اباي وبلىسىنداعى اۋىل شارۋاشىلىعى قىزمەتكەرلەرىنىڭ فورۋمىندا ءوڭىردىڭ اگروونەركاسىپ كەشەنىنىڭ دامۋى قورىتىندىلانىپ, الداعى جىلداردىڭ جوبا-جوسپارلارى ناقتىلاندى. جيىندا وبلىس باسشىسى اۋىل شارۋاشىلىعى قىزمەتكەرلەرى ەڭبەگىنىڭ ارقاسىندا ءوڭىردىڭ ەكونوميكالىق تۇراقتىلىعى مەن ءال-اۋقاتى ارتىپ كەلە جاتقانىن اتاپ ءوتتى.
«اباي وبلىسى – ەكونوميكاسىنىڭ نەگىزگى بولىگىن اگرارلىق سەكتور قۇرايتىن ايماقتاردىڭ ءبىرى. اگروونەركاسىپ سالاسىندا وڭ وزگەرىس بايقالىپ, ءونىم كولەمى ارتتى. وندىرىسكە جاڭا تەحنولوگيالار ەنگىزىلىپ, تيىمدىلىكتى ارتتىرۋعا باعىتتالعان قادامدار جاسالىپ جاتىر. بۇل, ارينە وسى زالدا وتىرعان, اتا كاسىپپەن شۇعىلداناتىن وزدەرىڭىزدىڭ ەڭبەكقورلىقتارىڭىز بەن جوعارى كاسىبيلىكتەرىڭىزدىڭ ارقاسىندا مۇمكىن بولعانىن ەرەكشە اتاپ ءوتۋ قاجەت», دەدى نۇرلان ۇرانحاەۆ.
اتالعان فورۋم اياسىندا قوناقتار ءوڭىردىڭ اۋىل شارۋاشىلىعى ونىمدەرى ۇسىنىلعان كورمەنى تاماشالادى. جالپى, بيىلعى جىلدىڭ 10 ايىنىڭ قورىتىندىسىندا وبلىس ديقاندارى ايتارلىقتاي تابىسقا جەتتى. اۋىل شارۋاشىلىعى ونىمدەرىنىڭ جالپى كولەمى 335,9 ملرد تەڭگەنى قۇرايدى. مال شارۋاشىلىعىندا 110,7% ءوسىم بايقالادى.
فورۋمدا وبلىستىق اۋىل شارۋاشىلىعى باسقارماسىنىڭ باسشىسى ەرتاي قۋانباەۆ شارۋالارعا مەملەكەتتىك قولداۋ كورسەتىلىپ, اۋىل شارۋاشىلىعى ءونىمىنىڭ ءوسىمىن ارتتىرۋ جونىندە بىرقاتار جۇمىستىڭ اتقارىلىپ جاتقانىن ايتتى. بيىل اگروونەركاسىپ كەشەنىن سۋبسيديالاۋعا 17,5 ملرد تەڭگە ءبولىنىپ, 2 مىڭنان استام اۋىل شارۋاشىلىعى تاۋار وندىرۋشىلەرىن قولداۋعا مۇمكىندىك جاسالدى. 10 ايدىڭ قورىتىندىسىنا سايكەس مال شارۋاشىلىعى سالاسىنداعى ەت, ءسۇت ءوندىرىسىنىڭ ءوسۋى تيىسىنشە 102,8%, 102,6%-دى قۇرادى.
فورۋم بارىسىندا سالا ۇزدىكتەرى مەملەكەتتىك ناگرادالارمەن ماراپاتتالدى. پرەزيدەنت جارلىعىمەن اياگوز اۋدانىنىڭ «اتاسۋ» شارۋا قوجالىعىنىڭ جەتەكشىسى ساۋلە حاسەنقىزى, اقسۋات اۋدانىنىڭ «ىقىباي» شارۋا قوجالىعىنىڭ جەتەكشىسى قادىربەك ەلۋباي ۇلى «قۇرمەت» وردەنىمەن, بورودۋليحا اۋدانىنىڭ «ترۋد» شارۋا قوجالىعىنىڭ مەحانيزاتورى الەكساندر گريگورەۆيچ, اباي اۋدانىنىڭ «دىنمۇحامەد» شارۋا قوجالىعىنىڭ جىلقىشىسى ساعدات زاقرات ۇلى III دارەجەلى «ەڭبەك داڭقى» وردەنىمەن, كوكپەكتى اۋدانىنىڭ «ەلىم-اي كوكپەكتى» جاۋاپكەرشىلىگى شەكتەۋلى سەرىكتەستىگىنىڭ مەحانيزاتورى ەرلان اقىلباەۆ «ەرەن ەڭبەگى ءۇشىن» مەدالىمەن ماراپاتتالدى.
بۇعان قوسا اۋىل شارۋاشىلىعى سالاسىندا ەلەۋلى ەڭبەك ەتكەن قىزمەتكەرلەرگە «ەڭبەك ارداگەرى» مەدالى, «اۋىل شارۋاشىلىعى سالاسىنىڭ ۇزدىگى» توسبەلگىسى, اۋىل شارۋاشىلىعى مينيسترلىگىنىڭ قۇرمەت گراموتالارى تابىستالدى.
اباي وبلىسى