قر تاەكۆوندو (WTF) فەدەراتسياسىنىڭ نەگىزىن قالاۋشى, حالىقارالىق دارەجەدەگى جاتتىقتىرۋشى, تاەكۆوندودان قارا بەلبەۋ 6-دان يەگەرى, ۇلتجاندى, ءبىرتۋار ازامات مۇستافا وزتۇرىك كوزى ءتىرى بولعاندا بۇگىن 70 جاسقا تولار ەدى, دەپ جازادى Egemen.kz.
مۇستافا كابەن ۇلى ءابدىراحمان 1954 جىلى 23 قاراشادا تۇركياداعى مۇساحودجالى اۋىلىندا تۋعان. باسىلىمداردىڭ جازۋىنشا, مۇستافا وزتۇرىكتىڭ ۇلكەن ناعاشىسى ايگىلى بالۋان قايىسباي ءيىس ۇلى دەگەن كىسى بولعان ەكەن.
مۇستافا وزتۇرىك ىستانبۇلداعى ورتا مەكتەپتى بىتىرگەننەن كەيىن, تايۆانداعى ەكسپەريمەنتالدى ۋنيۆەرسيتەتتى جانە سول ەلدەگى حالىقارالىق قاتىناستار ۋنيۆەرسيتەتىنىڭ جۋرناليستيكا فاكۋلتەتىن قوسا ءبىتىردى. وسى ەلدە ءجۇرىپ, كورەيدىڭ كونە سپورت ونەرى - تاەكۆوندونى ۇيرەندى. ول جەردە تاەكۆوندو سپورتىنان ۇزدىك مارتەبە الدى, 6-شى دان دارەجەسىن يەلەندى. سونىمەن قاتار حالىقارالىق جاتتىقتىرۋشى ماماندىعىن الدى.
كەيىن تۇركياعا قايتقاننان سوڭ ىستانبۇلدا العاشقى تاەكۆوندو مەكتەبىن اشتى. وسى مەكتەپتەن شىققان ونىڭ ءبىر سىپىرا شاكىرتتەرى تۇركيانىڭ تاەكۆوندو فەدەراتسياسىندا جوعارى قىزمەتتەردە بولعان. گەرمانيانىڭ ميۋنحەن قالاسىنا قونىس اۋدارعان مۇستافا وزتۇرىك وسى قالادا دا ءوزىنىڭ تاەكۆوندو مەكتەبىن اشقان.
ال 1990 جىلى كۇزدە وزتۇرىك قازاق جاستارىن تاەكۆوندوعا باۋلۋ ءۇشىن قازاقستانعا ءبىرجولا ورنىعىپ, 1991 جىلى قازاقستان تاەكۆوندو فەدەراتسياسىن قۇرادى. 1992 جىلى قازاقستان حالىقارالىق تاەكۆوندو فەدەراتسياسىنىڭ (WTA) مۇشەسى بولادى. وسى جىلى مۇستافا وزتۇرىك قازاقستان ازاماتتىعىن الادى.
مۇستافا وزتۇرىك 1995 جىلدىڭ 15 ناۋرىز كۇنى الماتى قالاسىنداعى قر پرەزيدەنتى ءىس باسقارماسى مەديتسينالىق ورتالىعىنىڭ ورتالىق كلينيكالىق اۋرۋحاناسىندا قايتىس بولدى. قارىنداسى فەرۋحاننىڭ جانە تۋىستارىنىڭ شەشىمىمەن مۇستافا وزتۇرىك ىستانبۇلداعى قازاقتار كوپتەپ تۇراتىن گۇنەشلى اۋدانىنداعى زيراتقا ءوزىنىڭ اكەسىنىڭ جانىنا جەرلەنەدى.