جاپونيانىڭ حاتينوحە قالاسىندا كونكيدەن ء«تورت قۇرلىق بىرىنشىلىگى» اياقتالدى. وسى جارىستىڭ كوماندالىق سايىسىندا باس جۇلدەنى ولجالاعان قىتاي قۇراماسى ساپىندا قازاق قىزى اقنار ارداق ونەر كورسەتتى. ەكىنشى, ءۇشىنشى ورىنداردى جاپونيا, وڭتۇستىك كورەيانىڭ كونكيشىلەرى يەلەندى.
سەمسەرلەسۋدەن كانادانىڭ ۆانكۋۆەر قالاسىندا جالاۋى جەلبىرەگەن الەم كۋبوگىنىڭ كەزەڭدىك سايىسىندا ەلىمىزدىڭ شپاگاشىلارى قولا مەدالدى ەنشىلەدى. ءۇشىنشى ورىنعا تارتىستا جەرلەستەرىمىز فرانتسيادان 35:34 ەسەبىمەن باسىم ءتۇستى. بۇل باسەكەدە ەل نامىسىن رۋسلان قۇربانوۆ, ەلمير ءالىمجانوۆ, ۆاديم شارلايموۆ, ەرلىك سەرتاي قورعادى. ماجارستان مەن جاپونيا قۇرامالارى اراسىندا وتكەن فينالدىق ايقاس قارت قۇرلىق وكىلدەرىنىڭ پايداسىنا شەشىلدى.
تەننيسشىلەردىڭ الەمدىك رەيتينگى قايتا جاڭارتىلدى. WTA تىزىمىندە ەلەنا رىباكينا التىنشى ورىندا. ول ارينا سوبولەنكو (بەلارۋس), يگا شۆەنتەك (پولشا), كوكو گاۋف (اقش), جاسمين پاوليني (يتاليا), تسينۆەن چجەننەن (قىتاي) كەيىن ورنالاسقان. اتر رەيتينگىندە ياننيك سيننەردىڭ (يتاليا) وزگەلەردەن كوشى ىلگەرى. ونى الەكساندر زۆەرەۆ (گەرمانيا), كارلوس الكاراس (يسپانيا), تەيلور فريتس (اقش), دانيل مەدۆەدەۆ (رەسەي) وكشەلەپ كەلەدى. وتانداستارىمىز اراسىنان الەكساندر بۋبليكتىڭ عانا اياقالىسى ءتاۋىر. ول 33-ورىندا.
13-15 جەلتوقسان ارالىعىندا نورۆەگيادا ارداگەرلەر مەن قازىرگى ۇستەل تەننيسىنىڭ الەم جۇلدىزدارىنىڭ قاتىسۋىمەن العاشقى ۆالدنەر كۋبوگى وتەدى. ازيا قۇراماسىنىڭ نامىسىن ما لونگ, چەن مەن, دجانگ ۆۋدجين, ليم دجونحۋن, شين يۋبين, مانيكا باترامەن بىرگە ەلىمىزدىڭ ءبىرىنشى راكەتكاسى كيريلل گەراسيمەنكو قورعايدى. سونداي-اق دودادا يان-ۋۆە ۆالدنەر, ترۋلس مورەگارد, دميتري وۆچاروۆ, ۋگو كالدەرانو, ادريانا دياس, بەرنادەت سيوچ سىندى دۇلدۇلدەردىڭ دە ونەرىن تاماشالايمىز.
تاياۋ كۇندەرى فريستايل-موگۋلدان فينليانديانىڭ رۋكا قالاسىندا تۇساۋى كەسىلەتىن الەم كۋبوگىنىڭ كەزەڭدىك سايىسىندا يۋليا گالىشەۆا, پاۆەل كولماكوۆ, اناستاسيا گورودكو, اياۋلىم امىرەنوۆا, انتون بوندارەۆ, فيودور بۋگاكوۆ باق سىنايدى.
تانىمال ارالاس جەكپە-جەك شەبەرى, وتاندىق «نايزانىڭ» چەمپيونى دياس ەرەنعايىپوۆ ءوزىنىڭ كەلەسى كەزدەسۋىن 13 جەلتوقساندا باحرەيندە وتكىزەدى. جەرگىلىكتى BRAVE پروموۋشەنى ۇيىمداستىرعالى وتىرعان جارىستا قانداسىمىز برازيليالىق مارسيانو فەرەيرامەن (12-2) ايقاسادى.
الماتىنىڭ «قايرات» فۋتزال كلۋبى حورۆاتياعا اتتانىپ كەتتى. سول جاقتا ولار ۋەفا چەمپيوندار ليگاسىنىڭ ەليتالىق كەزەڭىندەگى باسەكەلەرگە قاتىسادى. ۆ توبىندا وينايتىن جەرلەستەرىمىز «ولميسسۋم» (حورۆاتيا), «ەتۋال» (فرانتسيا), «دينامو» (زاگرەب, حورۆاتيا) كلۋبتارىمەن كۇش سىناسادى. بۇل باسەكەلەر 26 قاراشا – 1 جەلتوقسان ارالىعىندا وتەدى.
تەننيستەن دەۆيس كۋبوگىنىڭ جەڭىمپازى انىقتالدى. فينالدا يتاليا مەن نيدەرلاند قۇرامالارى كۇش سىناستى. جارتىلاي فينالدا اپەننين تۇبەگىنىڭ تۇلەكتەرى اۋستراليادان ايلاسىن اسىرسا, قىزعالداقتار ەلىنىڭ وكىلدەرى گەرمانيانى جولىنان ىعىستىردى. شەشۋشى سايىستا باعى جانعان يتاليالىقتار باس جۇلدەنى ولجالادى. جەڭىمپاز كوماندانىڭ ساپىندا ياننيك سيننەر, لورەنتسو مۋزەتتي, اندرەا ۆاۆاسسوري, سيمونە بولەللي, ماتتەو بەررەتتيني سىندى ساڭلاقتار وينادى.