استانا. 31 قاڭتار. يسپانيا مەن سلوۆاكيادا ءوتىپ جاتقان قىسقى ۋنيۆەرسيادانىڭ 6-كۇنى قازاقستان قورجىنىنا تاعى ءۇش كۇمىس مەدال ءتۇستى. بۇل تۋرالى egemen.kz حابارلادى.
ەرلەر اراسىنداعى شاڭعىمەن ەستافەتالىق جارىستا جىگىتتەرىمىز مارەگە ەكىنشى بولىپ جەتىپ, كۇمىس مەدالعا قول جەتكىزدى. كوماندا ساپىندا الەكساندر مالىشەۆ, ەۆگەني ۆەليچكو, ەۆگەني بوندارەنكو جانە مارك ستاروستين بولدى. 4ح7,5 شاقىرىمعا سوزىلعان جارىستا رەسەيلىك شاڭعىشىلار ۋنيۆەرسيادا چەمپيونى اتاندى. ولار اتالعان قاشىقتىقتى 1 ساعات 22 مينۋت 49,0 سەكۋندتا ءجۇرىپ ءوتتى. ال ءبىزدىڭ جىگىتتەر جەڭىمپازداردان 1:53,7 ۋاقىت قالىپ قويدى. قولا جۇلدە چەحيالىقتارعا بۇيىردى. ولار مارەگە رەسەيلىكتەردەن 2:57,0 ۋاقىت كەشىگىپ جەتتى.
كەلەسى كۇمىس مەدالدىڭ يەگەرلەرى بياتلونشى قىز-جىگىتتەرىمىزدىڭ ەنشىسىندە. بياتلوننان ارالاس ەستافەتا بويىنشا 2ح6+2ح7,5 شاقىرىمدىق جارىستا باق سىناعان سپورتشىلارىمىز گالينا ۆيشنەۆسكايا, اننا كيستانوۆا, ماكسيم براۋن جانە ۆاسيلي پودكورىتوۆ رەسەيلىك قارسىلاستارىن عانا العا جىبەرىپ, مارەگە ەكىنشى بولىپ كەلدى. قولا جۇلدەنى ۋكراينالىق سپورتشىلار ولجالادى. جارىس جولىندا بياتلونشىلار 8 مارتە نىسانا كوزدەگەنىن ايتا كەتەيىك. ۇزدىك ۇشتىكتىڭ ۋاقىت كورسەتكىشتەرى مىناداي:
رەسەي – 1:36:38,4 (0+6);
قازاقستان – +33,2 (0+7);
ۋكراينا – +49,2 (4+8).
التىنشى جارىس كۇنى قورجىنىمىزعا تۇسكەن ءۇشىنشى كۇمىس مەدالدى شاڭعىشى قىزدارىمىز ولجالادى. ولار 3ح5 شاقىرىمدىق ەستافەتالىق جارىستا تاعى دا رەسەي سپورتشىلارىنا ەسە جىبەردى. رەسەيلىكتەر جارىس جولىن 47:47,1 ۋاقىت ارالىعىندا ءجۇرىپ وتسە, ساپىندا اننا ستويان, ۆيكتوريا لانچاكوۆ جانە اناستاسيا سلونوۆالار بار قازاقستاندىق كوماندا 48:30,7 ۋاقىتتا مارەگە جەتتى. ال بۇل جارىستىڭ قولا جۇلدەسى جەڭىمپازداردان 1:31,1 ۋاقىت قالىپ قويعان فرانتسيا شاڭعىشىلارىنىڭ ەنشىسىندە كەتتى.
اتالعان ءۇش كۇمىس مەدالدان سوڭ قازاقستان قايتادان جالپىكوماندالىق تۋرنير كەستەسىندە ەكىنشى ورىنعا كوتەرىلدى. بۇگىندە قورجىنىمىزدا 2 التى جانە 4 كۇمىس مەدال بار. ال 12 التىن, 10 كۇمىس جانە 10 قولا مەدالى بار رەسەي جەكە-دارا كوش باستاپ كەلەدى. بەيرەسمي ەسەپتەگى ۇزدىك ۇشتىكتى ازىرگە پولشا تۇيىندە تۇر. ولاردىڭ ەنشىسىندە 2 التىن, 1 كۇمىس جانە 2 قولا مەدال بار.
ەلامان قوڭىر.
دەرەك: egemen.kz.
سۋرەت: tatry2015.sk.