اڭىزعا اينالعان دارا تۇلعا مۇستافا وزتۇرىكتى ەسكە الىپ, رۋحىنا تاعزىم ەتىپ, ونەگەلى ءومىرى مەن ەڭبەگىن دارىپتەۋ ماقساتىندا ۆەلوسپورتشى, جۋرناليست ەرنات راحمەتوللا 70 شاقىرىمدىق ۆەلوشەرۋ وتكىزدى. استانا قالاسىنداعى «بايتەرەكتەن» باستالعان ۆەلوشەرۋدە ەرنات مەلس ۇلى قابانباي باتىر كەسەنەسىنە دەيىنگى قاشىقتىقتى ءجۇرىپ ءوتتى.
ەلىمىزدە تاەكۆوندو فەدەراتسياسىنىڭ (WTF) نەگىزىن قالاۋشى, تاەكۆوندودان 6 دۇركىن الەم چەمپيونى, 6-دان قارا بەلبەۋ يەگەرى, حالىقارالىق دارەجەدەگى جاتتىقتىرۋشى مۇستافا وزتۇرىكتىڭ تۋعانىنا 70 جىل. ەلىمىزدە عانا ەمەس, گەرمانيانىڭ كەلن, ميۋنحەن, تۇركيانىڭ ىستانبۇل قالالارىندا تاەكۆوندو مەكتەبىن اشقان, انا تىلىنە قوسا تۇرىك, نەمىس, جاپون, قىتاي, كورەي تىلدەرىن جەتىك بىلگەن تۇلعانىڭ قازاق سپورتىنا سىڭىرگەن ەڭبەگى ولشەۋسىز.
«قاراشانىڭ قارا سۋىعىنا قاراماستان ۆەلوشەرۋ وتكىزۋ ارقىلى ادامنىڭ مۇمكىندىكتەرىن كورسەتۋ, ءتوزىم, شىدام, سالاماتتى ءومىر سالتى, تاباندىلىق, ىستىق قايراتتى ناسيحاتتاپ قانا قويماي, قايراتكەر تۇلعانىڭ 70 جىلدىعىنا ءوزىمنىڭ دە ۇلەسىمدى قوسقىم كەلدى. جاستاردى وتانسۇيگىشتىككە, قايسارلىققا ۇندەۋ ماقساتىندا وسى شارانى وتكىزدىم», دەيدى ارىپتەسىمىز. قازاق پەن تۇرىككە ورتاق پەرزەنت سانالعان مۇستافا وزتۇرىكتىڭ ونەگەلى ءومىرى ارقىلى ەكى ەلدىڭ باۋىرلاستىعىن ناسيحاتتاپ جۇرگەن جۋرناليست يگى ءىسى جالعاسىن تاباتىنىن ايتتى.
ۆەلوسپورتتان ەلىمىزدىڭ 3 ءدۇرىن رەكوردشىسى بۇعان دەيىن دە رەسپۋبليكالىق, حالىقارالىق دەڭگەيدە 14 ۆەلوشەرۋ وتكىزگەن. 2022 جىلى 55 كۇندە 5555 شاقىرىم ءجۇرىپ, احمەت بايتۇرسىن ۇلىنىڭ 150 جىل مەرەيتويىنا ارناپ تورعاي, اقكول, سارىتۇبەكتەن باستاپ, قوستاناي, اقتوبە, اتىراۋ, ماڭعىستاۋ وبلىستارى, گرۋزيا, تۇركيا اۋماعى ارقىلى ىستانبۇلدىڭ گۇنەشلى اۋدانىنداعى مۇستافا وزتۇرىك جەرلەنگەن زيراتقا دەيىن بارعان.