استانادا ء«تارتىپتى وزىڭنەن باستا!» تاقىرىبىندا كەڭەس بەرۋ ءىس-شاراسى ءوتتى, دەپ حابارلايدى Egemen.kz قالا اكىمدىگىنىڭ ءباسپاسوز قىزمەتىنە سىلتەمە جاساپ.
جيىنعا قر پارلامەنتى ءماجىلىسىنىڭ دەپۋتاتتارى مۇرات ابەنوۆ, جارقىنبەك امانتاي ۇلى, رەسپۋبليكالىق اكەلەر وداعى استانا قالاسى فيليالى توراعاسىنىڭ ورىنباسارى مارات كوشكىنباەۆ, ەكونوميكا سالاسىنداعى حالىقارالىق ساراپشى ەرعالي مۇقان ۇلى, قر وقۋ-اعارتۋ مينيسترلىگى «وركەن» بالالاردىڭ ءال-اۋقاتىن ارتتىرۋ ۇلتتىق عىلىمي-پراكتيكالىق ينستيتۋتىنىڭ باس عىلىمي قىزمەتكەرى, فيلوسوفيا دوكتورى ارىستان ساتانوۆ, «تۇران-استانا» ۋنيۆەرسيتەتىنىڭ رەكتورى گۇلجامال جاپاروۆا, «ۇلتتىق قۇندىلىقتار اكادەمياسى» رەسپۋبليكالىق قوعامدىق بىرلەستىگىنىڭ توراعاسى ءادىلحان دۇيسەبەك, سونداي-اق ستۋدەنتتەر قاتىستى.
«باستى ماقسات – بيلىك پەن قوعامنىڭ بەلسەندى ازاماتتارىن بىرىكتىرۋ, جاستار اراسىنداعى ماسەلەلەر بويىنشا وي ءبولىسۋ. جاقىندا وتكەن وسىنداي ءبىر كەزدەسۋدە ستۋدەنتتەر ونلاين-نەسيە, الاياقتىق, ناشاقورلىق تاقىرىپتارىن كوتەردى. كەيىن ءبىز بۇلاردى جان-جاقتى زەرتتەپ, شەشۋ جولدارىن قاراستىرامىز. بۇگىنگى ءىس-شارا تاقىرىبى ء«تارتىپتى وزىڭنەن باستا!» دەپ اتالادى. ءار ادام ءتارتىپتى وزىنەن باستاۋى كەرەك», دەدى مۇرات ابەنوۆ.
اتالعان ءىس-شارانى «ازاماتتىق سەكتور مەن جەرگىلىكتى اتقارۋشى ورگاندار اراسىندا سەنىمدى ديالوگتى قالىپتاستىرۋ» جوباسى اياسىندا استانا قالاسى اكىمدىگى مەن «سەرپىن» الەۋمەتتىك دامۋ ۇلتتىق قورى ۇيىمداستىرىپ وتىر.
ديالوگتىق الاڭدا زاڭ مەن ءتارتىپتى قوعامدىق ورتادا دارىپتەۋ, جاستاردىڭ قۇقىقتىق ساۋاتتىلىعىن, جاۋاپكەرشىلىگى مەن ازاماتتىق بەلسەندىلىگىن ارتتىرۋ, زياندى ارەكەتتەر مەن زورلىق-زومبىلىقتىڭ الدىن الۋ جولدارى تالقىلاندى.
سونداي-اق وتىرىس بارىسىندا سالا ماماندارى «جاستاردىڭ الەۋمەتتىك ماسەلەلەرى جانە ولاردى شەشۋدىڭ قۇقىقتىق-نورماتيۆتىك نەگىزدەرى» تاقىرىبىندا ستۋدەنتتەرگە كاسىبي قۇقىقتىق كەڭەستەرىن بەردى.