ەلوردا تورىندە ورنالاسقان ۇلتتىق ارحيۆتە مادەنيەت جانە اقپارات مينيسترلىگىنىڭ ۇيىمداستىرۋىمەن «ارحيۆ-2025: ناتيجەلەر مەن ماسەلەلەر» اتتى رەسپۋبليكالىق عىلىمي-تاجىريبەلىك كونفەرەنتسيا ءوتتى.
باسقوسۋعا اتالمىش ۆەدومەستۆو وكىلدەرى, رەسپۋبليكالىق جانە وڭىرلىك مەملەكەتتىك ارحيۆتەردىڭ قىزمەتكەرلەرى, مامان تاريحشىلار قاتىسىپ, ءىس-شارا بارىسىندا «ارحيۆ-2025» جوباسى اياسىندا شەتەلدەردەگى ەلىمىز تاريحىنا قاتىستى قۇجاتتاردى انىقتاۋ, كوشىرۋ, تسيفرلاۋ جانە جاريالاۋ باعىتىندا جاسالعان جۇمىستار تالقىلاندى.
كونفەرەنتسيا اياسىندا قازاقستان تاريحىنا قاتىستى بىرەگەي قۇجاتتار كورمەسى ۇيىمداستىرىلدى. ەكسپوزيتسيادا رەسەي, گەرمانيا, موڭعوليا, بەلارۋس, ارمەنيا, تۇركيا سياقتى مەملەكەتتەردىڭ ارحيۆتەرىنەن اكەلىنگەن قۇجاتتار قويىلدى.
اتاپ ايتار بولساق, الاش ارىسى جۇماباەۆ ماعجان بەكەن ۇلىنىڭ 1923-1925 جىلدارداعى جەكە ءىسى; ءاز جانىبەك حانعا قاتىستى 1334 جىلى جازىلعان تاريحي قولجازبا; تەمىر حاننىڭ 918 جىلى سايبەك حانعا ەلشى جىبەرىپ, بۇرىندىقپەن مامىلەگە كەلۋى تۋرالى دەرەك; قازاق جەرىندەگى 1784 جىلدار شاماسىندا بوي كوتەرگەن كونە قالالار كورىنىسى; وتكەن عاسىردىڭ ورتاسىندا شىڭجان-التايدان ۇندىستانعا كوشكەن قازاقتاردى كاشميرگە قابىلداۋ قۇجاتتارىنىڭ كوشىرمەسى جانە 1918 جىلى كۇزدە تۇركىستان اۆتونومياسىنىڭ بۇرىنعى پارلامەنت توراعاسى سەرالى لاپيننىڭ گەرمانياعا جولداعان ۆيزيتكاسى قاتارلى ت.ب. قۇندى جادىگەرلەر قويىلىپتى.
سونداي-اق ءىس-شارا اياسىندا «ماتەريالى ي دوكۋمەنتى روسسيسكوگو گوسۋدارستۆەننوگو ۆوەننو-يستوريچەسكوگو ارحيۆا پو يستوري كازاحستانا XIX ۆەكا» اتتى قۇجاتتار جيناعىنىڭ تۇساۋكەسەرى ءوتتى.
ءاز جانىبەك حانعا قاتىستى 1334 جىلى جازىلعان تاريحي قولجازبا.
1918 جىلى كۇزدە گەرمانياعا جىبەرگەن تۇركىستان اۆتونومياسى
بۇرىنعى پارلامەنت توراعاسى سەرالى لاپيننىڭ ۆيزيتكاسى