وتكەن سەنبىدە مەملەكەتتىك كۇزەت قىزمەتى ايرىقشا ماقساتتاعى كۇشتەرىنىڭ اسكەري بولىمدەرىندە بيىلعى كۇزگى شاقىرىلىمنىڭ مەرزىمدى اسكەري قىزمەت ساربازدارى اسكەري انت قابىلدادى.
اسكەري ومىردەگى ەرەكشە ەستە قالاتىن جاۋىنگەرلىك راسىمدەردىڭ ءبىرى ءارى ماڭىزدىسى – اسكەري انت قابىلداۋ سالتاناتى. بۇل كۇن – ەلدىڭ اماندىعى مەن مەملەكەتتىڭ قاۋىپسىزدىگى سەنىپ تاپسىرىلعان, حالىق پەن پرەزيدەنت زور سەنىم ارتقان سارباز ءۇشىن وزىنە ومىرلىك جاۋاپكەرشىلىك جۇكتەيتىن قاسيەتتى ءسات. سوندىقتان بۇل ءراسىم كۇندەلىكتى ءوتىپ جاتقان ءىس-شارالاردىڭ قاتارىنان ەمەس. «ەگەر مەن ءوزىم قابىلداعان اسكەري انتتى بۇزسام, وندا قازاقستان رەپۋبليكاسىنىڭ زاندارىندا بەلگىلەنگەن قاتاڭ جازانى وتۋگە ءازىرمىن», دەپ اياقتالاتىن اسكەري انتتىڭ ماتىنىندە قانشاما جاۋاپكەرشىلىك, وتانعا دەگەن ادالدىعىڭ مەن ەر ازامات رەتىندەگى جاۋىنگەرلىك پارىزىڭ سىنالاتىن ساتتەردە سىنىپ كەتپەۋگە جىگەرلەندىرەتىن رۋح جاتىر.
ەلىمىزدىڭ ءار وڭىرىنەن سايدىڭ تاسىنداي ىرىكتەلىپ جاساقتالعان «ايبىن» پرەزيدەنتتىك پولكى اسكەري قىزمەتشىلەرىنىڭ انت بەرۋ سالتاناتتى ءراسىمى استانا قالاسىنداعى «وتان قورعاۋشىلار» مونۋمەنتى الدىنداعى الاڭدا ءوتتى. بارىنشا اسكەري ءسان-سالتاناتپەن وتكەن جيىنعا كەلگەن جاس ساربازداردىڭ اتا-انالارى مەن تۋعان-تۋىستارىنىڭ دا قاراسى قالىڭ بولدى.
مەملەكەتتىك كۇزەت قىزمەتى ايرىقشا ماقساتتاعى كۇشتەرىنىڭ, ياعني «ايبىن» پرەزيدەنتتىك پولكى قاتارىنا شىقىرتىلعان 200-دەن اسا سارباز بيىل كۇزگى شاقىرىلىم بويىنشا مەرزىمدى اسكەري قىزمەت ساربازدارى ەلىمىزدىڭ بارلىق ايماعى مەن رەسپۋبليكالىق ماڭىزى بار قالالارىنان ىرىكتەلىپ الىنعان. ولار اسكەري بولىمدەردىڭ دالالىق وقۋ ورتالىقتارىندا دايارلىق كۋرسىنان وتكەن.
سالتاناتتى راسىمدە مەملەكەتتىك كۇزەت قىزمەتى باستىعىنىڭ ورىنباسارى – ايرىقشا ماقساتتاعى كۇشتەردىڭ قولباسشىسى, گەنەرال-مايور ايتقۇرمان وماربەكوۆ ساربازداردىڭ ناعىز اسكەري ومىرگە باسقان قادامىنا قۇت-بەرەكە تىلەدى.
