پراگا تورىندە قازاق جانە چەح ونەرپازدارىنىڭ بىرلەسكەن كونتسەرتى انشلاگپەن ءوتتى. شىعارماشىلىق كەش بيلەتتەرى ەكى كۇندە ساتىلىپ كەتكەن. ونەرسۇيەر قاۋىم اسىرەسە قازاقستاننىڭ وپەرا ءانشىسى نۇرجامال ۇسەنباەۆا مەن چەحيالىق باريتون فيليپپ بانجاكتىڭ دۋەتىن تىڭداۋعا كەلگەن.
قازاقستاننىڭ حالىق ءارتىسى نۇرجامال ۇسەنباەۆانى جەرگىلىكتى جۇرت جاقسى بىلەدى. شىعارمالارىن ءسۇيىپ تىڭدايدى. كلاسسيكالىق مۋزىكا تالانتىنىڭ جوفين سارايىندا ونەر كورسەتۋى ەرەك مارتەبەسىن كورسەتەدى. قازاق-چەح ارتىستەرىنىڭ بىرلەسكەن جوباسى ەلىمىزدىڭ ۇلتتىق مەرەكەسى – رەسپۋبليكا كۇنىنە ارنالدى. مادەني ءىس-شارا پراگا مەرىنىڭ جوعارى پاتروناتىمەن جانە ديپلوماتتارىمىزدىڭ قولداۋىمەن ءوتتى. كونتسەرتتە ءداستۇرلى اندەر مەن كلاسسيكالىق تۋىندىلار شىرقالدى. ال سولتۇستىك چەحيا وركەسترى تولەگەن مۇحامەدجانوۆتىڭ سيمفونيالىق مۋزىكاسىن ورىندادى.
كەش سوڭىندا چەحيالىق ديريجەرگە قازاق حالقىنان ەستەلىك رەتىندە ماحامبەت پوەماسىنىڭ پارتيتۋراسىن سىيعا تارتتى.
«بۇگىنگىدەي كەشتەر كوپشىلىككە رەسمي ءىس-شارالاردان گورى اسەرلى بولارى انىق. ناعىز جۇرەكتەن جۇرەككە جەتەتىن وسىنداي باسقوسۋلار كوبىرەك بولسىن دەپ ايتامىن. ويتكەنى نەعۇرلىم ادامدار اراسىندا تاتۋلىق بولسا, سوعۇرلىم بەيبىتشىلىكتى ساقتاپ قالامىز», دەدى كومپوزيتور تولەگەن مۇحامەدجانوۆ.
ۇلكەن ساحنادا الەمگە ايگىلى اريالار دا ورىندالدى. قازاق سوپرانوسى چەح تىلىندە, ال چەح باريتونى مۇقاعالي ماقاتاەۆتىڭ سوزىنە جازىلعان «وتان» ءانىن شىرقاعاندا جينالعان قاۋىمنىڭ ىقىلاسى ەرەكشە ءبىلىندى.
«مۋزىكا ءتىلى اۋدارمانى قاجەت ەتپەيدى. مۋزىكانت رەتىندە بىزگە ادامداردى ونەر ارقىلى بىرىكتىرۋ ۇلكەن باقىت», دەيدى وپەرا ءانشىسى فيليپ باندجاك.
«قازاقستان مەن چەحيانىڭ مادەني بايلانىسىن نىعايتاتىن كوپتەگەن جوبا ۇيىمداستىرىپ جاتىرمىز. ەلدەگى كونتسەرتتەرگە چەح ارتىستەرى كەلىپ تۇرادى. سوندىقتان ءبىزدىڭ دوستىعىمىز, ءبىزدىڭ بايلانىسىمىز بەكەم», دەيدى نۇرجامال ۇسەنباەۆا.
ءيا, اتالعان كەشتىڭ باستى جۇلدىزدارى بىرلەسكەن جوبالاردى بۇرىننان بەرى جۇزەگە اسىرىپ كەلەدى. سونىمەن قاتار نۇرجامال ۇسەنباەۆا مەن فيليپ باندجاك ەۋروپا ونەرى وداعىنىڭ جوعارى ماراپاتىن يەلەنگەن ۇشتىكتىڭ قاتارىنا كىرەدى.
ۆاتيكاننىڭ چەحياداعى ەلشىسى دجۋت تاددەۋس وكولو دا ەكى ەل اراسىنداعى مادەني بايلانىستاردىڭ الداعى ۋاقىتتا دا جالعاساتىنىنا سەنىمدى ەكەنىن ايتتى.
«بۇل – وتە جاقسى باستاما. جالپى, ادامدار اراسىندا بەيبىتشىلىك سەزىمىن ۇيالاتۋدىڭ ماڭىزى وتە زور. قازاقتار مەن چەحتار ءوز تىلدەرىندە سويلەسسە دە, ءبىرىن-ءبىرى جاقسى تۇسىنەتىندەي بولىپ كورىنەدى ماعان. دەمەك ءبىر بايلانىس بار», دەيدى ول.
ەكى ەل ارتىستەرىنىڭ قاتىسۋىمەن وتكەن گالا-كونتسەرت كورەرمەن قاۋىمدى دا ەكى ەلدىڭ ونەرىنە جاقىنداستىرا تۇسكەنى انىق. ال قازاقستان تاراپى فيليپ باندجاكتى بەيبىتشىلىك ەلشىسى دەپ جاريالادى.