«قازپوشتا» كسرو حالىق ءارتىسى, قازاقستان مادەنيەتىنىڭ وركەندەۋىنە ەلەۋلى ۇلەس قوسقان كورنەكتى وپەرا ءانشىسى بيبىگۇل تولەگەنوۆانىڭ تۋعانىنا 95 جىل تولۋىنا وراي پوشتا ماركاسىن شىعاردى. «ەستەلىك جانە مەرەيتويلىق داتالار» سەرياسىنداعى ماركا – بەس ماركادان تۇراتىن پوشتا بلوگى. ماركا 4 ءتۇستى بوياۋمەن وفسەتتىك ۇلگىدە باسىپ شىعارىلعان. 5000 دانامەن تارالعان ماركانىڭ نومينالى – 450 تەڭگە.
بيبىگۇل تولەگەنوۆا – شەبەر ورىنداۋشى عانا ەمەس, سونىمەن قاتار تالىمگەرلىكتىڭ وزىق ادىستەرىن مەڭگەرۋىمەن قازاقستاننىڭ مۋزىكا مادەنيەتىنىڭ دامۋىندا ماڭىزدى ءرول اتقارعان تالانتتى پەداگوگ. ول الەمنىڭ ەڭ تانىمال ساحنالارىندا ونەر كورسەتىپ, مادەنيەتتەردىڭ جاقىنداسۋىنا ەڭبەك ءسىڭىردى, ەلىنىڭ مادەني مۇراسىنا باعا جەتپەس ۇلەس قوستى.
«قازپوشتا» كوللەكتسياسى تاعى ءبىر جارقىراعان گاۋھار – بيبىگۇل تولەگەنوۆانىڭ 95 جىلدىعىنا ارنالعان مەرەيتويلىق ماركامەن تولىقتىرىلدى. ءبىز بيبىگۇل احمەتقىزىنا دۇنيەجۇزىلىك پوشتا وداعىنىڭ 150 جىلدىعىنا ارنالعان ماركاسىن باستىرۋ راسىمىنە ارنايى قاتىسقانى ءۇشىن العىسىمىزدى بىلدىرەمىز. بۇل – ءبىز ءۇشىن ۇلكەن مارتەبە. اتاۋلى ماركا – ول كىسىنىڭ وتاندىق مادەنيەتتى, مۋزىكانى, ساحنالىق شىعارماشىلىقتى دامىتۋداعى ماڭىزدى رولىنە قۇرمەت», دەپ اتاپ ءوتتى «قازپوشتا» اق ءباسپاسوز قىزمەتى.
بيبىگۇل تولەگەنوۆانىڭ شىعارماشىلىعى تۇتاس ۇرپاققا ونەگە بولىپ, شابىتتاندىرىپ كەلەدى. ول – الەمنىڭ ۇزدىك ساحنالارىندا ونەر كورسەتىپ جۇرگەن وپەرا ارتىستەرى مەن مۋزىكانتتارىنىڭ بىرنەشە بۋىنىن تاربيەلەگەن جان.
الماتى