– بۇگىن ءبارىمىز ءۇشىن ماڭىزدى وقيعا ساربازداردىڭ اسكەري انت قابىلداۋ راسىمىنە كۋا بولدىق. جاس جاۋىنگەرلەر «وتانىمدى قورعايمىن» دەپ جاۋاپكەرشىلىك الدى. بۇل قاسيەتتى بورىش – ءار ازاماتتىڭ پارىزى. بيىل حالىق قاھارمانى ساعادات نۇرماعامبەتوۆتىڭ جانە رەيحستاگقا العاش بولىپ تۋ تىككەن راقىمجان قوشقارباەۆتىڭ تۋعانىنا 100 جىل تولدى. سىزدەر وسى باتىر اتالارىمىزدىڭ جولىن ابىرويمەن جالعايدى دەپ سەنەمىن. ءبىزدىڭ قاتارىمىزدا اسكەري ءىستىڭ قىر-سىرىن ۇيرەنەسىزدەر ءارى ۇلكەن ءومىر مەكتەبىنەن وتەسىزدەر. جاۋىنگەرلىك جولدا ءبىر-بىرىڭىزگە سەرىك, تىرەك بولىڭىزدار, – دەدى گەنەرال-مايور ا.وماربەكوۆ.
سونداي-اق قاراشادا جاۋعان قاردىڭ قارا سۋىعىنا قاراماستان, نەمەرەسىنىڭ قولىنا قارۋ ۇستاپ, وتانىن قورعاۋعا سەرت بەرگەن ءساتىن كورۋگە كەلگەن جاسى 73-تەگى اقساقال جەتكەرگەن كەنجەباەۆ تا ەل قورعانى بولۋعا بەكىنگەن بالالارىنا اق جول تىلەپ, باتاسىن بەردى.
– مەن دە وزدەرىڭ سەكىلدى كەرزى ەتىك كيىپ, وتان الدىنداعى بورىشىمدى ەكى جىل سۆەردلوۆسك قالاسىندا وتەدىم. ودان جامان بولعان جوقپىن, ومىرلىك ازىق بولار كوكەيگە كوپ نارسە ءتۇيىپ قايتتىم. بالالارىم, قابىلداپ جاتقان انتتارىڭا ادال بولىپ, جاۋىنگەرلىك مىندەتتەرىڭدى لايىقتى اتقارىڭدار. ەلىمىزدىڭ نامىستى دا قايراتتى ەر جىگىتى بولىپ شىڭدالىڭدار. شىنىن ايتقاندا, مەملەكەتتىك كۇزەت قىزمەتى قاتارىندا اسكەري مىندەتتى اتقارۋ – كوپ جىگىتتىڭ ارمانى. ءبىر جىل وتباسىلارىڭنان جىراقتا بولۋ, تارتىپكە باعىنۋ, كومانديرلەرىڭنەن كەرەك دۇنيەلەردى ۇيرەنۋ – وسىنىڭ ءبارى سەندەر ءۇشىن ۇلكەن تاجىريبە, ۇلكەن ابىروي. ءبىز وزدەرىڭە سەنەمىز. امان بولىڭىزدار, حالقىڭا قادىرى اسقان, مارتەبەسى بيىك ازامات بولىڭدار, – دەدى قاتارداعى جاس جاۋىنگەر يسلام بەكسۇلتان ۇلىنىڭ اتاسى جەتكەرگەن اقساقال.
انت قابىلداۋدى وتانعا, حالقىڭا ادال قىزمەت ەتۋ, ءتىپتى ەل باسىنا كۇن تۋعان شاقتا جان قيۋعا دەيىن ساپتا بولۋ دەپ تۇسىنەتىنىن جەتكىزگەن قاتارداعى جاۋىنگەر اسقار سەرىك تە ەلىمىزدى قورعاۋعا انت ەتكەن قاتارلاستارىنا جۇرەكجاردى لەبىزىن ءبىلدىردى.
– وتان-انانى قورعاۋ ەڭ اسقاق پارىز, ابىرويلى مىندەت ەكەنىن بىلە وتىرىپ, بۇگىن ءبىز, جاس ايبىندىقتار, سالتاناتتى تۇردە انت قابىلدادىق. انت قابىلداۋ – وتانىنا, حالقىنا ادال بولۋ, ەل باسىنا كۇن تۋسا, ونى اقتىق دەمى قالعانشا قورعاۋ. قاجەت بولسا, جان قيۋ دەپ بىلەمىز. وسىلايشا, ۇلان-عايىر جەرىمىزدى اق بىلەكتىڭ كۇشىمەن, اق نايزانىڭ ۇشىمەن قورعاعان جاۋجۇرەك اتا-بابالارىمىزدىڭ ەرلىك جولىن جالعاستىرۋشىعا, ەل قورعانىنا, سەنىم ارقالاعان ازاماتقا اينالدىق, – دەدى قاتارداعى جاۋىنگەر ي.بەكسۇلتان ۇلى.
