«قازاقستان مۇعالىمى-2024» ۇلتتىق سىيلىعىنىڭ فيناليستەرىن سالتاناتتى ماراپاتتاۋ راسىمىنە الەمنىڭ ءار تۇكپىرىنەن كەلگەن مۇعالىمدەر, عالىمدار, ساراپشىلار قاتىستى, دەپ حابارلايدى Egemen.kz.
ەلوردا اكىمدىگىنىڭ رەسمي سايتىنىڭ مالىمدەۋىنشە, بۇل – Varkey Foundation بەكىتكەن جاھاندىق مۇعالىمدەر سىيلىعى حالىقارالىق بايقاۋى شەڭبەرىندە «قازاقستان مۇعالىمى-2024» ۇلتتىق سىيلىعىنىڭ يەگەرى رەتىندە 10 ۇزدىك ۇستاز انىقتالدى. بايقاۋدىڭ ماقساتى – ۇستازدىق ماماندىقتىڭ ماڭىزدىلىعىن كورسەتۋ عانا ەمەس, سونىمەن قاتار ۇزدىك مۇعالىمدەردىڭ ەڭبەگىن حالىقارالىق دەڭگەيدە كورسەتۋ.
بيىل بايقاۋ رەكوردتىق كورسەتكىشتى كورسەتىپ, قازاقستاننىڭ تۇكپىر-تۇكپىرىنەن 2200-دەن استام پەداگوگ قاتىسقان. ولاردىڭ اراسىنان 10 ۇزدىك ۇستاز ىرىكتەلىپ الىندى. ولاردىڭ قاتارىندا ەلوردالىق 2 ۇستاز بار. ولار استانا قالاسىنداعى №71 مەكتەپ-ليتسەيىنىڭ ماتەماتيكا ءپانى ۇستازى جۋنيس وكتيابرينا جانە ەكونوميكالىق ليتسەيدىڭ قازاق ءتىلى جانە ادەبيەتى ءپانى ۇستازى نۇرجان بايساكوۆ. ۇزدىك 10 ۇستازدىڭ قاتارىنا ەنگەن ەلوردالىق 2 ۇستازدىڭ ارقايسىسى 1 ميلليون تەڭگەدەن اقشالاي سىيلىق الدى.