قازاق-ورىس ادەبي بايلانىسى كەشەگى كەڭەس كەزىندە قارقىندى دامىپ, ەكى ەل قالامگەرلەرىنىڭ شىعارمالارى وقتىن-وقتىن اۋدارىلىپ, سان مىڭ دانامەن تارالعانى ءمالىم. سوناۋ جىلداردان باستاۋ العان رۋحاني بەكەم بىرلەستىك قازىرگى تاڭدا دا ءداستۇرلى تۇردە جالعاسىپ كەلەدى. ماسەلەن, قازاق پەن كلۋبىنىڭ ورىس ادەبيەتشىلەرىمەن جاساپ جاتقان ورتاق جوبالارىن ايرىقشا اتاپ وتكەنىمىز ابزال.
قازاق اۆتورلارىن الەمگە تانىتۋ جولىندا كوپتەگەن ىرگەلى ىستەردى اتقارىپ جۇرگەن قازاق پەن كلۋبى لوندونداعى بۇكىلالەمدىك جازۋشىلار قاۋىمداستىعى – حالىقارالىق پەن كلۋبتىڭ مۇشەسى, يۋنەسكو-دا ءوز مارتەبەسى جانە بۇۇ-دا كەڭەسشىلىك مارتەبەسى بار. شىعارماشىل ماماندىقتار وكىلدەرىنىڭ زياتكەرلىك ىنتىماقتاستىعىن كەڭەيتىپ, حالىقارالىق ادەبي قوعامداستىققا قاتىسۋ, مادەنيەتتى دامىتىپ, قوعامدىق سانادا بيىك ىزگىلىك مۇراتتارىن تاربيەلەۋ ماقساتىندا قۇرىلعان كلۋب بۇگىندە ءوز ۇدەسىنە ساي ءتۇرلى باعىتتا جۇمىس ىستەپ جاتىر. ەڭ الدىمەن, بۇل شىعارماشىلىق الاڭ كاسىبي ادەبيەتشىلەر مەن جۋرناليستەردى بىرىكتىرەدى.
وسى ورايدا قازاق پەن كلۋبىنىڭ پرەزيدەنتى بيگەلدى عابدۋلليننەن شەتەلدىك ادەبي ورتامەن بايلانىستارىن, اتقارىلعان جوبالار مەن الداعى جوسپاردى سۇراپ كوردىك. اسىرەسە رەسەيلىك ادەبيەتشىلەرمەن ىسكەرلىك بايلانىس جىل وتكەن سايىن دامىپ كەلەدى, دەيدى ول.
ء«بىز ەكى ەلدەگى ادەبي-رۋحاني جاڭالىقتارمەن, جاڭا شىعىپ جاتقان كىتاپتارمەن ءبولىسىپ وتىرامىز. تۇراقتى جۇمىس ىستەيتىن اۆتورلارىمىز دا بار. ماسەلەن, ەڭ الدىمەن ايگىلى جازۋشى اناتولي كيمدى اتاپ ايتامىز. ورىس ادەبيەتىنىڭ كلاسسيگى اندرەي بيتوۆ (جۋىردا عانا ومىردەن ءوتتى), جازۋشى, قوعام قايراتكەرى گەورگي پرياحين, «يۋنوست» جۋرنالىنىڭ باس رەداكتورى, جازۋشى سەرگەي شارگۋنوۆ, پروزاشىلار ەرگالي گەر مەن ەۆگەني ابدۋللاەۆ, ادەبي سىنشى ەۆگەني ەرمولين جانە باسقالارى بار. بۇل اۆتورلار قازاق پەن كلۋبى وتكىزەتىن حالىقارالىق جازۋشىلار فورۋمدارىنا تۇراقتى قاتىسادى», دەدى قازاق پەن كلۋبى پرەزيدەنتى.
سونداي-اق ول نەگىزىنەن رەسەي پەن كلۋبىمەن ەمەس, جازۋشىلار مەن باسپاگەرلەر وداقتارىنىڭ اسسوتسياتسياسىمەن (اسپير) ارىپتەستىك بايلانىستا ەكەنىن ايتتى.
«بۇل اسسوتسياتسيا ماسكەۋدە 5-8 جەلتوقسان ارالىعىندا حالىقارالىق ادەبي فورۋم وتكىزەدى. ءوزىم دە سوعان قاتىسۋشى رەتىندە شاقىرىلدىم. جالپى, ماسكەۋدە قازاقستان اۆتورلارىنىڭ كىتاپتارى ءجيى بولماسا دا جارىق كورىپ تۇرادى. اتاپ ايتساق, يۋ.سەرەبريانسكي م.زەمسكي, ر.بۇركىتباەۆا-نۇكەنوۆا, باسقا دا اقىن-جازۋشىلاردىڭ شىعارمالارى باسىلىپ شىقتى. الداعى جىلى «حۋدوجەستۆەننايا ليتەراتۋرا» باسپاسىنان «مارال» اتتى رومانىم جارىق كورەدى», دەيدى ب.عابدۋللين.
قازاق پەن كلۋبى پرەزيدەنتىنىڭ ايتۋىنشا, قازىر بىرلەستىك اۋدارما جۇمىستارىندا باسقاشا تاسىلگە كوشكەن. قازاق كلاسسيكتەرىنىڭ شىعارمالارىن اعىلشىن, امەريكالىق شەبەر اۋدارماشىلار ارقىلى بىردەن اعىلشىن تىلىنە ءتارجىمالاپ, نيۋ-يوركتە, لوندوندا باسىپ شىعارىپ جاتىر.
«كەيىنگى جىلداردا اتالعان قالالاردا اباي, مۇحتار اۋەزوۆ, مۇقاعالي ماقاتاەۆ, ءابدىجامىل نۇرپەيىسوۆ, ولجاس سۇلەيمەنوۆ, ءابىش كەكىلباەۆ, سايىن مۇراتبەكوۆ, ساكەن ءجۇنىسوۆ, ورالحان بوكەي, قاليحان ىسقاق, گەرولد بەلگەر, قاجىعالي مۇحانبەتقاليەۆ, ءمادي ايىمبەتوۆ, ر.بۇركىتباەۆا-نۇكەنوۆا, ۇلىقبەك ەسداۋلەت, سەرىك اقسۇڭقار ۇلى, تاعى باسقالاردىڭ كىتاپتارى جارىق كوردى. ايتا كەتەيىك, بۇل كىتاپتاردىڭ اۋدارما جۇمىستارى مەن شەتەلدە باسىلىپ شىعۋى قازاق پەن كلۋبتىڭ جەكە قارجىسىمەن ىسكە اسىرىلادى», دەيدى ول.
ءيا, قازاق پەن كلۋبى جىل وتكەن سايىن شەتەلدەرمەن اراداعى ادەبي بايلانىستى نىعايتۋعا ۇلەس قوسىپ كەلەدى. جوسپاردا تۇرعان جاڭا جوبالارى دا اۋقىمدى. ەگەر مۇمكىندىك بولسا, كەلەر جىلى قاراعاندىدا نەمەسە تۇركىستاندا «كورشى ەلدەر ادەبيەتتەرىنىڭ ديالوگى: «مۇز» ءداۋىرىن قالاي ەڭسەرەمىز؟» اتتى حالىقارالىق جازۋشىلار فورۋمىن وتكىزۋدى جوسپارلاپ وتىر. القالى جيىنعا قازاقستان, قىتاي, رەسەي, موڭعوليا, وزبەكستان, قىرعىزستان, تۇرىكمەنستان, باسقا ەلدەردەن اتاقتى ادەبيەت وكىلدەرى شاقىرىلماق.