنىڭ بىرلەستىگى» توراعاسى تولەۋبەك مۇقاشەۆ, سونداي-اق ارداگەرلەر مەن بارلىق دەڭگەيدەگى دەپۋتاتتار بار.
فورۋمدا دەموكراتيا مەن جەرگىلىكتى ءوزىن-ءوزى باسقارۋ جۇيەسىن نىعايتۋداعى ءماسليحاتتاردىڭ ءرولى اتالدى. حالىقپەن قارىم-قاتىناستى نىعايتۋدا, ەل ىشىندە قوردالانعان ماسەلەلەردى جەرگىلىكتى بيلىككە جەتكىزۋدە دەپۋتاتتاردىڭ اتقاراتىن قىزمەتى دە شەت قالعان جوق. وبلىستىق, قالالىق جانە اۋداندىق ءماسليحاتتاردىڭ قۇرىلۋى – ەلىمىزدىڭ دەموكراتيالىق دامۋىنداعى ماڭىزدى بەلەستەرىنىڭ ءبىرى ەكەنى داۋسىز. حالىق پەن بيلىك اراسىنداعى «التىن كوپىر» بولعان بۇل مەملەكەتتىك ينستيتۋت ەلدىك مۇددە جولىندا ءوزىنىڭ تيىمدىلىگىن كورسەتىپ كەلە جاتىر.
«اباي ەلى قايتا تۇلەپ, ەڭسە كوتەرگەندە دە, ءبىزدىڭ دەپۋتاتتىق كورپۋس ءوزىنىڭ ساياسي بەلسەندىلىگى مەن جاۋاپكەرشىلىگىن كورسەتە ءبىلدى. ورايى كەلگەندە, ءوڭىردىڭ الەۋمەتتىك-ەكونوميكالىق دامۋىنا زور ۇلەسىن قوسقان بارشا دەپۋتاتتارعا شىنايى ريزاشىلىعىم مەن العىسىمدى بىلدىرگىم كەلەدى», دەدى جيىندا ءسوز العان ءوڭىر باسشىسى نۇرلان ۇران- حاەۆ.
فورۋم بارىسىندا قوعامدىق جۇمىستارعا بەلسەنە ارالاسىپ, قاراپايىم حالىقتىڭ العىسىنا بولەنگەن دەپۋتاتتار پارلامەنت سەناتى مەن ءماجىلىسىنىڭ, مينيسترلىكتەردىڭ, سونداي-اق وبلىس اكىمىنىڭ جانە وبلىس ءماسليحاتى توراعاسىنىڭ قۇرمەت گراموتالارى مەن العىسحاتتارى تابىستالدى. ەلىمىزدىڭ دامۋىنا ەلەۋلى ۇلەس قوسقان دەپۋتاتتارعا ارنايى ماراپات – «قۇرمەتتى دەپۋتات» اتاعى بەرىلدى.
سەمەي