الماتىدا وتەتىن XVII حالىقارالىق «ەۋرازيا» كينوفەستيۆالىنە شەتەلدىك ساراپشىلار تارتىلعان. بيىل قازىلار القاسىنىڭ 70%-ىن تۇركيا, قىتاي, فرانتسيا, وزبەكستان, قىرعىزستان, رەسەي, شۆەتسيا, ماروككو سياقتى ەلدەردەن كەلگەن شەتەلدىك ساراپشىلار تولىقتىردى, دەپ حابارلايدى Egemen.kz.
بۇل فەستيۆالدىڭ حالىقارالىق دەڭگەيدە مويىندالعانىن جانە وعان دەگەن قىزىعۋشىلىقتىڭ ارتقانىن بىلدىرەدى.
ەسكە سالايىق, مادەني ءىس-شارا 24-30 قاراشا ارالىعىندا الماتى قالاسىندا وتەدى. كينو الەمىنىڭ ۇزدىك ماماندارى – رەجيسسەرلەر, اكتەرلەر, ستسەناريستەر مەن كورەرمەندەر ءبىر الاڭدا توعىسادى. ولار ءوزارا پىكىر الماسىپ, زاماناۋي كينونىڭ دامۋىنداعى جاڭا ادىستەردى تالقىلاپ, ءوز تاجىريبەسىن بولىسە الادى.
فەستيۆالدىڭ نەگىزگى بايقاۋلارى دا ەرەكشە نازارعا الىنعان. حالىقارالىق بايقاۋعا الەم كينەماتوگرافياسىنىڭ اڭىزى, كانن كينوفەستيۆالىنىڭ «التىن پالما بۇتاعى» يەگەرى نۋري بيلگە دجەيلان توراعالىق ەتەلى. قازىلار القاسىنىڭ قۇرامىنا سونداي-اق رانو شوديەۆا, نادا اجاري گيللون, قازاقستاندىق رەجيسسەر ەرلان نۇرمۇحامبەتوۆ جانە قىرعىز رەجيسسەرى ارتىقپاي سۇيىندىكوۆ بار. ال ورتالىق ازيا جانە تۇركى الەمى ەلدەرى بايقاۋىندا باق سىناساتىن تۋىندىلاردىڭ ەڭ ۇزدىگىن باسقا توپ انىقتايدى. قازىلار القاسىنىڭ توراعاسى - لي باوحۋا. ونىڭ شىعارماشىلىعى نەگىزىنەن مادەني مۇرا تاقىرىبىنا ارنالعان جانە كينوسۇيەر قاۋىمنىڭ كوڭىلىنەن شىعادى. قىتايلىق رەجيسسەرمەن بىرگە فيلمدەردى ماروككولىق ابدەليلا ەل دجاۋحاري, رەسەيلىك الەكسەي تەلنوۆ جانە وتاندىق پروديۋسەر جاننا قۋانىشەۆا باعالايدى.
ودان بولەك فەستيۆالگە ازيا ەلدەرىنىڭ كينەماتوگرافياسىنا ەرەكشە كوزقاراس ۇسىناتىن NETPAC قازىلار القاسى قاتىسادى. ولاردىڭ قاتارىندا نينا كوچەلياەۆا, گۇلبارا تولومۋشوۆا جانە اندرە رافاەل يۆانوۆ بار.
ايتا كەتەيىك, كينوفەستيۆالدىڭ جۇلدە قورى 20 ميلليون تەڭگەدەن اسادى. بايقاۋدىڭ باس جۇلدەسىن جەڭگەن فيلم 4 ميلليون تەڭگەنى قانجىعاسىنا بايلايدى.
فەستيۆال اياسىنداعى كورسەتىلىمدەر 25-30 قاراشا ارالىعىندا Kinopark 11 IMAX Esentai كينوتەاترىندا وتەتىنىن ەسكە سالا كەتەيىك. مادەني ءىس-شارانىڭ كەڭ اۋديتورياعا قولجەتىمدى بولۋى ءۇشىن بارلىق كورسەتىلىمدەر تەگىن وتەدى.
ءداستۇرلى فەستيۆالدىڭ نەگىزىن قالاۋشى جانە ۇيىمداستىرۋشى – قر مادەنيەت جانە اقپارات مينيسترلىگى. كينوفەستيۆالدى تىكەلەي ۇيىمداستىرۋ شاكەن ايمانوۆ اتىنداعى «قازاقفيلم» ۇلتتىق كينوستۋدياسىنا جۇكتەلگەن.