ەلىمىزدە 58 مەكتەپ قاجەتتى ليتسەنزياسى بولماسا دا ءبىلىم بەرىپ كەلگەن. وسى وقۋ وشاقتارىنا مۇنداي ورەسكەل زاڭ بۇزعانى ءۇشىن ايىپپۇل سالىندى. بۇل تۋرالى وقۋ-اعارتۋ مينيسترلىگى حابارلادى.
مينيسترلىك اقپاراتىنا سۇيەنسەك, اتالعان كەلەڭسىزدىك ءبىلىم سالاسىنداعى ساپانى قامتاماسىز ەتۋ كوميتەتى مەن ونىڭ اۋماقتىق دەپارتامەنتتەرىنىڭ ءبىلىم ۇيىمدارىنا مونيتورينگى بارىسىندا انىقتالدى. جىل باسىنان بەرى جۇرگىزىلگەن تەكسەرۋ ناتيجەسى كورسەتكەندەي, 58 مەكتەپ ءبىلىم بەرۋ قىزمەتىن ليتسەنزياسىز جۇرگىزگەن. بۇگىنگى تاڭدا سونىڭ 17-ءسى وقىتۋ قىزمەتىنە قويىلاتىن تالاپتارعا سايكەستەندىردى. ليتسەنزياسىز قىزمەت جۇرگىزگەن مەكتەپتەرگە قاتىستى اكىمشىلىك قۇقىق بۇزۋشىلىق تۋرالى كودەكستىڭ 463-بابى بويىنشا ايىپپۇل سالۋعا سوت قاۋلىسى شىقتى. بۇل ءبىلىم بەرۋ ۇيىمدارى نەگىزىنەن استانا, الماتى قالالارى مەن اتىراۋ, الماتى, باتىس قازاقستان, تۇركىستان, ماڭعىستاۋ, جامبىل وبلىستارىندا ورنالاسقان.
ءبىلىم سالاسىنداعى ساپانى قامتاماسىز ەتۋ كوميتەتىنىڭ توراعاسى ەرنۇر داۋەنوۆ وسى ماسەلەگە وراي: «قولدانىستاعى ء«بىلىم تۋرالى» زاڭعا سايكەس بارلىق مەكتەپ ءبىلىم بەرۋ قىزمەتىن باستاماس بۇرىن رۇقسات الۋعا مىندەتتى. ليتسەنزيانىڭ بولماۋى مەكتەپتەردىڭ تالاپتارعا سايكەستىگى بويىنشا تەكسەرۋدەن وتپەگەنىن نەمەسە رۇقسات الۋ ءۇشىن قۇجاتتاردى تاپسىرماعانىن بىلدىرەدى. ءبىلىم بەرۋ ۇيىمدارى ءبىلىم بەرۋ قىزمەتىمەن اينالىسۋعا ليتسەنزيا العان ساتتەن باستاپ قانا قۇقىلى. ەگەر مەكتەپ مەملەكەتتىك تىركەۋدەن وتكەن ساتتەن باستاپ التى اي ىشىندە ليتسەنزيا الماسا, سوت تارتىبىمەن جابىلۋعا ءتيىس», دەپ پىكىر ءبىلدىردى.
ليتسەنزيا الۋعا قويىلاتىن نەگىزگى تالاپتار ءتيىستى ماتەريالدىق-تەحنيكالىق بازانىڭ, بىلىكتى پەداگوگيكالىق قۇرامنىڭ بولۋىن, سانيتارلىق-ەپيدەميولوگيالىق, ورتكە قارسى نورمالاردىڭ ساقتالۋىن, سونداي-اق ءبىلىم الۋشىلارعا مەديتسينالىق قىزمەت كورسەتۋدى ۇيىمداستىرۋدى قامتيدى. وسى تالاپتارعا سايكەس كەلمەۋ اكىمشىلىك جازا قولدانۋ مەن قايتالاما بۇزۋشىلىق بولعان جاعدايدا ءبىلىم بەرۋ مەكەمەسىنىڭ قىزمەتىن توقتاتۋ ءۇشىن نەگىز بولىپ سانالادى.
ايتا كەتۋ كەرەك, مەكتەپتەر باعىنىستىلىعى جاعىنان جەرگىلىكتى اتقارۋشى ورگاندارعا قارايدى. ءوز كەزەگىندە اۋماقتىق دەپارتامەنتتەر وڭىرلىك اكىمدىكتەر مەن ءبىلىم باسقارمالارىنىڭ باسشىلارىنا بۇزۋشىلىقتاردى جويۋ جونىندە شارالار قابىلداۋ تۋرالى رەسمي حات جولدادى.