«ەڭ ادەمى كيىم – ۇلتىمنىڭ كيىمى»

«ۇلتتىق كيىم ول – تەك قانا كوللوريت قانا ەمەس, ول – ۇلتتىڭ ءوزى. سونىمەن قاتار بۇل يدەولوگيالىق قۇرال. شاپان, كاجەكەي, ءشاي كويلەك, شىركىن قازاقتىڭ ۇلتتىق كيىمىنە جەتەتىن سۇلۋلىق بار ما؟ ويۋى دا سويلەيدى, ءپىشىنى مەن بوياۋى دا تۇنىپ تۇرعان تاريح.  كەيىنگى جىلدارى  ۇلتتىق كيىمگە دەگەن سۇرانىس ارتقانى بايقالادى. سوندىقتان دا بولار, ۇلتتىق كيىم تىگۋمەن اينالىساتىن شەبەرلەر قاتارى دا كوبەيىپ جاتىر. سونداي جانداردىڭ ەڭبەكتەرىن ەلگە ناسيحاتتاۋ, وزدەرىن ىنتالاندىرا ءتۇسۋ, وزگەلەردى دە وسى كاسىپكە تارتۋ ماقساتىندا وسىنداي ءىس-شارا ۇيىمداستىردىق», دەيدى ساتباەۆ قالالىق مادەنيەت جانە تىلدەردى دامىتۋ ءبولىمىنىڭ باسشىسى قانات تولەش.

فەستيۆال-بايقاۋعا قاتىسۋشىلار ءوز قولدارىنان شىققان ەگدە جاستاعىلارعا, قىز-كەلىنشەكتەرگە, بوزبالالار مەن بويجەتكەندەرگە ارنالعان كيىم, ۇلتتىق باس كيىم, جۇننەن, كيىزدەن, بىلعارىدان جانە اڭ تەرىسىنەن تىگىلگەن جاڭا ۇلگىلەردى ۇسىندى, ەتنوستيلدەگى ساحنالىق ءساندى كيىمدەر مەن مەكتەپ وقۋشىلارىنىڭ وقۋ فورمالارىن جانە ت.ب. ورتاعا سالدى. ولاردىڭ قايسىسى بولسىن تارتىمدىلىعىمەن ەرەكشەلەنىپ تۇردى.

فەستيۆال-بايقاۋدىڭ قورىتىندىسىندا التىن جىپپەن كەستەلەنگەن قاسابا, جىلتىر تاستارمەن بەزەندىرىلگەن كيمەشەك پەن قارقارا جانە ت.ب. ەرەكشە دۇنيەلەر ۇسىنعان شەبەر باقىتكۇل بالعاباەۆانىڭ ەڭبەگى ايرىقشا باعالاندى.

ۇلىتاۋ وبلىسى,

ساتباەۆ قالاسى