تۇركىستان وبلىسى اكىمدىگىنىڭ قولداۋىمەن قارجىلىق مونيتورينگ اگەنتتىگى «AML ACADEMY» اكادەمياسىنىڭ ۇيىمداستىرۋىمەن تۇركىستان قالاسىندا قۇقىقتىق جانە قارجىلىق ساۋاتتىلىقتى ارتتىرۋ ماقساتىندا اۋقىمدى فورۋم ءوتتى, دەپ حابارلايدى Egemen.kz.
ءىس-شاراعا 500 مىڭنان استام ادام, ونىڭ ىشىندە مادەنيەت, سپورت, عىلىم, مەملەكەتتىك قىزمەتكەرلەر, ءدىن قىزمەتكەرلەرى, بيزنەس, قوعامدىق ۇيىمدار, مەكتەپ وقۋشىلارى مەن ستۋدەنتتەر قاتىستى.
فورۋم اياسىنداعى ءىس-شارالار ءبىر ۋاقىتتا 5 ورىندا ۇيىمداستىرىلدى: قالانىڭ اكىمشىلىك-ىسكەرلىك ورتالىعى, و.جارىلقاپوۆ اتىنداعى ورتالىق ستاديون, ح.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتى, IUTH – حالىقارالىق تۋريزم جانە قوناقجايلىلىق ۋنيۆەرسيتەتى كوپسالالى كەشەن كونگرەسس-حولل.
وقۋشىلار مەن ستۋدەنتتەرگە ارنالعان پانەلدىك سەسسيالار, قىزۋ پىكىرتالاستار, ينتەللەكتۋالدىق ۆيكتورينالار مەن قىزىقتى سايىستار وتكىزىلدى.
«جاس ۇرپاقتىڭ بويىندا قۇقىق ءتارتىبى مەن زاڭدى قۇرمەتتەۋ مادەنيەتىن تاربيەلەۋگە ارنالعان «ۇلكەن ءۇزىلىس» كەزىندە ستۋدەنتتەر دايىنداعان فلەشموبقا ەرەكشە نازار اۋدارىلدى.
سونىمەن قاتار كاسىبي پسيحولوگتار جەكە تۇلعانىڭ دامۋى مەن قۇمار ويىندارعا تاۋەلدىلىك يممۋنيتەتىن قالىپتاستىرۋعا ارنالعان ترەنينگتەر مەن دارىستەر وتكىزسە, شىعارماشىلىق تەاتر ۇجىمدارى العاش رەت ويىنعا تاۋەلدىلىككە قارسى تۇرۋ تاقىرىبىندا قويىلىم ۇسىندى», دەلىنگەن قما ءباسپاسوز قىزمەتى تاراتقان حابارلامادا.
مۇنداي ءىس-شارالار قارجىلىق ساۋاتتىلىقتى ارتتىرۋ, جاستار اراسىندا قۇقىقتىق مادەنيەتتى ناسيحاتتاۋ, قارجىلىق پيراميدالار مەن قۇمار ويىنداردىڭ الدىن الۋ, ەسىرتكىنىڭ, ەسىرتكى بيزنەسىنىڭ تارالۋىنا قارسى تۇرۋ جانە كيبەرگيگيەنانى ساقتاۋعا باعىتتالدى.