وسى كۇنى انت قابىلداعان 200-گە تارتا جاس سارباز ەندى مكق اسكەري بولىمدەرىندە مەرزىمدى قىزمەت اتقارا جۇرە تاجىريبەلى نۇسقاۋشىلىق قۇرامنىڭ جەتەكشىلىگىمەن اسكەري ىسكە ماشىقتانىپ, جاۋىنگەرلىك جانە ارنايى دايارلىق ساباقتارىندا اسكەري ماماندىقتاردى مەڭگەرەدى.
مەملەكەتتىك كۇزەت قىزمەتى 0112-اسكەري ءبولىمىنىڭ 6-باسقارماسى 1-ءبولىمىنىڭ اعا كۇزەت وفيتسەرى, اعا لەيتەنانت ەرجان بەكبولاتوۆتىڭ ايتۋىنشا, ابدەن ىرىكتەۋدەن وتكەن بۇل مەرزىمدى قىزمەت ساربازدارى مكق «ايبىن» پرەزيدەنتتىك پولكى اتقاراتىن قازاقستان رەسپۋبليكاسىنىڭ مەملەكەتتىك تۋى مەن مەملەكەتتىك ەلتاڭباسى ەتالوندارىن كۇزەتۋ, مەملەكەت باسشىسىنىڭ قاتىسۋىمەن وتەتىن حاتتامالىق ءىس-شارالارعا قاتىسۋ, كۇزەتىلەتىن تۇلعالار مەن نىسانداردىڭ قاۋىپسىزدىگىن قامتاماسىز ەتۋ سەكىلدى ماڭىزدى مىندەتتەردى اتقارماق.
– ايرىقشا ماقساتتاعى كۇشتەردىڭ قاتارىنا 18 بەن 27 جاس ارالىعىنداعى, بويى 180 سم-دەن جوعارى جانە 195 سم-دەن اسپايتىن, ءبىلىمى ورتا بىلىمنەن تومەن ەمەس, دەنساۋلىعى جاقسى كەز كەلگەن ازامات قوسىلا الادى. دەسە دە ىرىكتەۋ كەزىندە جوعارى ءبىلىمدى, سپورتتىق جەتىستىكتەرى مەن رازريادتارى بار ۇمىتكەرلەرگە باسىمدىق بەرىلەدى. مەرزىمدى اسكەري قىزمەتتى مەملەكەتتىك كۇزەت قىزمەتى قاتارىندا اتقارۋ جاس ازاماتتار ءۇشىن ناعىز ەرلىك مەكتەبى بولماق. جاستار ءۇشىن بۇل كەزەڭ ءارى قارايعى مانساپ جولىن جالعاستىرۋعا نەگىز, الەۋمەتتىك ساتى بولۋى مۇمكىن, – دەيدى اعا لەيتەنانت ە.بەكبولاتوۆ.
سالتاناتتى جيىن بارىسىندا قاتىسۋشىلارعا ەپتى دە سوم بىلەكتى جاۋىنگەرلەردىڭ قويان-قولتىق ۇرىس تاسىلدەرى, قارۋ-جاراقپەن ساپتىق ونەر كورسەتۋ ەلەمەنتتەرى كورسەتىلدى. ال جيىن سوڭىندا ءداستۇر بويىنشا ساربازداردىڭ تۋىستارىنا اسكەري بولىمدەرگە ەكسكۋرسيا ۇيىمداستىرىلدى. ەلىمىزدىڭ ءار وڭىرىنەن كەلگەن اتا-انالار ۇلدارىنىڭ وقۋ سىنىپتارىن, كازارمالارىن, اسحانالار مەن تۇرمىستىق بولمەلەرىن ارالاپ كوردى. سونداي-اق كومانديرلەرمەن دە ەمەن-جارقىن اڭگىمەلەسۋ ءىس-شاراسى ۇيىمداستىرىلىپ, اتا-انالار ءوزىن قىزىقتىرعان سۇراقتارىن قويىپ جاتتى. وعان قوسا قالعان ۋاقىتتى اتا-انالار ۇلدارىمەن بىرگە وتكىزىپ, كوڭىلى كوتەرىلىپ قالدى.