وسى جىلدىڭ 24-30 قاراشاسى ارالىعىندا الماتى قالاسى XVII حالىقارالىق «ەۋرازيا» كينوفەستيۆالىنىڭ ورتالىعىنا اينالادى. بيىلعى فەستيۆال وتاندىق كينونىڭ ايتۋلى مەرەيتويلارىمەن ەرەكشەلەنەدى. قازاق كينوسىنىڭ جارىق جۇلدىزى شاكەن ايمانوۆتىڭ 110 جىلدىق مەرەيتويى, سونداي-اق «قازاقفيلم» ۇلتتىق كينوستۋدياسىنىڭ 90 جىلدىعى جانە كينوستۋدياعا شاكەن ايمانوۆتىڭ ەسىمى بەرىلگەنىنە 40 جىل تولىپ وتىر, دەپ حابارلايدى Egemen.kz.
«بۇل جىل ءبىز ءۇشىن ەرەكشە ماڭىزعا يە. «ەۋرازيا» كينوفەستيۆالى ۇزاق ۇزىلىستەن كەيىن قايتا جاندانىپ, جاڭا بەلەسكە قادام باسىپ وتىر. سونىمەن قاتار ءبىز بيىل شاكەن ايمانوۆتىڭ مادەني مۇراسىن دارىپتەپ, قازاق كينوسىنىڭ بايلىعىن الەمگە تانىتۋدى كوزدەپ وتىرمىز. ونىڭ فيلمدەرى كورەرمەنگە شابىت بەردى. «قازاقفيلم» كينوستۋدياسىنىڭ قايتا جاڭعىرۋى دا وسىنى ايقىنداي تۇسەدى», دەدى شاكەن ايمانوۆ اتىنداعى «قازاقفيلم» كينوستۋدياسى پرەزيدەنتىنىڭ مىندەتىن اتقارۋشى, فەستيۆال ديرەكتورى ايدار وماروۆ.
فەستيۆالدىڭ ەڭ باستى ءىس-شارالارانىڭ ءبىرى – شاكەن ايمانوۆتىڭ 1964 جىلى تۇسىرىلگەن «الدار كوسە» ءفيلمىنىڭ رەستاۆراتسيالانعان نۇسقاسى كورسەتىلەدى. بۇل تۋىندى ۇلتتىق مادەنيەتكە دەگەن قۇرمەتتىڭ ەرەكشە بەلگىسى رەتىندە ۇسىنىلادى. فەستيۆالدىڭ باعدارلامالىق ديرەكتورى ديانا ءاشىموۆا كارتينانىڭ رەستاۆراتسيالانعان نۇسقاسىن كورەرمەن نازارىنا ۇسىنۋ ارقىلى قازاق كينەماتوگرافياسىنىڭ بايلىعىن جاڭا ساپادا كورسەتۋدى ماقسات ەتكەنىن جەتكىزدى.
ءداستۇرلى فەستيۆالدىڭ نەگىزىن قالاۋشى جانە ۇيىمداستىرۋشى – قر مادەنيەت جانە اقپارات مينيسترلىگى.
ايتا كەتەيىك, ءىس-شارانىڭ باستى سەرىكتەسى Bazis-A حالىقارالىق قۇرىلىس كومپانياسى. سونداي-اق KAZ Minerals كەن ءوندىرۋ كومپانياسى, Eurasian Resources Group (ERG), Sarens Kazakhstan, Salem Entertainment, Kinopark Theatres كينوتەاترلار جەلىسى جانە Astana Motors دەمەۋشىلىك ەتتى.
فەستيۆال باعدارلامسىندا حالىقارالىق بايقاۋ, ورتالىق ازيا مەن تۇركى الەمى ەلدەرىنىڭ فيلمدەر بايقاۋى وتەدى. سونىمەن قاتار ىسكەرلىك الاڭداردىڭ جۇمىسى دا قىزا تۇسپەك.
«فەستيۆال تەك بايقاۋلىق كورسەتىلىمدەرمەن شەكتەلمەيدى. بايقاۋدان تىس باعدارلامالار, شەبەرلىك ساباقتارى, پرەمەرالار جانە كينويندۋستريا ماماندارى ءۇشىن ەرەكشە تاجىريبە مەن ءبىلىم الماسۋ مۇمكىندىگىن بەرەتىن ىسكەرلىك الاڭدار ۇيىمداستىرىلادى. بارلىق ءىس-شارالار الماتىنىڭ زاماناۋي كينوتەاترلارىنىڭ ءبىرى – Kinopark 11 IMAX Esentai-دە وتەدى, ال ىسكەرلىك كەزدەسۋلەر تەمىربەك جۇرگەنوۆ اتىنداعى قازاق ۇلتتىق ونەر اكادەمياسىندا وتكىزىلەدى», دەدى كينوفەستيۆالدىڭ ىسكەرلىك الاڭىنىڭ جەتەكشىسى كارىم قادىرباەۆ.
فەستيۆالدىڭ نەگىزگى ماقساتى – مادەني بايلانىستى دامىتۋ, قازاق كينوسىنىڭ جاڭا ەسىمدەرىن اشۋ جانە ۇلتتىق مۇرانى دارىپتەۋ. بۇل رەتتە اقپاراتتىق سەرىكتەستەر دە ءوز ۇلەستەرىن قوسىپ جاتىر. ولاردىڭ قاتارىندا «حابار» اق, Qazaqstan تەلەارناسى, «نتك» تەلەارناسى, «ەۆروپا پليۋس كازاحستان», «ەلدوراديو», Qazaq Gazetteri, Egemen Qazaqstan, «كازاحستانسكايا پراۆدا», «انتەننا كازاحستان», «نوۆوە پوكولەنيە», ORDA, «قازاقپارات» حاا, ArbatMedia, El.kz, Baq.kz بار.